ព័ត៌មានអន្ដរជាតិ

អាមេរិក ទទួលស្គាល់មេបក្សប្រឆាំងនៅវ៉េណេស៊ុយអេឡា ជាប្រធានាធិបតីផ្លូវការ

បានផុស

៤ ខែ មុន

នៅ

ថ្ងៃពុធ ២០ វិច្ឆិកា ២០២៤

ដោយ

Chheang

សហរដ្ឋអាមេរិក បានទទួលស្គាល់មេដឹកនាំបក្សប្រឆាំងវ៉េណេស៊ុយអេឡា លោក Edmundo Gonzalez ជាប្រធានាធិបតីជាប់ឆ្នោតស្របច្បាប់របស់ប្រទេស បន្ទាប់ពីការបោះឆ្នោតកាលពីខែកក្កដា ខណៈប្រធានាធិបតី លោក Nicolas Maduro ត្រូវបានចោទប្រកាន់ដោយគូប្រជែងក្នុងស្រុកថាបានអះអាងពីជ័យជម្នះក្លែងក្លាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហរដ្ឋអាមេរិក ក៏បានដាក់ការសង្ស័យលើលោក Maduro អំពីជោគជ័យក្នុងការបោះឆ្នោត ដែលការស្ទង់មតិមុនការបោះឆ្នោតបានបង្ហាញថាលោកនឹងចាញ់នៅក្នុងកម្រិតដ៏ច្រើន។ រដ្ឋាភិបាលរបស់លោក Maduro បានបដិសេធការបញ្ចេញព័ត៌មានលម្អិតនៃការរាប់សន្លឹកឆ្នោត ពោលគឺចេញផ្សាយតែលទ្ធផលជាតួលេខនៅលើវិបសាយរដ្ឋាភិបាលប៉ុណ្ណោះ។

រដ្ឋមន្ត្រីការបរទេសអាមេរិក លោក Antony Blinken បានបង្ហោះសារនៅលើបណ្ដាញសង្គម X កាលពីថ្ងៃអង្គារថា៖ «ប្រជាជនវ៉េណេស៊ុយអេឡា បាននាំគ្នាបង្ហាញយ៉ាងច្បាស់នៅថ្ងៃទី២៨ខែកក្កដា ហើយបានធ្វើឲ្យលោក Edmundo Gonzalez-Urrutia ក្លាយជាប្រធានាធិបតីជាប់ឆ្នោត។ លទ្ធិប្រជាធិបតេយ្យទាមទារការគោរពឆន្ទៈអ្នកបោះឆ្នោត»។

សហរដ្ឋអាមេរិក និងរដ្ឋាភិបាលជាច្រើននៅទូទាំងអាមេរិកឡាទីន បានបដិសេធទទួលស្គាល់ជ័យជម្នះរបស់លោក Maduro ដោយមានការសង្ស័យអំពីលទ្ធផលបោះឆ្នោត ស្របពេលដែលរដ្ឋាភិបាលលោក Maduro បានបន្តធ្វើការបង្ក្រាបយ៉ាងធ្ងន់ធ្ងរលើក្រុមប្រឆាំង និងក្រុមបាតុករ ដែលបណ្ដាលឲ្យមានមនុស្សស្លាប់ ២៨នាក់ របួសជិត ២០០នាក់ និងត្រូវចាប់ខ្លួន ២ ៤០០នាក់។

សូមបញ្ជាក់ថា ក្រោយការបោះឆ្នោត មេបក្សប្រឆាំងវ៉េណេស៊ុយអេឡា បានរត់ភៀសខ្លួនស្វែងរកសិទ្ធិជ្រកកោនក្នុងប្រទេសអេស្ប៉ាញ ដោយសារតែមានដីកាចាប់ខ្លួនពីលោក Maduro៕

ដោយ៖ ឈាង

ចុចអាន៖ មេបក្សប្រឆាំងវ៉េណេស៊ុយអេឡា ចាកចេញពីប្រទេស ទៅជ្រកកោននៅ អេស្ប៉ាញ

Related Topics:ប្រទេសវ៉េណេស៊ុយអេឡា