ព័ត៌មានអន្ដរជាតិ

លោក ហ្សេលេនស្គី សារភាពត្រង់ៗថា អ៊ុយក្រែននឹងចាញ់ បើអាមេរិក កាត់ជំនួយ

បានផុស

៣ ខែ មុន

នៅ

ថ្ងៃពុធ ២០ វិច្ឆិកា ២០២៤

ដោយ

ក្នុងបទសម្ភាសជាមួយទូរទស្សន៍ Fox News ដែលចាក់ផ្សាយកាលពីថ្ងៃអង្គារទី១៩ខែវិច្ឆិកាឆ្នាំ២០២៤ ប្រមុខដឹកនាំទីក្រុងកៀវលោក វ្ល៉ាឌីមៀរ ហ្សេលេនស្គី បានសារភាពត្រង់ៗថា អ៊ុយក្រែននឹងចាញ់សង្គ្រាមរុស្ស៊ី បើសហរដ្ឋអាមេរិក ពិតជាកាត់ជំនួយយោធាមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកហ្សេលេនស្គីគូសបញ្ជាក់ថា «មែនហើយ យើងនៅតែប្រយុទ្ធ ហើយយើងក៏អាចផលិតអាវុធបានដែរ ប៉ុន្តែវាមិនគ្រប់គ្រាន់ទេ រឹតតែមិនអាចជួយឲ្យយើងឈ្នះនិងរស់បានទៀត។ បើអាមេរិកកាត់ជំនួយ យើងនឹងចាញ់ជាក់ជាមិនខានឡើយ»។

ការលើកឡើងរបស់លោក គឺចង់សំដៅទៅរដ្ឋបាលថ្មីរបស់សហរដ្ឋអាមេរិក ដែលនឹងដឹកនាំដោយលោក ដូណាល់ ត្រាំ នៅឆ្នាំក្រោយ។ រដ្ឋាភិបាលថ្មីនេះ គឺជាអ្នកមិនសូវគាំទ្រអ៊ុយក្រែនឡើយ ជាក់ស្តែងគណបក្សសាធារណរដ្ឋតែងតែប្រឆាំងនិងរិះគន់មិនដាច់ពីមាត់ចំពោះ រដ្ឋបាលលោក ចូ បៃដិន ដែលជួយអ៊ុយក្រែនឥតឈប់។

យ៉ាងណាក្តី លោកហ្សេលេនស្គី បានសង្កត់ធ្ងង់ថា ទំនាក់ទំនងអាមេរិក-អ៊ុយក្រែន ពិតជាសំខាន់ខ្លាំងណាស់។ សម្ព័ន្ធមិត្តទាំងពីរត្រូវតែឈរប្រកៀកស្មាគ្នា ដើម្បីប្រឆាំងទីក្រុងមូស្គូ។

ដោយឡែកនៅក្នុងកិច្ចប្រជុំសភាកាលពីថ្ងៃអង្គារនោះដែរ លោក ហ្សេលេនស្គី បានប្រកាសលុបចោលការបោះឆ្នោតសកលនៅអ៊ុយក្រែនសាជាថ្មី ខណៈអាណត្តិជាប្រធានាធិបតីរបស់លោកបានផុតកំណត់តាំងពីខែមីនាឆ្នាំ២០២៤មកម្ល៉េះ ក្រោមហេតុផលកំពុងផ្ទុះសង្គ្រាមជាមួយរុស្ស៊ី និងការអនុវត្តច្បាប់អាជ្ញាសឹកដែលបានដាក់ចេញកាលពីឆ្នាំ២០២២។ លោក បញ្ជាក់ថា អ៊ុយក្រែនត្រូវតែសម្រេចសន្តិភាពជាមុនសិន ទើបប្រជាជនអាចទៅបោះឆ្នោតបាន។

ស្របពេលជាមួយគ្នានោះ លោក Andrey Yermak ប្រធានការិយាល័យប្រធានាធិបតីអ៊ុយក្រែន បាននិយាយថា ការបោះឆ្នោតប្រធានាធិបតីនឹងត្រូវធ្វើឡើងភ្លាមៗ បន្ទាប់ពីសង្គ្រាមបានបញ្ចប់។

ចំណែកប្រធានសភាលោក Ruslan Stefanchuk បញ្ជាក់ថា ការបោះឆ្នោតប្រធានាធិបតីថ្មីនឹងប្រព្រឹត្តទៅក្នុងរយៈពេល៦០ថ្ងៃ បន្ទាប់ពីច្បាប់អាជ្ញាសឹកត្រូវបានលុបចោល៕

អត្ថបទ៖ សុខ សុវណ្ណ

ចុចអាន៖ លោក បៃដិន ប្រកាសផ្ដល់គ្រាប់មីនឲ្យអ៊ុយក្រែន ប្រើទុកច្បាំងជាមួយរុស្ស៊ី