ព័ត៌មានអន្ដរជាតិ

មីយ៉ាន់ម៉ា មានអ្នកស្លាប់ដោយសារមីនច្រើនជាងគេលើលោក ក្នុងឆ្នាំ២០២៣

បានផុស

៣ ខែ មុន

នៅ

ថ្ងៃពុធ ២០ វិច្ឆិកា ២០២៤

ដោយ

Chheang

ប្រជាជននៅមីយ៉ាន់ម៉ា បានបាត់បង់ជីវិតច្រើនជាងប្រទេសណាណាទាំងអស់នៅលើពិភពលោកក្នុងឆ្នាំ២០២៣ ដោយសារតែគ្រាប់មីន និងយុទ្ធភណ្ឌមិនទាន់ផ្ទុះ។ នេះបើយោងតាមទិន្នន័យរបស់អង្គការយុទ្ធនាការអន្តរជាតិដើម្បីទប់ស្កាត់មីន ហៅកាត់ថា ICBL នៅថ្ងៃទី២០ខែវិច្ឆិកាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការ ICBL បានឲ្យដឹងថា ពលរដ្ឋមីយ៉ាន់ម៉ា ស្លាប់ដោយសារមីននៅក្នុងឆ្នាំ២០២៣ មានចំនួនសរុប ១ ០០៣នាក់។ នេះក៏ព្រោះតែជម្លោះជាច្រើនទសវត្សរ៍រវាងយោធា និងក្រុមឧទ្ទាមជនជាតិភាគតិច ដែលបានបន្សល់ទុកនូវផ្ទៃដីបង្កប់គ្រាប់មីន និងយុទ្ធភណ្ឌមិនទាន់ផ្ទុះជាច្រើនដ៏មានគ្រោះថ្នាក់។

លោក Yeshua Moser-Puangsuwan មន្ត្រីអង្គការ ICBL បានប្រាប់ថា តួលេខជាក់ស្ដែងនៃអ្នកស្លាប់ដោយសារមីននៅមីយ៉ាន់ម៉ា អាចមានច្រើនជាងនេះទៅទៀតរហូតដល់ ២ ឬ ៣ដងឯណោះ ខណៈបញ្ហាជម្លោះប្រដាប់អាវុធ និងការរឹតបន្តឹងដោយរបបសឹកយោធា បានធ្វើឲ្យការស្រង់ទិន្នន័យមានភាពលំបាក។

ក្រៅតែពីមីយ៉ាន់ម៉ា បណ្ដាប្រទេសចំនួន៣ផ្សេងទៀតក៏មានតួលេខអ្នកស្លាប់ដោយសារមីនច្រើនផងដែរ ដូចជា ស៊ីរី មានអ្នកស្លាប់ ៩៣៣នាក់, អាហ្វហ្គានីស្ថាន ៦៥១នាក់ និងអ៊ុយក្រែន ៥៨០នាក់។

អង្គការ ICBL បានរាយការណ៍ថា ឆ្នាំមុន មានមនុស្សយ៉ាងហោចណាស់ ៥ ៧៥៧នាក់ បានរងគ្រោះនៅក្នុងករណីផ្ទុះគ្រាប់មីននៅជុំវិញពិភពលោក ដោយក្នុងនោះមាន ១ ៩៨៣នាក់បានបាត់បង់ជីវិត។ ក្នុងចំណោមតួលេខអ្នកស្លាប់សរុប មានជនស៊ីវិលចំនួន ៨៤%។

តួលេខអ្នកស្លាប់ព្រោះមីនឆ្នាំ២០២៣ មានការកើនឡើងច្រើនជាងឆ្នាំ២០២២ ដែលមានអ្នកបាត់បង់ជីវិតត្រឹម ១ ៦៦១នាក់៕

ដោយ៖ ឈាង