ជម្លោះ​វោហារស័ព្ទ​​ផ្ទុះ​ឡើង​យ៉ាង​ខ្លាំង​​​រវាង​មេដឹកនាំបស្ចឹម​​លោកនិងរុស្ស៊ី ក្រោយ​ពូទីន​ចេញ​ក្រឹត្យ​កែប្រែ​ការ​​ប្រើ​នុយក្លេអ៊ែរ​​​

ក្រោយ​​​ប្រធានាធិបតី​​​រុស្ស៊ី​ លោក វ្ល៉ាឌីមៀ ពូទីន ​ចេញ​ក្រឹត្យ​​​មួយ​កំណត់​ការ​ប្រើប្រាស់​អាវុធនុយក្លេអ៊ែរ​ចំពោះ​រដ្ឋ​គ្មាន​​​នុយក្លេអ៊ែរ​​​​ដែល​ទទួល​ការ​ទំនុកបម្រុង​ពីរដ្ឋ​មាន​នុយក្លេអ៊ែរ ​មេដឹកនាំ​​​​មហាអំណាច​បស្ចឹមប្រទេស​​​​​ រួម​មាន​បារាំង​​ អង់គ្លេស និង​សហរដ្ឋអាមេរិក​​បាន​ប្រតិកម្ម​​ចំពោះ​លោក​ពូទីនឲ្យ​​ថ្លែង​ដោយ​មាន​ការ​ប្រុង​ប្រយ័ត្ន​។

​​លោក ពូទីន បាន​ចេញ​ក្រឹត្យ​កំពូល​កំណត់​ការ​ប្រើប្រាស់​នុយក្លេអ៊ែរ​នោះកើត​ឡើង​​ក្រោយ​​ប្រធានាធិបតី​សហរដ្ឋអាមេរិក​និង​សម្ព័ន្ធ​​មិត្ត​អឺរ៉ុប​ខាងលិច បាន​ដក​បម្រាម​​​​លើ​រដ្ឋាភិបាលអ៊ុយក្រែន​ក្នុងការ​ប្រើប្រាស់​អាវុធ​របស់​ពួកគេ​​​ក្នុងការ​បាញ់​ចូល​​ក្នុងទឹកដី​​រុស្ស៊ី​។

​នៅ​ឯកិច្ច​ប្រជុំ​​កំពូល​របស់​មេដឹកនាំប្រទេស​រីកលួត​លាស់​សេដ្ឋកិច្ច​ទាំង​២០ ឬ​ហៅកាត់ថា G-20 ប្រធានាធិបតី​បារាំង លោ​ក អេម៉ានូអែល ម៉ាក្រុង (Emmanuel Macron) ​បាន​​ប្រាប់​ឲ្យ​លោក​ ពូទីន​ដាក់​ចុះ​​​​ពី​ការ​គំរាមកំហែង​​​អាវុធ​នុយក្លេអ៊ែរ។

លោក ម៉ាក្រុង បាន​ធ្វើ​អត្ថាធិប្បាយ​ក្នុងកិច្ច​ប្រជុំ​​​​កំពូល​​​នៃ​មេដឹកនាំ​​ G-20 នៅ​​ទីក្រុង Rio de Janeiro ​ប្រទេស​ប្រេស៊ីលថា៖«​សូម​​​ឲ្យ​មាន​ហេតុផល​​ និង​ ​ឈប់​​បង្ហាញ​វិធី​សាស្រ្ត​​ដ៏​គឃ្លើន​ចំពោះ​​សហគមន៍​អន្តរជាតិ​»។ ​​នេះ​បើ​យោង​តាមការ​ស្រង់​សម្តី​​របស់​​សារព័ត៌មាន Politico។

លោក ម៉ាក្រុង​ បាន​​លើក​ឡើង​ផងដែរថា៖ «រុស្ស៊ី​​កំពុង​ក្លាយ​ជា​​អ្នក​ដែល​​​​ធ្វើ​ឲ្យ​មាន​អស្ថេរភាព»។

បន្ទាប់​ពីសហរដ្ឋ​អាមេរិក ប្រធានាធិបតី​បារាំង​ដែល​បាន​អនុញ្ញាត​​ឲ្យ​​​អ៊ុយក្រែន​ប្រើប្រាស់​មីស៊ីល​រយៈចម្ងាយ​ឆ្ងាយ​ គឺប្រភេទ​មីស៊ីល SCALP បាន​កោត​សរសើរ​ការ​សម្រេច​ចិត្ត​របស់​​ប្រធានាធិបតី​​ជិត​ផុត​អាណត្តិ​របស់​សហរដ្ឋ​អាមេរិក លោក ចូ បៃ​ដិន ដែល​លើកបម្រាម​​​​​​លើ​អ៊ុយក្រែន​ ថា​ជា ការសម្រេច​ចិត្ត​ដ៏ត្រឹមត្រូវ។

 ទោះ​ជាបែបណា​ក៏ដោយ នាយក​រដ្ឋមន្ត្រី​អង់គ្លេស លោក Keir Starmer ​បាន​​និយាយ​នៅ​​ឯកិច្ច​ប្រជុំ​​ក្នុង​ទីក្រុង Rio De Janero ​ប្រទេស​ប្រេស៊ីល​ថា អ៊ុយក្រែន​គង់​តែ​ឈ្នះ​ការ​អ​នុញ្ញាត​ឲ្យ​ប្រើ​មីស៊ីល​ផ្លោង Storm Shadow របស់​អង់គ្លេស​​សម្រាប់សង្គ្រាម​នៅ​រុស្ស៊ី​​ ដោយ​​​​​​​អះអាង​ថា អ៊ុយក្រែន​​ត្រូវ​តែ​មាន​​អ្វី​ដែលខ្លួន​ត្រូវ​ការ​ដើម្បីទទួលជ័យ​ជម្នះ។​ ​​​

ក្នុងសង្គ្រាម​​រយៈពេល​១០០០ថ្ងៃ​ដែល​រុស្ស៊ី​ឈ្លាន​ពាន​​អ៊ុយក្រែន នាយក​រដ្ឋមន្ត្រី​អង់គ្លេស​បាន​ជំរុញ​ឲ្យ​​​សម្ព័ន្ធ​មិត្ត​​​ត្រូវ​តែ​ដាក់​​​ទីក្រុង​កៀវ​នៅ​ទីតាំង​មួយសម្របខ្លាំង​បំផុត​ដើម្បី​ឈ្នះសង្គ្រាម​។

​​លោក​ ចូ បៃដិន ប្រធានាធិបតីសហរដ្ឋ​អាមេរិកដែល​នឹង​ផុត​អាណត្តិរបស់ខ្លួន​នៅ​មិន​ដល់​២ខែទៀត បានឆ្លើយ​តប​ចំពោះ ប្រធានាធិបតី​រុស្ស៊ី​ដែល​កែប្រែ​​ការ​ប្រើប្រាស់​នុយក្លេអ៊ែរ​ តាមរយៈ​ការ​ចេញ​ក្រឹត្យ​មួយ​កាល​ពីថ្ងៃអង្គារ ដោយ​លោក​ចូ បៃដិន បាន​និយាយថាជា «វោហារ​ស័ព្ទ​គ្មាន​ការ​ទទួល​ខុសត្រូវ»​។

អ្នក​នាំ​ពាក្យ​​​រដ្ឋាភិបាល​រុស្ស៊ី ដែលគេ​ស្គាល់ថា «វិមាន​ក្រឹម​ឡាំង» លោក ​Dmitry Peskov ​បាននិយាយថា រុស្ស៊ី​​​រក្សា​សិទ្ធិ​ក្នុងការប្រើប្រាស់​​​អាវុធ​នុយក្លេអ៊ែរ​ប្រឆាំង​​នឹង​អ៊ុយក្រែន​ ដែល​ពេលនេះ​​កំពុង​ទទួលបាន​ការ​យល់​ព្រម​ពី​លោក​ខាងលិច​ក្នុងកា​រប្រើប្រាស់​មីស៊ីល​​រយៈចម្ងាយឆ្ងាយ​​ចូល​ទៅ​​ក្នុង​ទឹកដី​រុស្ស៊ី។

នៅ​ក្នុងសន្និសីទ​សារព័ត៌មាន ក្រោយ​លោក​ពូទីនចុះ​ហត្ថលេខា​លើ​ក្រឹត្យ​​ថ្មីមួ​យ​នៅ​ថ្ងៃទី​១៩វិច្ឆិកា​នេះ លោក ​Dmitry Peskov បាន​និយាយថា ​ឯកសារ​នោះ​ពាក់​ព័ន្ធ​​ការ​ពិត​ដែលថា ​​សហព័ន្ធ​រុស្ស៊ី​​​រក្សា​​សិទ្ធិ​ប្រើប្រាស់​​អាវុធ​នុយក្លេអ៊ែរ​​ក្នុង​​ហេតុការណ៍​​​​គឃ្លើន​​​​ដោយ​ការ​ប្រើប្រាស់​​​អាវុធ​​រយៈចម្ងាយឆ្ងាយ​​ប្រឆាំង​​ខ្លួនដែលជាកន្លែងដែលត្រូវបានចាត់ទុកថាបានបង្កើត​នូវ​«ការគំរាមកំហែងយ៉ាងធ្ងន់ធ្ងរចំពោះអធិបតេយ្យភាព ឬបូរណភាពទឹកដី់»​។

​រដ្ឋមន្ត្រី​ការបរទេសរុស្ស៊ី លោក​ សឺហ្គេយ ឡាវរ៉ូវ (Sergei Lavrov) បាន​​លើក​ឡើង​ក្នុងសន្និសីទ​​មួយ​អំឡុង​កិច្ចប្រជុំ​​កំពូល​ G-20 នៅ​ប្រទេសប្រេស៊ីល​នោះដែរថា ​ទីក្រុងមូស្គួ​​ប្រឹង​ប្រែងយ៉ាង​ខ្លាំង​​​ក្នុងការ​គាំទ្រ​​មិន​ឲ្យ​កើត​សង្គ្រាម​​នុយក្លេអ៊ែរ ប៉ុន្តែ​​​ទទួល​​ខុសត្រូវ​​ចំពោះ​ការ​កើន​ឡើង​​សង្គ្រាម​​​​ដោយ​អាមេរិក​។​

លោក ឡាវរ៉ូវ បាន​និយាយថា៖«​ប្រសិន​បើ​​​មីស៊ីចម្ងាយឆ្ងាយ​​ត្រូវ​បាញ់​​ពី​អ៊ុយក្រែន​​ទៅ​ទឹកដីរុស្ស៊ី វា​មាន​ន័យថាពួក​គេ​​​នឹង​ត្រូវ​គ្រប់​គ្រង​​ដោយ​អ្នក​ជំនាញ​​​យោធា​អាមេរិក។ យើង​នឹង​ឆ្លើយ​តប​​ជាក់ស្តែង​»។

ប្រធានាធិបតី​រុស្ស៊ី លោក វ៉្លាឌីមៀ ពូទីន បាន​ចេញ​ក្រឹត្យ​មួយ​​ ដែល​និយាយ​អំពី​ការ​ប្រើ​ប្រាស់​នុយក្លេអ៊ែរ​ ដោយ​​​បញ្ជក់​ពី​ការ​ជាប់​ពាក់​ព័ន្ធ​របស់​រដ្ឋ​ដទៃ​​​ដែល​មាន​នុយក្លេអ៊ែរ​​ក្នុងការ​ជួយ​រដ្ឋ​ដែល​មិនមាន​នុយក្លេអ៊ែរ​ ក្នុង​​ការ​វាយប្រហារ​​​​សហព័ន្ធ​រុស្ស៊ី​ដែល​ជា​រដ្ឋ​មាន​នុយក្លេអ៊ែរ​។

ក្រឹត្យ​ដែលត្រូវ​បាន​ប្រព័ន្ធផ្សព្វផ្សាយ​អ៊ុយក្រែន​​​ផុស​នៅ​មុន​នេះ​និង​បាន​ត្រូវ​បាន​សរសេរ​​បក​ប្រែ​ជាភាសា​អង់គ្លេស​ដែល​ត្រូវ​បាន​ដកស្រង់​មានខ្លឹមសារ​ថា៖​«ខ្លួន​សូម​ប្រកាស​ថា ប្រសិន​បើ​រដ្ឋ​មិន​មាន​នុយក្លេអ៊ែរ​​ណាមួយ​ដែល​វាយ​ប្រហារ​​រុស្ស៊ី​​ដោយ​​​មាន​ការ​គាំទ្រ​​ដោយ​​រដ្ឋ​មាន​នុយក្លេអ៊ែរ ខ្លួន​នឹង​​ចាត់​ទុក​​ជា​ការ​វាយប្រហារ​​រួម​គ្នា​លើ​​​​សហព័ន្ធ​រុស្ស៊ី​»។

​​រុស្ស៊ី​បាន​បង្កើន​ការ​ដាក់​សម្ពាធ​លើ​អ៊ុយក្រែន​យ៉ាងខ្លាំង​ក្រោយ​ការ​ជាប់​ឆ្នោត​របស់​លោក​​ ដូណាល់​ ត្រាំ ​ដែលសន្យាបញ្ចប់សង្គ្រាម​រុស្ស៊ី​-​អ៊ុយក្រែន​​ឱ្យបានឆាប់។ ការ​វាយ​ប្រហារ​របស់​រុស្ស៊ី​ក៏​ជា​ការ​ដាក់​សម្ពាធ​សម្រាប់​ការ​ចរចា​ណាមួយដែល​អាច​កើត​មានឆាប់ៗ។ ចំណែក​សម្ព័ន្ធ​មិត្តលោក​ខាងលិច ក៏បាន​បន្ធូរ​ដៃ​ឲ្យអ៊ុយក្រែន​ប្រើប្រាស់​អាវុធ​របស់ខ្លួន ដែលពួក​គេ​រឹតត្បិត​ក្នុងការ​ប្រើប្រាស់​​ជាយូរ​មក​ហើយ៕​

ដោយ រ៉ាន់ រើយ​