កាន់តែក្តៅ! ថ្ងៃមុនបាញ់ ATACMS, ឥឡូវ អ៊ុយក្រែន បាញ់ Storm Shadow ចូលដីរុស្ស៊ី ថែមទៀត 

ស្ថានការណ៍រឹតតែតានតឹង ដោយអ៊ុយក្រែន បានបាញ់មីស៊ីល Storm Shadow របស់អង់គ្លេស​ លើគោលដៅនៅក្នុងប្រទេសរុស្ស៊ីជាលើកដំបូង ដែលការវាយប្រហារនេះកើតឡើងត្រឹមមួយថ្ងៃប៉ុណ្ណោះ បន្ទាប់ពីកងទ័ពរបស់លោក ហ្សេលេនស្គី បាញ់មីស៊ីល ATACMS ផ្គត់ផ្គង់ដោយអាមេរិក ចូលដីរុស្ស៊ី ធ្វើឲ្យលោក ពូទីន ក្តៅស្លឹកត្រចៀករួចមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT កាលពីថ្ងៃពុធទី២០ខែវិច្ឆិកាឆ្នាំ២០២៤, មីស៊ីលបាញ់ដោយអ៊ុយក្រែន គឺបានវាយប្រហារតំបន់ Kursk និង Krasnodar ប៉ុន្តែមិនមានសេចក្តីរាយការណ៍អំពីជនស៊ីលរងគ្រោះនោះទេ។

ទោះបីជាយ៉ាងណាក៏ដោយ ពាក់ព័ន្ធរឿងនេះ ទីក្រុងឡុងដ៍ មិនទាន់ចេញមុខបញ្ជាក់ឬបដិសេធឡើយ ប៉ុន្តែមានដំណឹងថា រដ្ឋមន្ត្រីការពារជាតិអង់គ្លេស John Healey បានពិភាក្សាជាមួយសមភាគីអ៊ុយក្រែន កាលពីរាត្រីថ្ងៃអង្គារ។

មីស៊ីល Storm Shadow ត្រូវ​​គេ​ដឹង​ថា ​ជា​អាវុធដែលមានសមត្ថភាពបាញ់ជ្រៀត​ចូលទៅក្នុង​លេណដ្ឋាន និង​ឃ្លាំង​គ្រាប់ ដូច​អាវុធមួយចំនួន​ដែល​រុស្ស៊ី​ប្រើ​ក្នុង​សង្គ្រាម​​អ៊ុយក្រែនដែរ។

ការវាយប្រហារថ្មីនេះ កើតឡើងចំពេលស្ថានការណ៍កំពុងក្តៅគគុក បន្ទាប់ពីអ៊ុយក្រែន បាញ់មីស៊ីល ATACMS របស់អាមេរិក ចូលក្នុងដីរុស្ស៊ី ជាហេតុនាំឲ្យទីក្រុងមូស្គូ គំរាមសងសឹក។

ការដែលអ៊ុយក្រែន ហ៊ានបាញ់មីស៊ីលរបស់លោកខាងលិចចូលក្នុងដីរុស្ស៊ី គឺដោយសារមានការបើកភ្លើងខៀវនិងធានាអះអាងពីសំណាក់មេដឹកនាំប្រទេសជាមហាអំណាច ដែលសម្រេចចិត្តបែបនេះ ធ្វើឲ្យវិមានក្រឹមឡាំងរិះគន់កប់ៗមាត់ ហើយអ្នកខ្លះភ័យខ្លាចសង្គ្រាមរុស្ស៊ី-អ៊ុយក្រែន អាចផ្ទុះរាលដាលឈានដល់ការកើតសង្គ្រាមលោកលើកទី៣ទៀតផង។

ទីក្រុងមូស្គូតែងព្រមានថា ការវាយប្រហារដោយអាវុធលោកខាងលិច ចូលជ្រៅក្នុងទឹកដីរុស្ស៊ី នឹងត្រូវបានចាត់ទុកថា ជាសង្គ្រាមដោយផ្ទាល់រវាងអង្គការណាតូនិងប្រទេសរុស្ស៊ី ខណៈថ្មីៗនេះ លោកពូទីន បានកែប្រែលក្ខខណ្ឌបាញ់នុយក្លេអ៊ែររួចទៅហើយ៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន បាញ់មីស៊ីលអាមេរិក ចូលដីរុស្ស៊ីជាលើកដំបូង ខណៈរុស្ស៊ី គំរាមសងសឹក