ព័ត៌មានអន្ដរជាតិ

កាន់តែមិនស្រួល! រុស្ស៊ី គំរាមបាញ់មីស៊ីលអន្តរទ្វីបឲ្យចំរដ្ឋធានីកៀវរបស់អ៊ុយក្រែន

បានផុស

២ ខែ មុន

នៅ

ថ្ងៃព្រហស្បតិ៍ ២១ វិច្ឆិកា ២០២៤

ដោយ

Chheang

កងកម្លាំងរុស្ស៊ី កំពុងរៀបចំការវាយប្រហារដោយប្រើមីស៊ីលអន្តរទ្វីប RS-26 សំដៅលើរដ្ឋធានីកៀវ ដែលនេះគឺជាការសងសឹកចំពោះអ៊ុយក្រែនក្នុងការប្រើប្រាស់អាវុធលោកខាងលិចប្រឆាំងនឹងក្រុងមូស្គូ។ នេះបើយោងតាមការចុះផ្សាយរបស់កាសែតរុស្ស៊ី Moskovsky Komsomolets នៅថ្ងៃទី២១ខែវិច្ឆិកាឆ្នាំ២០២៤។

មីស៊ីលអន្តរទ្វីប RS-26 (រូបភាព៖ ក្រសួងការពារជាតិរុស្ស៊ី)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍នេះ បានធ្វើឡើងបន្ទាប់ពីអ៊ុយក្រែន បានបាញ់មីស៊ីល Storm Shadow របស់អង់គ្លេស លើគោលដៅនៅក្នុងប្រទេសរុស្ស៊ីជាលើកដំបូង ដែលការវាយប្រហារនេះកើតឡើងត្រឹមមួយថ្ងៃប៉ុណ្ណោះ បន្ទាប់ពីកងទ័ពក្រុងកៀវ បាញ់មីស៊ីល ATACMS ផ្គត់ផ្គង់ដោយអាមេរិក ចូលទឹកដីរុស្ស៊ី។ មីស៊ីលបាញ់ដោយអ៊ុយក្រែន បានវាយប្រហារតំបន់ Kursk និង Krasnodar ប៉ុន្តែមិនមានសេចក្តីរាយការណ៍អំពីជនស៊ីវិលរងគ្រោះនោះទេ។

កាសែត Moskovsky Komsomolets បានផ្សាយថា យោធារុស្ស៊ី បានត្រៀមខ្លួនរួចរាល់ហើយ សម្រាប់បាញ់មីស៊ីល RS-26 ចេញពីទីក្រុង Astrakhan ដែលស្ថិតនៅក្បែរសមុទ្រកាសព្យែន។

បើយោងតាមអ្នកជំនាញ មីស៊ីលដ៏ខ្លាំងក្លានេះមិនធ្លាប់ត្រូវរុស្ស៊ីប្រើប្រាស់នៅក្នុងការប្រយុទ្ធពីមុននោះឡើយ។ RS-26 មានល្បឿនលឿនជាងសំឡេងដល់ទៅ៥ដង ដែលវានឹងធ្វើឲ្យអ៊ុយក្រែនពិបាកបាញ់ស្ទាក់ណាស់ បើទោះជាប្រើខែលការពារ Patriot របស់អាមេរិកក៏ដោយ។ មួយវិញទៀត RS-26 មានទម្ងន់៥០តោន ហើយក្បាលគ្រាប់វាធំជាងមីស៊ីល Iskander ដែលរុស្ស៊ីធ្លាប់បាញ់លើក្រុងកៀវ ដល់ទៅ៣ដងឯណោះ។

សូមបញ្ជាក់ថា កាលពីព្រឹកថ្ងៃពុធ រដ្ឋធានីកៀវ បានកើតមានភាពច្របូកច្របល់ខ្លាំង បន្ទាប់ពីអាមេរិកប្រកាសបិទស្ថានទូតបណ្ដោះអាសន្ន ដោយបារម្ភថាអាចមានការវាយប្រហារទ្រង់ទ្រាយធំពីរុស្ស៊ី។ ក្រៅតែពីអាមេរិក ប្រទេសចំនួន៣ទៀតដូចជា ក្រិក អ៊ីតាលី និងអេស្ប៉ាញ ក៏បានបិទស្ថានទូតរបស់ពួកគេនៅក្រុងកៀវផងដែរ៕

ដោយ៖ ឈាង

ចុចអាន៖ កាន់តែក្តៅ! ថ្ងៃមុនបាញ់ ATACMS, ឥឡូវ អ៊ុយក្រែន បាញ់ Storm Shadow ចូលដីរុស្ស៊ី ថែមទៀត