ព័ត៌មានអន្ដរជាតិ

សង្គ្រាមកាន់តែធំ! រុស្ស៊ី បាញ់មីស៊ីលអន្តរទ្វីបវាយប្រហារអ៊ុយក្រែន ជាលើកដំបូង

បានផុស

២ ខែ មុន

នៅ

ថ្ងៃព្រហស្បតិ៍ ២១ វិច្ឆិកា ២០២៤

ដោយ

Chheang

កងកម្លាំងដែនអាកាសក្រុងកៀវ បានប្រាប់ថា រុស្ស៊ីបានបាញ់មីស៊ីលអន្តរទ្វីបមួយគ្រាប់ចេញពីតំបន់ Astrakhan វាយប្រហារអ៊ុយក្រែន នៅព្រឹកថ្ងៃព្រហស្បតិ៍នេះ។ វាគឺជាលើកដំបូងហើយដែលក្រុងមូស្គូបានប្រើប្រាស់អាវុធធុនធ្ងន់បែបនេះ នៅក្នុងសង្គ្រាមដែលមានអាយុកាល៣៣ខែ។

មីស៊ីលអន្តរទ្វីបដែលរុស្ស៊ីធ្លាប់បាញ់សាកល្បង (រូបភាព៖ ក្រសួងការពារជាតិរុស្ស៊ី)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ុយក្រែន បានឲ្យដឹងថា ការវាយប្រហាររុស្ស៊ីសំដៅលើសហគ្រាស និងហេដ្ឋារចនាសម្ព័ន្ធសាធារណៈ នៅក្នុងទីក្រុង Dnipro។ យ៉ាងណាមិញ អ៊ុយក្រែន មិនបានបញ្ជាក់ច្បាស់លាស់ពីប្រភេទនៃមីស៊ីលអន្តរទ្វីប និងទំហំខូចខាតពិតប្រាកដនោះទេ។

មីស៊ីលអន្តរទ្វីបរុស្ស៊ី អាចបាញ់ក្នុងរយៈចម្ងាយរាប់ពាន់គីឡូម៉ែត្រឯណោះ ហើយអ្វីដែលពិសេសគឺវាអាចបំពាក់ក្បាលគ្រាប់នុយក្លេអ៊ែរថែមទៀតផង។ យ៉ាងណា អាវុធប្រភេទនេះក៏អាចបំពាក់ក្បាលគ្រាប់ធម្មតាផងដែរ។

ក្រៅតែពីមីស៊ីលអន្តរទ្វីប កងកម្លាំងអាកាសអ៊ុយក្រែន បានអះអាងថា ខ្លួនក៏បានបាញ់ទម្លាក់មីស៊ីលគ្រូស Kh-101 ចំនួន៦គ្រាប់របស់រុស្ស៊ីដែរ នៅក្នុងការវាយប្រហារថ្ងៃនេះ។

សូមបញ្ជាក់ថា ការវាយប្រហាររបស់រុស្ស៊ីលើអ៊ុយក្រែន បានធ្វើឡើងបន្ទាប់ពីអ៊ុយក្រែន បានប្រើគ្រាប់មីស៊ីលរយៈចម្ងាយឆ្ងាយរបស់អាមេរិក និងអង់គ្លេស ផ្លោងចូលក្នុងទឹកដីរុស្ស៊ី បន្ទាប់ពីការបើកភ្លើងខៀវពីបណ្ដាប្រទេសដែលជាសម្ព័ន្ធមិត្តទាំងនោះ។

រុស្ស៊ី កន្លងមកធ្លាប់បានព្រមានរួចមកហើយថា បើអ៊ុយក្រែនហ៊ានប្រើអាវុធលោកខាងលិចវាយចូលជ្រៅក្នុងដីរុស្ស៊ី នោះខ្លួននឹងមើលឃើញពីការកើនឡើងកម្ដៅនៃភ្លើងសង្គ្រាមដ៏ធំជាក់ជាមិនខាន៕

ដោយ៖ ឈាង

ចុចអាន៖ កាន់តែក្តៅ! ថ្ងៃមុនបាញ់ ATACMS, ឥឡូវ អ៊ុយក្រែន បាញ់ Storm Shadow ចូលដីរុស្ស៊ី ថែមទៀត