ព័ត៌មានអន្ដរជាតិ

អាមេរិក ត្រៀមខ្លួន បាញ់នុយក្លេអ៊ែររួចហើយ

បានផុស

៣ ខែ មុន

នៅ

ថ្ងៃសុក្រ ២២ វិច្ឆិកា ២០២៤

ដោយ

ក្នុងព្រឹត្តិការណ៍ Project Atom 2024 នៅឯមជ្ឈមណ្ឌលសិក្សាយុទ្ធសាស្ត្រនិងអន្តរជាតិ កាលពីថ្ងៃព្រហស្បតិ៍ទី២១ខែវិច្ឆិកាឆ្នាំ២០២៤, អ្នកនាំពាក្យទីបញ្ជាការយុទ្ធសាស្ត្រអាមេរិក «STRATCOM» ឧត្តមនាវីទោ Thomas Buchanan បានបញ្ជាក់យ៉ាងច្បាស់ថា សហរដ្ឋអាមេរិក ត្រៀមខ្លួនរួចជាស្រេចអស់ហើយ ក្នុងការបាញ់នុយក្លេអ៊ែរប្រសិនបើចាំបាច់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា លោកលើកឡើងថា «លក្ខខណ្ឌបាញ់នុយក្លេអ៊ែរ ក៏អាស្រ័យលើហេតុផលសមរម្យនិងផលប្រយោជន៍របស់ខ្លួនផងដែរ។ អាមេរិក ត្រូវធ្វើយ៉ាងណាដើម្បីធានាថា ខ្លួននៅតែបន្តមាននាមជាមេដឹកនាំពិភពលោក»។

ទោះបែបនេះក្តី លោក Buchanan ក៏ជំរុញឲ្យមានការសន្ទនាជាមួយរុស្ស៊ី ចិន និងកូរ៉េខាងជើង ផងដែរ ដើម្បីកាត់បន្ថយហានិភ័យនៃជម្លោះនុយក្លេអ៊ែរ ស្របពេលដែលស្ថានការណ៍ពិភពលោកបច្ចុប្បន្ន កំពុងក្តៅគគុកខ្លាំងបំផុត។

ព័ត៌មាននេះកើតឡើងចំពេល ប្រមុខរដ្ឋរុស្ស៊ីលោក វ្ល៉ាឌីមៀរ ពូទីន បានចង្អុលចំឈ្មោះ អាមេរិក ថាជាអ្នកបំផ្លាញប្រព័ន្ធសន្តិសុខអន្តរជាតិ បង្កើនហានិភ័យនៃជម្លោះពិភពលោក ហើយព្រមានថា ប្រទេសណាក៏ដោយ ឲ្យតែផ្តល់អាវុធជួយអ៊ុយក្រែនយកមកបាញ់ចូលដីរុស្ស៊ី ទីក្រុងមូស្គូនឹងសងសឹក ដោយវាយប្រហារទីតាំងយោធារបស់ប្រទេសនោះវិញ។

ក្នុងសុន្ទរកថាចេញពីវិមានក្រឹមឡាំង លោកពូទីន គំរាមថា «យើងនឹងកំណត់គោលដៅ នៅពេលយើងធ្វើតេស្តប្រព័ន្ធមីស៊ីលថ្មីបំផុតបន្ថែមទៀត។ នេះគឺដោយសារតែមានការគំរាមកំហែងដល់សន្តិសុខរបស់សហព័ន្ធរុស្ស៊ីមិនចេះឈប់។ យើងជឿជាក់ថា យើងមានសិទ្ធិប្រើប្រាស់អាវុធប្រឆាំងទីតាំងយោធានៃប្រទេសទាំងឡាយណា ដែលអនុញ្ញាតឲ្យប្រើអាវុធរបស់ពួកគេប្រឆាំងនឹងទីតាំងរបស់យើង»។

សុន្ទរកថារបស់លោកពូទីន នោះទៀតសោត កើតឡើងត្រឹមប៉ុន្មានម៉ោងប៉ុណ្ណោះ បន្ទាប់ពីរុស្ស៊ី បាញ់មីស៊ីលអន្តរទ្វីបមួយគ្រាប់ចេញពីតំបន់ Astrakhan វាយប្រហារអ៊ុយក្រែន ហើយនោះគឺជាលើកដំបូង ដែលក្រុងមូស្គូប្រើប្រាស់អាវុធធុនធ្ងន់បែបនេះ នៅក្នុងសង្គ្រាមដែលមានអាយុកាល៣៣ខែ។

តាមការបញ្ជាក់ពីអ៊ុយក្រែន, ការវាយប្រហាររុស្ស៊ី គឺសំដៅលើសហគ្រាសនិងហេដ្ឋារចនាសម្ព័ន្ធសាធារណៈ នៅក្នុងទីក្រុង Dnipro។ យ៉ាងណាមិញ អ៊ុយក្រែន មិនបានបញ្ជាក់ច្បាស់លាស់ពីប្រភេទនៃមីស៊ីលអន្តរទ្វីប និងទំហំខូចខាតពិតប្រាកដនោះទេ៕

អត្ថបទ៖ សុខ សុវណ្ណ

ចុចអាន៖ រុស្ស៊ី គំរាមបាញ់នុយក្លេអ៊ែរ បើទ្រាំលែងបាន