ព័ត៌មានអន្ដរជាតិ

លោក Zelensky៖ អ៊ុយក្រែន រៀបចំអភិវឌ្ឍខែលការពារ ដើម្បីទប់ទល់មីស៊ីលប្រភេទថ្មីរបស់រុស្ស៊ី

បានផុស

៣ ខែ មុន

នៅ

ថ្ងៃសៅរ៍ ២៣ វិច្ឆិកា ២០២៤

ដោយ

Chheang

លោក Volodymyr Zelensky បាននិយាយកាលពីថ្ងៃសុក្រថា អ៊ុយក្រែនកំពុងធ្វើការលើការអភិវឌ្ឍខែលការពារដែនអាកាស ដើម្បីទប់ទល់នឹង «ហានិភ័យថ្មី» បន្ទាប់ពីប្រទេសរុស្ស៊ីបានដាក់ពង្រាយមីស៊ីលរយៈចម្ងាយមធ្យមថ្មីនៅក្នុងសង្រ្គាមដែលមានអាយុកាល ៣៣ខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសុន្ទរកថាវីដេអូពេលយប់ មេដឹកនាំអ៊ុយក្រែន បានលើកឡើងថា ការធ្វើតេស្តអាវុធថ្មីសម្រាប់គោលបំណងភេរវកម្មនៅក្នុងប្រទេសមួយផ្សេងទៀតគឺជា «ឧក្រិដ្ឋកម្មអន្តរជាតិ» ហើយបានចេញការអំពាវនាវថ្មីមួយឲ្យមាន «ការឆ្លើយតបយ៉ាងធ្ងន់ធ្ងរ» ពីទូទាំងពិភពលោក ដើម្បីរារាំងរុស្ស៊ីពីការពង្រីកសង្រ្គាមឲ្យកាន់តែធំ។

លោក Zelensky បានប្រាប់ថា៖ «រដ្ឋមន្ត្រីក្រសួងការពារជាតិអ៊ុយក្រែន កំពុងរៀបចំកិច្ចប្រជុំជាមួយដៃគូរបស់យើងរួចហើយ ទាក់ទងនឹងប្រព័ន្ធការពារដែនអាកាសថ្មី ដែលមានសមត្ថភាពការពារអាយុជីវិតពីហានិភ័យថ្មីៗ។ នៅពេលដែលនរណាម្នាក់ចាប់ផ្តើមប្រើប្រាស់ប្រទេសផ្សេងទៀតមិនត្រឹមតែសម្រាប់ភេរវកម្មប៉ុណ្ណោះទេ ប៉ុន្តែថែមទាំងសម្រាប់ការសាកល្បងមីស៊ីលថ្មីរបស់ពួកគេតាមរយៈអំពើភេរវកម្មនោះ នេះច្បាស់ជាឧក្រិដ្ឋកម្មអន្តរជាតិ»។

លោកបានបន្ថែមថា ពិភពលោកចាំបាច់ត្រូវបង្កើត «ការឆ្លើយតបដ៏ធ្ងន់ធ្ងរមួយ ដើម្បីឲ្យ (ប្រធានាធិបតីរុស្ស៊ី លោក វ្ល៉ាឌីមៀរ) ពូទីន ពិតជាភ័យខ្លាចក្នុងការពង្រីកសង្រ្គាម និងមានអារម្មណ៍ថាមានផលវិបាកពិតប្រាកដនៃសកម្មភាពរបស់គាត់»។

ទន្ទឹមនោះ លោក Zelensky ក៏បានអំពាវនាវឲ្យប្រជាជនអ៊ុយក្រែនមានការប្រុងប្រយ័ត្នចំពោះការវាយប្រហាររបស់រុស្ស៊ីជាបន្តបន្ទាប់។

លោកបានថ្លែងថា៖ «គ្មានវិធីផ្សេងទៀតក្នុងសង្គ្រាមទេ។ យើងត្រូវតែដឹងថា “សមមិត្ត” ពូទីន នឹងបន្តព្យាយាមបំភិតបំភ័យយើង។ នោះហើយជារបៀបដែលគាត់បានកសាងអំណាចរបស់គាត់ទាំងអស់»៕

ដោយ៖ ឈាង

ចុចអាន៖ ពូទីន បញ្ជាឲ្យផលិតមីស៊ីលទ្រង់ទ្រាយធំ ហើយថាគ្មាននរណាលើលោកអាចបញ្ឈប់វាបានឡើយ