កូរ៉េ​ខាង​ត្បូង៖ រុស្ស៊ី​ឲ្យ​មីស៊ីល​ទៅ​កូរ៉េ​ខាង​ជើង ជា​ថ្នូរ​នឹង​ការ​បញ្ជូន​ទ័ព

ទីប្រឹក្សាសន្តិសុខជាតិកូរ៉េខាងត្បូង លោក Shin Won-sik បាននិយាយថា រុស្ស៊ីបានផ្តល់ឲ្យកូរ៉េខាងជើងនូវមីស៊ីលប្រឆាំង​​ដែន​អាកាស និងឧបករណ៍ការពារដែនអាកាស ជាថ្នូរនឹងការបញ្ជូនកងទ័ពទៅគាំទ្រទីក្រុងមូស្គូ ក្នុងសង្គ្រាមប្រឆាំងនឹងអ៊ុយក្រែន។

នៅក្នុងបទសម្ភាសន៍ជាមួយទូរទស្សន៍កូរ៉េខាងត្បូង SBS ដែលចាក់ផ្សាយកាលពីថ្ងៃសុក្រ លោក Shin បាន​ប្រាប់​ថា រុស្ស៊ីបានផ្តល់ការគាំទ្រផ្នែកសេដ្ឋកិច្ច និងបច្ចេកវិទ្យាយោធាដល់កូរ៉េខាងជើង ដោយ​បន្ថែម​ថា៖ «វាពិត​ណាស់​ដែល​​កូរ៉េខាងជើងត្រូវបានផ្តល់ឧបករណ៍ពាក់ព័ន្ធ និងមីស៊ីលប្រឆាំងយន្តហោះ ដើម្បីពង្រឹងប្រព័ន្ធការពារដែនអាកាសដ៏ទន់ខ្សោយរបស់ទីក្រុងព្យុងយ៉ាង»។

លោកបានបន្ត​ថា ទីក្រុងព្យុងយ៉ាងក៏ហាក់ដូចជាត្រូវបានផ្តល់បច្ចេកវិទ្យាយោធាដោយប្រទេសរុស្ស៊ី ដើម្បីគាំទ្រកម្មវិធីផ្កាយរណបរបស់ខ្លួន បន្ទាប់ពីការប៉ុនប៉ងបរាជ័យ​ក្នុងការបាញ់បង្ហោះផ្កាយរណបចារកម្មកាលពីដើមឆ្នាំ​២០២៤។

សមាជិកសភាកូរ៉េខាងត្បូង បាននិយាយនៅសប្តាហ៍នេះថា ទាហានកូរ៉េខាងជើងប្រហែល ១០ ៩០០​នាក់​ត្រូវបានដាក់ពង្រាយទៅកាន់​តំបន់ Kursk ដែលជាផ្នែកមួយនៃអង្គភាពទ័ពអាកាស និង​ជើង​ទឹក​របស់រុស្ស៊ី ដែលប្រឈមមុខនឹងកងកម្លាំងអ៊ុយក្រែន។ កង​ទ័ព​កូរ៉េ​ខាង​ជើង​ទាំង​នោះ​មួយ​ចំនួន បាន​ចូល​រួម​នៅ​ក្នុង​សង្គ្រាម​រួច​ទៅ​ហើយ៕

ដោយ៖ ឈាង