ប្រទះឃើញនាវាផ្ទុកយន្តហោះរបស់ចិន នៅមហាសមុទ្រប៉ាស៊ីហ្វិក ចំពេលបារម្ភផ្ទុះសង្គ្រាមលោកលើកទី៣

វោហាសព្ទអំពីសង្គ្រាមលោកលើកទី៣ កំពុងផ្ទុះលើកឡើងជុំវិញពិភពលោក ដោយសារតែសង្គ្រាមរុស្ស៊ី-អ៊ុយក្រែន ហើយអ្វីដែលគេកំពុងតាមដាន នោះគឺរូបភាពនៃនាវាផ្ទុកយន្តហោះតម្លៃ៩ពាន់លានដុល្លាររបស់ចិន ដែលគេឃើញនៅមហាសមុទ្រប៉ាស៊ីហ្វិក ហាក់ដូចជាការត្រៀមខ្លួនសម្រាប់អ្វីម្យ៉ាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Daily Mail កាលពីថ្ងៃសុក្រទី២២ខែវិច្ឆិកាឆ្នាំ២០២៤ ផ្កាយរណប Landsat 8 របស់អង្គការណាសា បានថតជាប់នាវាផ្ទុកយន្តហោះ CNS Liaoning ចតនៅសមុទ្រ Bohai។

មិនត្រឹមប៉ុណ្ណឹង វិទ្យាស្ថានកងទ័ពជើងទឹកសហរដ្ឋអាមេរិក ក៏និយាយដែរថា ទាហានជើងទឹករបស់កងទ័ពរំដោះប្រជាជនចិន ក៏ដាក់ពង្រាយនាវាផ្ទុកយន្តហោះ CNS Shandong កាលពីសប្តាហ៍មុនដែរ ដោយបានបើកចូលទៅក្នុងសមុទ្រចិនខាងត្បូង ស្ថិតនៅចម្ងាយប្រហែល៦៣០គីឡូម៉ែត្រពីភាគខាងត្បូងកោះ Miyako របស់ប្រទេសជប៉ុន។

រូបថតផ្កាយរណបនេះ ត្រូវបានបញ្ចេញត្រឹមប៉ុន្មានថ្ងៃប៉ុណ្ណោះ បន្ទាប់ពីរដ្ឋបាលលោក ចូ បៃដិន បើកភ្លើងខៀវឲ្យអ៊ុយក្រែន ប្រើអាវុធអាមេរិក វាយប្រហារចូលដីរុស្ស៊ី ធ្វើឲ្យសង្គ្រាមកាន់តែរីកធំ។

ពាក់ព័ន្ធរឿងនេះ សូម្បីរុស្ស៊ីក៏ព្រមានដែរថា ពិភពលោក កំពុងស្ថិតនៅលើផ្លូវឆ្ពោះទៅរកសង្គ្រាមលោកលើកទី៣ហើយដោយសារការគាំទ្រជាបន្តបន្ទាប់របស់អាមេរិក បារាំង និងអង់គ្លេស លើអ៊ុយក្រែន។

ឯកអគ្គរដ្ឋទូតរុស្ស៊ីប្រចាំចក្រភពអង់គ្លេសលោក Andrey Kelin បានថ្លែងប្រាប់ SKY NEWS កាលពីថ្ងៃសៅរ៍ទី២៣ខែវិច្ឆិកាឆ្នាំ២០២៤ ថា រុស្ស៊ីកំពុងឈរលើផ្លូវផ្ទុះសង្គ្រាមជាមួយមហាអំណាចនុយក្លេអ៊ែរ។ ពេលនេះ ចក្រភពអង់គ្លេសបាន ចូលរួមដោយផ្ទាល់នៅក្នុងសង្គ្រាមនៅអ៊ុយក្រែន ក្រោយមីស៊ីល Storm Shadow របស់ខ្លួន វាយប្រហារគោលដៅនៅក្នុងប្រទេសរុស្ស៊ី។

លោកសង្កត់ធ្ងន់ថា «ជាការពិត ចក្រភពអង់គ្លេស បានចូលរួមដោយផ្ទាល់នៅក្នុងសង្រ្គាមនេះ ព្រោះថា អ៊ុយក្រែន មិនអាចបាញ់មីស៊ីលនេះបានឡើយ បើគ្មានណាតូ ឬបុគ្គលិកអង់គ្លេស ហើយសហរដ្ឋអាមេរិក ក៏អ៊ីចឹងដែរ ពួកគេបានសម្រេចចិត្តបើកការវាយប្រហារទាំងនេះ ដោយធ្វើឲ្យស្ថានការណ៍កាន់តែធ្ងន់ធ្ងរ ហើយវាអាចឈានដល់ប៉ះទង្គិចគ្នារវាងមហាអំណាចនុយក្លេអ៊ែរ»៕

អត្ថបទ៖ សុខ សុវណ្ណ