ព័ត៌មានអន្ដរជាតិ

រុស្ស៊ី ចាប់បានអតីតទ័ពអង់គ្លេស ដែលស៊ីឈ្នួលប្រយុទ្ធឲ្យអ៊ុយក្រែន

បានផុស

២ ខែ មុន

នៅ

ថ្ងៃចន្ទ ២៥ វិច្ឆិកា ២០២៤

ដោយ

តាមការចុះផ្សាយរបស់ BBC នៅថ្ងៃចន្ទទី២៥ខែវិច្ឆិកាឆ្នាំ២០២៥, រុស្ស៊ីចាប់បានជនជាតិអង់គ្លេសម្នាក់ ដែលជាទាហានស៊ីឈ្មួលចូលប្រយុទ្ធឲ្យអ៊ុយក្រែននៅតំបន់សមរភូមិ Kursk របស់រុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសម្នាក់នេះមានឈ្មោះ James Scott Rhys Anderson វ័យ២២ឆ្នាំ ធ្លាប់បម្រើការនៅក្នុងកងទ័ពអង់គ្លេសពីឆ្នាំ២០១៩ដល់ឆ្នាំ២០២៣។

ក្នុងវីដេអូសួរចម្លើយដែលបង្ហោះលើប្រព័ន្ធផ្សព្វផ្សាយរុស្ស៊ី លោក Anderson សារភាពថា ដោយសារបញ្ហាហិរញ្ញវត្ថុ គាត់ក៏សម្រេចចិត្តចូលរួមជាមួយកងពលអន្តរជាតិអ៊ុយក្រែន ដែលជាអង្គភាពយោធាបង្កើតឡើងដោយអ្នកស្ម័គ្រចិត្តបរទេស បន្ទាប់ពីគាត់បាត់បង់ការងារនិងមើលព័ត៌មានអំពីសង្គ្រាមនៅអ៊ុយក្រែន។

គាត់និយាយថា មុនចូលអ៊ុយក្រែន គាត់បានហោះចេញពីទីក្រុង Luton នៃប្រទេសអង់គ្លេស ទៅទីក្រុង Krakow នៃប្រទេសប៉ូឡូញសិន រួចទើបធ្វើដំណើរតាមរថយន្តក្រុងទៅកាន់តំបន់ Medyka នៅព្រំដែនអ៊ុយក្រែន។

ទោះបីជាយ៉ាងណាក៏ដោយ ក្រសួងការពារជាតិអង់គ្លេស បានបដិសេធធ្វើអត្ថាធិប្បាយលើការចាប់ខ្លួនអតីតទាហានរូបនេះ ខណៈក្រសួងការបរទេសនិយាយថា ខ្លួនកំពុងគាំទ្រដល់ក្រុមគ្រួសាររបស់បុរសជនជាតិអង់គ្លេស បន្ទាប់ពីមានរបាយការណ៍អំពីការឃុំខ្លួនគាត់។

សូមបញ្ជាក់ថា អ៊ុយក្រែនបានបើកការវាយប្រហារដ៏គួរឲ្យភ្ញាក់ផ្អើលមួយចូលក្នុងតំបន់ Kursk នៅថ្ងៃទី ៦ ខែសីហា ដោយបុកឆ្ពោះទៅមុខចម្ងាយ២៩គីឡូម៉ែត្រ និងបានគ្រប់គ្រងលើទឹកដីរុស្ស៊ីប្រមាណ ១០០០ គីឡូម៉ែត្រការ៉េ។

យ៉ាងណា រុស្ស៊ីក៏បញ្ជូនទ័ពប្រហែល ៥០ ០០០ នាក់ទៅកាន់តំបន់នោះដែរ ហើយបានដណ្តើមយកទឹកដីមកវិញ ក្នុងការប្រយុទ្ធគ្នាដ៏ខ្លាំងក្លា៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន៖ ទាហានកូរ៉េខាងជើង ស្លាប់៥០០នាក់ ពេលក្រុងកៀវប្រើមីស៊ីលអង់គ្លេសបាញ់រុស្ស៊ី