ប្រាសាទកោះកេរ ជាទីតាំងតែមួយគត់នៅអាស៊ីអាគ្នេយ៍ ក្នុងបញ្ជីកន្លែងអ្នកទេសចរមិនត្រូវរំលង របស់ Fodor’s Travel

ប្រាសាទកោះកេររបស់កម្ពុជា បានក្លាយជាទីតាំងតែមួយគត់នៅតំបន់អាស៊ីអាគ្នេយ៍ ដែលជាប់ក្នុងបញ្ជីកន្លែងដែលអ្នកទេសចរត្រូវតែទៅលេងកម្សាន្តទាំង២៥ក្នុងឆ្នាំ២០២៥ របស់ទស្សនាវដ្តី Fodor’s Travel។

បើនិយាយពីទ្វីបអាស៊ីទាំងមូលក្នុងបញ្ជីនោះ នៅមានទីតាំង២ទៀតដែល Fodor’s Travel​ ដាក់ជាកន្លែងអ្នកទេសចរមិនត្រូវរំលង។ មួយគឺរដ្ឋ Meghalaya នៃប្រទេសឥណ្ឌា និងមួយទៀតគឺទីក្រុង Nikko នៃប្រទេសជប៉ុន។

ចំណែកនៅអឺរ៉ុបឯណោះក៏មាន៥ទីតាំងដែរ ដូចជាតំបន់ Camargue ប្រទេសបារាំង, ទីក្រុង Helsinki ប្រទេសហ្វាំងឡង់, ថ្ម Meteora ប្រទេសក្រិក, ស្រុក Masurian Lake ប្រទេសប៉ូឡូញ និងប្រជុំកោះ Vestmannaeyjar នៅប្រទេសអ៊ីស្លង់។

រមណីយដ្ឋានប្រាសាទកោះកេរ ស្ថិតក្នុងស្រុកគូលែន ខេត្តព្រះវិហារ ត្រូវបានចុះបញ្ជីជា បេតិកភណ្ឌពិភពលោក កាលពីថ្ងៃទី១៧ ខែកញ្ញា ឆ្នាំ២០២៣ តាមរយៈសេចក្តីសម្រេចលេខ 45 COM 8B.8 នៅក្នុងសម័យប្រជុំលើកទី៤៥ របស់គណៈកម្មាធិការបេតិកភណ្ឌពិភពលោក នាទីក្រុងរីយ៉ាដ ប្រទេសអារ៉ាប៊ីសាអូឌីត។

កោះកេរ គឺជា រាជធានីខ្មែរបុរាណតែមួយគត់ដែលមានឈ្មោះជាភាសារខ្មែរបុរាណផងហៅថា «ឆោកគ៌គ្យរ» និងឈ្មោះជាភាសាសំស្រ្កឹតផងថា «លិង្ហបុរ»។

បច្ចុប្បន្ន រមណីយដ្ឋានប្រាសាទកោះកេរ មានបុរាណដ្ឋានសរុប ១៦៩ ដោយក្នុងនោះមានប្រាសាទចំនួន៧៦ និងទីតាំង បុរាណវិទ្យាជាច្រើនទៀតដូចជា ទីតាំងមនុស្សរស់នៅ ហេដ្ឋា រចនាសម្ព័ន្ធផ្លូវថ្នល់និងធារាសាស្ត្រ ពិសេសមានសិលាចារឹក បដិមាធំៗប្រកបដោយកាយវិការរស់រវើក ស្ថិតនៅក្នុងតំបន់ការពារកំណត់ដោយព្រះរាជក្រឹត្យឆ្នាំ២០០៤ និងក្រោយមកបានកែសម្រួលនៅឆ្នាំ២០២០មានទំហំសរុប៨៧៩ហិកតា ៤៣អា ដោយមានបែងចែកជា៣តំបន់ការពារ៕

អត្ថបទ៖ សុខ សុវណ្ណ

ចុចអាន៖ អាជ្ញាធរជាតិព្រះវិហាររៀបចំពិធីអបអរសាទរខួប១ឆ្នាំនៃការចុះរមណីយដ្ឋានប្រាសាទកោះកេរក្នុងបញ្ជីបេតិកភណ្ឌពិភពលោក