ព័ត៌មានអន្ដរជាតិ

ចិន បញ្ចេញប្រតិកម្ម ក្រោយលោក ត្រាំ គំរាមដំឡើងពន្ធ

បានផុស

៣ ខែ មុន

នៅ

ថ្ងៃអង្គារ ២៦ វិច្ឆិកា ២០២៤

ដោយ

Chheang

ស្ថានទូតចិនប្រចាំសហរដ្ឋអាមេរិក បានលើកឡើងកាលពីថ្ងៃទី២៥ខែវិច្ឆិកាថា រវាងក្រុងប៉េកាំង ឬក្រុងវ៉ាស៊ីនតោន នឹងគ្មាននរណាម្នាក់ទេ ដែលឈ្នះលើសង្គ្រាមពាណិជ្ជកម្ម។ ការលើកឡើងនេះ ធ្វើឡើងបន្ទាប់ពីលោក ដូណាល់ ត្រាំ បានគំរាមដំឡើងពន្ធបន្ថែមចំនួន ១០% លើគ្រប់ទំនិញទាំងអស់របស់ចិន នៅពេលលោកឡើងកាន់តំណែងផ្លូវការជាប្រធានាធិបតីនាខែមករាឆ្នាំ២០២៥ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Liu Pengyu អ្នកនាំពាក្យស្ថានទូតចិន បាននិយាយថា៖ «ទាក់ទិននឹងបញ្ហាពន្ធអាមេរិកលើចិន ចិនជឿថា កិច្ចសហប្រតិបត្តិការពាណិជ្ជកម្ម និងសេដ្ឋកិច្ចរវាងចិន-អាមេរិក នៅតែផ្ដល់ផលប្រយោជន៍ឲ្យគ្នាទៅវិញទៅមកដដែល។ គ្មាននរណាម្នាក់នឹងឈ្នះសង្គ្រាមពាណិជ្ជកម្ម ឬក៏សង្គ្រាមពន្ធនោះទេ»។

លោក ត្រាំ បានប្រាប់ថា លោកនឹងអនុវត្តការដំឡើងពន្ធ លុះត្រាណាតែចិនអាចបញ្ឈប់លំហូរនៃគ្រឿងញៀន ជាពិសេសសារធាតុញៀនហ្វេតានីល ចូលក្នុងទឹកដីអាមេរិក។

នៅក្នុងសេចក្ដីថ្លែងការណ៍របស់ខ្លួន លោក Pengyu បានឆ្លើយតបថា ចិនបានចាត់វិធានការប្រយុទ្ធប្រឆាំងនឹងការជួញដូរគ្រឿងញៀន តាំងពីកិច្ចព្រមព្រៀងនៅក្នុងឆ្នាំ២០២៣មកម៉្លេះ រវាងប្រធានាធិបតីជិតផុតអាណត្តិលោក ចូ បៃដិន និងមេដឹកនាំចិនលោក ស៊ី ជីនពីង។

លោក បន្តថា ភាគីចិនបានជូនដំណឹងដល់ភាគីអាមេរិក អំពីវឌ្ឍនភាពក្នុងប្រតិបត្តិការអនុវត្តច្បាប់ ដែលពាក់ព័ន្ធនឹងសហរដ្ឋអាមេរិកប្រឆាំងនឹងគ្រឿងញៀន។ ចិន បានឆ្លើយតបទៅនឹងសំណើរបស់អាមេរិក សម្រាប់ការផ្ទៀងផ្ទាត់តម្រុយលើករណីមួយចំនួន និងបានចាត់វិធានការ។ ទាំងអស់នេះបញ្ជាក់ថា រឿងដែលថាចិនមានចេតនាអនុញ្ញាតឲ្យមានសារធាតុញៀនហ្វេតានីល ហូរចូលទៅក្នុងសហរដ្ឋអាមេរិក គឺផ្ទុយពីការពិតទាំងស្រុង៕

ដោយ៖ ឈាង

ចុចអាន៖ លោក ត្រាំ គំរាមដំឡើងពន្ធលើប្រទេសចំនួន៣ ពេលឡើងកាន់តំណែង