ព័ត៌មានអន្ដរជាតិ

បៃដិនប្រឹងប្រែងចុងក្រោយ ស្នើសភាអនុម័តជំនួយយោធាតម្លៃ២៤ពាន់លានដុល្លារដល់អ៊ុយក្រែន

បានផុស

៤ ខែ មុន

នៅ

ថ្ងៃពុធ ២៧ វិច្ឆិកា ២០២៤

ដោយ

ក្នុងកិច្ចខិតខំចុងក្រោយក្នុងការជួយអ៊ុយក្រែន លោក ចូ បៃដិន ប្រធានាធិបតីជិតផុតអាណត្តិរបស់សហរដ្ឋអាមេរិក បានស្នើរដ្ឋសភាសហរដ្ឋអាមេរិកអនុម័តមូលនិធិបន្ថែមដែលមានតម្លៃ២៤ពាន់លានដុល្លារ ដើម្បីគាំទ្រវិស័យការពារជាតិដល់អ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមកញ្ចប់ទឹកប្រាក់២៤ពាន់លានដុល្លារនោះ ទឹកប្រាក់តម្លៃ១៦ពាន់លានដុល្លារនឹងត្រូវប្រើប្រាស់សម្រាប់ការបំពេញឃ្លាំងអាវុធរបស់ក្រសួងការពារជាតិអាមេរិក ហើយទឹកប្រាក់៨ពាន់លានផ្សេងទៀតនឹងត្រូវបានប្រើប្រាស់បែងចែកដោយផ្ទាល់សម្រាប់ជំនួយយោធាដល់ប្រទេសអ៊ុយក្រែន។

រហូតដល់ថ្ងៃទី២៧ខែវិច្ឆិកានេះ មានរយៈពេល១០ថ្ងៃគត់ ដែលលោក ចូ បៃដិន បានអនុញ្ញាតឱ្យអ៊ុយក្រែនប្រើប្រាស់ប្រព័ន្ធមីស៊ីលរយៈចម្ងាយឆ្ងាយ ATACMS បាញ់ចូលទឹកដីរុស្ស៊ី បន្ទាប់ពីភាគីរុស្ស៊ីបានដាក់ការគាបសង្កត់យ៉ាងខ្លាំងលើសង្គ្រាមនៅអ៊ុយក្រែន ក្រោយលោក ដូណាល់ ត្រាំ ឈ្នះឆ្នោតកាលថ្ងៃទី៥ខែវិច្ឆិកា។

ក្រោយការអនុញ្ញាតរបស់មហាអំណាចសហរដ្ឋអាមេរិក មហាអំណាចអង់គ្លេស បារាំង ក៏បានអនុញ្ញាតឱ្យអ៊ុយក្រែនប្រើប្រាស់មីស៊ីលរយៈចម្ងាយឆ្ងាយរបស់ពួកគេរៀងៗខ្លួន ដើម្បីបាញ់ចូលទឹកដីរុស្ស៊ីដូចគ្នាដែរ។ ជាការឆ្លើយតប រុស្ស៊ីបានប្រើប្រាស់មីស៊ីល Oreshnik ដែលគេទទួលស្គាល់ថា ជាប្រភេទមីស៊ីលមានល្បឿនលឿនជាងសំឡេងរហូត១០ដង ដែលពិបាកស្ទាក់ចាប់ បាញ់ចូលទៅក្នុងអ៊ុយក្រែន ដោយបំផ្លាញរោងចក្រផលិតសម្ភារៈយោធា Pivdenmash របស់នៅ ទីក្រុង Dnipro ភាគកណ្តាលប្រទេសអ៊ុយក្រែន៕

ដោយ រ៉ាន់ រើយ