ពូទីន ព្រមានឲ្យ ត្រាំ ប្រយ័ត្នខ្លួន

ក្នុងសន្និសីទសារព័ត៌មានក្រោយកិច្ចប្រជុំកំពូលនៃអង្គការសន្ធិសញ្ញាសន្តិសុខសមូហភាព (CSTO) នៅប្រទេសកាហ្សាក់ស្ថានកាលពីថ្ងៃព្រហស្បតិ៍ទី២៨ខែវិច្ឆិកាឆ្នាំ២០២៤ មេដឹកនាំរុស្ស៊ី បានព្រមានឲ្យប្រធានាធិបតីជាប់ឆ្នោតអាមេរិក ដូណាល់ ត្រាំ ត្រូវប្រយ័ត្នខ្លួនឲ្យមែនទែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងចេញពីទីក្រុងអាស្តាណា, លោក វ្ល៉ាឌីមៀរ ពូទីន ព្រមានថា «ហេតុការណ៍ភ្ញាក់ផ្អើលជាច្រើនបានស្តែងចេញអំឡុងយុទ្ធនាការឃោសនារកសំឡេងឆ្នោតរបស់លោក ត្រាំ។ ក្នុងនោះរួមមានវិធីសាស្រ្តដែលគេប្រើដើម្បីប្រឆាំងលោកត្រាំ បូករួមទាំងការប៉ុនប៉ងធ្វើឃាតម្តងហើយម្តងទៀតផងដែរ។ តាមគំនិតខ្ញុំ គាត់គ្មានសុវត្ថិភាពទេពេលនេះ ព្រោះមានហេតុការណ៍ជាច្រើន បានកើតឡើងនៅក្នុងប្រវត្តិសាស្រ្តអាមេរិក»។

យ៉ាងណាក្តី ប្រធានាធិបតីរុស្ស៊ី ក៏សរសើរលោក ត្រាំ ផងដែរថាជាអ្នកនយោបាយឆ្លាតវៃនិងពោរពេញដោយបទពិសោធ ហើយលោក ពូទីន រំពឹងថា ប្រធានាធីបតីជាប់ឆ្នោតអាមេរិក នឹងប្រយ័ត្នខ្លួនហើយយល់អំពីបញ្ហាទាំងនេះ។

រម្លឹកទៅខែកក្កដា កាលនោះ លោកត្រាំបានរួចផុតពីការធ្វើឃាតក្នុងយុទ្ធនាការឃោសនាបោះឆ្នោតនៅទីក្រុង Butler នៃរដ្ឋ Pennsylvania។ ឃាតករបានលបបាញ់លោក ត្រាំ នៅចម្ងាយ១៥០ម៉ែត្រ ប៉ុន្តែអាយុថ្លៃ លោក ត្រាំ បានរួចជីវិត ដោយគ្រាប់កាំភ្លើងហោះមកចំស្លឹកត្រចៀក ដោយបណ្តាលឲ្យគាត់ត្រឹមរងរបួសប៉ុណ្ណោះ។

មកដល់ខែកញ្ញា អ្នកសាធារណរដ្ឋរូបនេះ ត្រូវគេប៉ុនប៉ងធ្វើឃាតជាថ្មី នៅឯទីលានវាយកូនហ្គោលរបស់លោក ក្នុងរដ្ឋ Florida ដោយឃាតករពួនក្នុងព្រៃរង់ចាំវាយប្រហារ ប៉ុន្តែត្រូវសេវាសម្ងាត់ ទប់ស្កាត់ទាន់ពេល៕

អត្ថបទ៖ សុខ សុវណ្ណ

ចុចអាន៖ មន្ត្រីច្រើនរូបក្នុងរដ្ឋបាលថ្មីរបស់លោក ត្រាំ រងការគំរាមបំផ្ទុះគ្រាប់បែក