ព័ត៌មានអន្ដរជាតិ

ទោះមានបទឈប់បាញ់ យោធាអ៊ីស្រាអែលរារាំងប្រជាជនលីបង់មិនឱ្យចូលភូមិវិញ

បានផុស

២ ខែ មុន

នៅ

ថ្ងៃសុក្រ ២៩ វិច្ឆិកា ២០២៤

ដោយ

ខណៈដែលប្រជាជនលីបង់ដែលរត់ភៀសសឹកពីភាគខាងត្បូងប្រទេស បានវិលទៅកាន់ភូមិឋានរបស់ខ្លួនវិញក្រោយមានបទឈប់បាញ់រវាងអ៊ីស្រាអែលនិងហេសបូឡានៅលីបង់ដែលចូលជាធរមានកាលពីថ្ងៃទី២៧ខែវិច្ឆិកា ក្រោយកិច្ចខិតខំប្រឹងប្រែងរបស់សហរដ្ឋអាមេរិក និងបារាំង យោធាអ៊ីស្រាអែលនៅតែរារាំងប្រជាជនចូលទៅកាន់ភូមិប្រមាណ៦០ដែលស្ថិតនៅមានការសង្ស័យ។

អ្នកនាំពាក្យយោធាអ៊ីស្រាអែល លោក Avichay Adraee។ WSJ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានរ៉យទ័រ បានដកស្រង់ការបង្ហោះសាររបស់ អ្នកនាំពាក្យយោធាអ៊ីស្រាអែល លោក Avichay Adraee តាមបណ្តាញសង្គម X នៅថ្ងៃសុក្រនេះ ដោយលើកឡើងថា អ្នកស្រុកលីបង់ត្រូវបានហាមឃាត់មិនឱ្យធ្វើដំណើរទៅភាគខាងត្បូងទៅកាន់ភូមិមួយ និងតំបន់ជុំវិញរបស់ពួកគេ រហូតដល់មានការជូនដំណឹងបន្ថែម។

យោធាអ៊ីស្រាអែល បាននិយាយថា ខ្លួនបានបើកការបាញ់ប្រហារកាលពីថ្ងៃព្រហស្បតិ៍ ឆ្ពោះទៅរកអ្វីដែលខ្លួនហៅថា «ជនសង្ស័យ» ជាមួយនឹងរថយន្តដែលមកដល់តំបន់ជាច្រើននៅក្នុងតំបន់ភាគខាងត្បូង ដោយនិយាយថា វាជាការរំលោភលើបទឈប់បាញ់ជាមួយក្រុមប្រដាប់អាវុធហេសបូឡាដែលគាំទ្រដោយអ៊ីរ៉ង់។

សមាជិកសភាហេសបូឡា លោក Hassan Fadlallah បានចោទប្រកាន់អ៊ីស្រាអែលថាបានរំលោភលើកិច្ចព្រមព្រៀងនេះ។

លោក Fadlallah បានប្រាប់អ្នកយកព័ត៌មានថា៖«សត្រូវរបស់អ៊ីស្រាអែលកំពុងវាយប្រហារអ្នកដែលត្រឡប់ទៅកាន់ភូមិឋាននៅតាមព្រំដែន» ដោយបន្ថែមថា៖«មានការរំលោភនៅថ្ងៃនេះ ដោយអ៊ីស្រាអែល សូម្បីក្នុងទម្រង់នេះក៏ដោយ»។

កាលពីថ្ងៃព្រហស្បតិ៍ យោធាអ៊ីស្រាអែលក៏បានលើកឡើងផងដែរថា កងកម្លាំងអាកាសរបស់ខ្លួនបានវាយប្រហារទីតាំងដែលប្រើប្រាស់ដោយក្រុមហេសបូឡា ដើម្បីរក្សាទុកគ្រាប់រ៉ុក្កែតរយៈចម្ងាយមធ្យមនៅភាគខាងត្បូងប្រទេសលីបង់ ដែលជាការវាយប្រហារលើកដំបូងចាប់តាំងពីបទឈប់បាញ់ចូលជាធរមាននៅព្រឹកថ្ងៃពុធសប្តាហ៍នេះ។

នៅក្នុងការបង្ហោះនាពេលថ្មីៗនេះ លោក Adraee បានអំពាវនាវដល់អ្នកស្រុកលីបង់កុំឱ្យត្រឡប់ទៅភូមិភាគខាងត្បូងជាង៦០ដោយនិយាយថា អ្នកណាម្នាក់ដែលផ្លាស់ទីទៅភាគខាងត្បូងនៃខ្សែបន្ទាត់ដែលបានបញ្ជាក់ «ធ្វើឱ្យខ្លួនឯងមានគ្រោះថ្នាក់»។

កងទ័ពលីបង់មុននេះ បានចោទប្រកាន់អ៊ីស្រាអែលថាបានរំលោភលើបទឈប់បាញ់ជាច្រើនដងកាលពីថ្ងៃពុធ និងថ្ងៃព្រហស្បតិ៍។

ការចោទប្រកាន់គ្នាទៅវិញទៅមកនេះបានគូសបញ្ជាក់ពីភាពផុយស្រួយនៃបទឈប់បាញ់ដែលត្រូវបានសម្របសម្រួលដោយសហរដ្ឋអាមេរិក និងបារាំងដើម្បីបញ្ចប់ជម្លោះ ដោយបានប្រយុទ្ធស្របគ្នាជាមួយនឹងសង្គ្រាមហ្គាហ្សា។ បទឈប់បាញ់នេះមានរយៈពេល៦០ថ្ងៃក្នុងក្តីសង្ឃឹមឈានដល់ការបញ្ឈប់អរិភាពជាអចិន្ត្រៃយ៍៕

ដោយ រ៉ាន់ រើយ