ព័ត៌មានអន្ដរជាតិ

ថៃព្រមានពីភ្លៀងធ្លាក់ខ្លាំងថែមទៀត ខណៈអ្នកស្លាប់ព្រោះទឹកជំនន់កើនដល់ ២២នាក់

បានផុស

៤ ខែ មុន

នៅ

ថ្ងៃចន្ទ ២ ធ្នូ ២០២៤

ដោយ

Chheang

តួលេខអ្នកស្លាប់ បន្ទាប់ពីគ្រោះទឹកជំនន់វាយប្រហារភាគខាងត្បូងប្រទេសថៃ បានកើនឡើងដល់ ២២នាក់ ព្រមទាំងមានការជម្លៀសខ្លួនពលរដ្ឋប្រមាណ ២២ ០០០នាក់ទៅកាន់កន្លែងសុវត្ថិភាព ខណៈអាជ្ញាធរបានព្រមានថានឹងមានភ្លៀ់ងធ្លាក់ខ្លាំងបន្ថែមទៀតនារយៈពេលប៉ុន្មានថ្ងៃខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមរបាយការណ៍របស់នាយកដ្ឋានបង្ការ និងកាត់បន្ថយគ្រោះមហន្តរាយ គ្រោះទឹកជំនន់និងភ្លៀងធ្លាក់ខ្លាំង ដែលកើតឡើងចាប់តាំងពីថ្ងៃទី២២ខែវិច្ឆិកាក្នុងខេត្តមួយចំនួននៅភាគខាងត្បូងប្រទេសថៃ បានប៉ះពាល់ដល់ប្រជាជនចំនួន ៦៦៤ ១៧០គ្រួសារ។

នាយកដ្ឋានឧតុនិយម បានឲ្យដឹងថា ភ្លៀងបានធូរស្រាលក្នុងរយៈពេលពីរបីថ្ងៃកន្លងមកនេះ ប៉ុន្តែបើតាមការព្យាករ ភ្លៀងធ្លាក់ខ្លាំងអាចវាយប្រហារម្ដងទៀត ដោយសារតែប្រព័ន្ធសម្ពាធទាបពីសមុទ្រចិនខាងត្បូង ដែលរំពឹងថានឹងឆ្លងកាត់ឈូងសមុទ្រថៃ។ ប្រព័ន្ធអាកាសធាតុបែបនេះ អាចបង្កឲ្យមានភ្លៀងធ្លាក់ខ្លាំង និងទឹកជំនន់ភ្លាមៗ ចាប់ពីថ្ងៃទី៣ដល់ថ្ងៃទី៥ខែធ្នូ។

អ្នកនាំពាក្យរដ្ឋាភិបាលលោក Jirayu Houngsub បាននិយាយថា នាយករដ្ឋមន្ត្រីថៃលោកស្រី Paetongtarn Shinawatra បានបញ្ជាឲ្យមន្ត្រីពន្លឿនវិធានការសង្គ្រោះ និងការស្តារឡើងវិញ។ ជំនួយហិរញ្ញវត្ថុ នឹងត្រូវផ្ដល់ឲ្យក្រុមគ្រួសារដែលរងផលប៉ះពាល់នីមួយៗ ហើយធនាគាររដ្ឋ នឹងផ្តល់កម្ចីការប្រាក់ទាបសម្រាប់អាជីវកម្ម ដើម្បីស្តារឡើងវិញពីការខាតបង់៕

ដោយ៖ ឈាង