មនុស្សច្រើនបំផុតស្លាប់ក្នុងការប្រយុទ្ធគ្នារវាងយោធានិងបាតុករមីយ៉ាន់ម៉ា ម្សិលមិញ

ក្រុមសកម្មជននិយាយថា បាតុករចំនួន៣៨នាក់ ត្រូវបានសម្លាប់ក្នុងថ្ងៃបង្ហូរឈាមខ្លាំងបំផុតមួយនៅប្រទេសមីយ៉ាន់ម៉ា ចាប់តាំងពីយោធាបានផ្តួលរំលំរដ្ឋាភិបាល។

កងកម្លាំងសន្តិសុខបានបើកការបាញ់ប្រហារនៅក្នុងតំបន់មួយនៃទីក្រុង យ៉ាំងហ្គោន ដោយក្រុមបាតុករបានប្រើដំបងនិងកាំបិត។

យោធាបានប្រកាសច្បាប់អាជ្ញាសឹកនៅក្នុងតំបន់នោះ បន្ទាប់ពីអាជីវកម្មចិនត្រូវរងការវាយប្រហារព្រោះក្រុមអ្នកតវ៉ាជឿថា ចិនកំពុងផ្តល់ការគាំទ្រដល់យោធាមីយ៉ាន់ម៉ា។

មនុស្សយ៉ាងតិច២១នាក់ ត្រូវបានគេរាយការណ៍ថា ស្លាប់នៅក្នុងទីក្រុងយ៉ាំងហ្គោនកាលពីថ្ងៃអាទិត្យ។ ការស្លាប់និងរបួសបន្ថែមទៀត ត្រូវបានរាយការណ៍នៅកន្លែងផ្សេងៗក្នុងប្រទេស។ ក្រុមតាមដាន ជំនួយសម្រាប់អ្នកទោសនយោបាយ (AAPP) បាននិយាយថា ចំនួនអ្នកស្លាប់ក្នុងថ្ងៃនោះគឺយ៉ាងតិច៣៨នាក់។

ក្រុមបុគ្គលិកពេទ្យបាននិយាយថា ចំនួនមនុស្សដែលត្រូវបានសម្លាប់ក្នុងតំបន់ Hlaing Tharyar នៃទីក្រុង យ៉ាំងហ្គោន ទំនងជានឹងកើនឡើងព្រោះមានមនុស្សរាប់សិបនាក់ ត្រូវរងរបួសដោយគ្រាប់កាំភ្លើង។

យោធាបានប្រកាសច្បាប់អាជ្ញាសឹកនៅតំបន់ Hlaing Tharyar និង Shwepyitha បន្ទាប់ពីប្រទេសចិននិយាយថា រោងចក្រចិននៅក្នុងតំបន់នោះត្រូវបានកំណត់គោលដៅនិងទាមទារការការពារ។

យោងតាម AAPP បានឲ្យដឹងថា សរុប បាតុករជាង១២០នាក់ ត្រូវបានសម្លាប់អំឡុងការបង្ក្រាប៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ ១២​ស្លាប់​​នៅ​​មីយ៉ាន់ម៉ា​​ម្សិល​​មិញ​មាន​​ទាំង​​ក្មេង​ និង​​ព្រះ​​សង្ឃ

ចុចអាន៖ ប៉ូលិសមីយ៉ាន់ម៉ាបន្តសម្រុកទៅប្រទេសឥណ្ឌាច្រើនឡើងៗ