ព័ត៌មានអន្ដរជាតិ

បក្សប្រឆាំងនៅកូរ៉េខាងត្បូង ទាមទារឲ្យលោក Yoon ចុះចេញពីតំណែង ជុំវិញរឿងប្រកាសច្បាប់អាជ្ញាសឹក

បានផុស

៣ ខែ មុន

នៅ

ថ្ងៃពុធ ៤ ធ្នូ ២០២៤

ដោយ

Chheang

គណបក្សប្រឆាំងធំបំផុតរបស់កូរ៉េខាងត្បូង នៅថ្ងៃពុធនេះបានជំរុញឲ្យលោកប្រធានាធិបតី Yoon Suk Yeol លាលែងពីតំណែងភ្លាមៗ បើមិនដូច្នោះ លោកនឹងប្រឈមមុខនឹងការចោទប្រកាន់។ ការប្រកាសរបស់បក្សប្រឆាំង ធ្វើឡើងប៉ុន្មានម៉ោងបន្ទាប់ពីលោក Yoon បានប្រកាសច្បាប់អាជ្ញាសឹកយ៉ាងបន្ទាន់មួយ ដែលបង្កភាពចលាចលនៅកូរ៉េខាងត្បូង។ យ៉ាងណា ច្បាប់អាជ្ញាសឹកនេះ ត្រូវបានដកចេញវិញ ក្រោយពេលសមាជិកសភាបោះឆ្នោតប្រឆាំងនឹងលោក Yoon។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណបក្សប្រជាធិបតេយ្យ ដែលជាបក្សប្រឆាំង និងជាបក្សមានសម្លេងភាគច្រើននៅក្នុងសភា បានប្រកាសថា សមាជិកសភារបស់ខ្លួនបានសម្រេចចិត្តអំពាវនាវឲ្យលោក Yoon លាលែងពីតំណែងភ្លាមៗ ឬពួកគេនឹងចាត់វិធានការ ដើម្បីចោទប្រកាន់គាត់។

សារបក្សប្រឆាំង បានលើកឡើងថា៖ «ការប្រកាសច្បាប់អាជ្ញាសឹករបស់ប្រធានាធិបតី Yoon Suk Yeol គឺជាការបំពានយ៉ាងច្បាស់លើរដ្ឋធម្មនុញ្ញ។ ការប្រកាសច្បាប់អាជ្ញាសឹករបស់គាត់គឺគ្មានសុពលភាពពីដើមឡើយ ហើយជាការរំលោភយ៉ាងធ្ងន់ធ្ងរលើរដ្ឋធម្មនុញ្ញ។ វាគឺជាទង្វើដ៏ធ្ងន់ធ្ងរនៃការបះបោរ និងផ្ដល់ជាហេតុផលដ៏ល្អបំផុតសម្រាប់ការចោទប្រកាន់លើរូបគាត់»។

ការចោទប្រកាន់លោក Yoon នឹងត្រូវការការគាំទ្រចំនួនពីរភាគបីនៃសភា ឬសម្លេង ២០០ នៃសមាជិកសភាសរុបចំនួន ៣០០ របស់ខ្លួន។ គណបក្សប្រជាធិបតេយ្យ និងគណបក្សប្រឆាំងតូចៗផ្សេងទៀត រួមគ្នាមាន ១៩២អាសនៈ។ នៅពេលដែលសភាបានបោះឆ្នោតច្រានចោលការប្រកាសច្បាប់អាជ្ញាសឹករបស់លោក Yoon ក្នុងសម្លេង ១៩០ទល់នឹង០ សមាជិកសភាប្រហែល ១០រូបមកពីគណបក្សកាន់អំណាចរបស់លោក Yoon បានបោះឆ្នោតគាំទ្រការដកច្បាប់អាជ្ញាសឹក។

បើលោក Yoon ត្រូវបានចោទប្រកាន់ គាត់នឹងត្រូវដកហូតអំណាចរដ្ឋធម្មនុញ្ញរបស់គាត់ ហើយតុលាការធម្មនុញ្ញនឹងធ្វើការសម្រេចលើជោគវាសនារបស់គាត់។ លោកនាយករដ្ឋមន្ត្រី Han Duck-soo នឹងទទួលបន្ទុកជាប្រធានាធិបតីជំនួសលោក Yoon៕

ដោយ៖ ឈាង

ចុចអាន៖ ហេតុអ្វីកូរ៉េខាងត្បូង ដាក់ច្បាប់អាជ្ញាសឹក? តើពេលនេះ ស្ថានការណ៍យ៉ាងណាហើយ?