ចិនអំពាវនាវឱ្យមានកិច្ចសន្ទនា និងបទឈប់បាញ់នៅភាគខាងជើងមីយ៉ាន់ម៉ា

អ្នកនាំពាក្យក្រសួងការបរទេសចិន អំពាវនាវឱ្យមានកិច្ចសន្ទនា និងបទឈប់បាញ់នៅភាគខាងជើងមីយ៉ាន់ម៉ា​ឲ្យ​បា​ន​ឆាប់​តាមដែលអាចធ្វើទៅបាន។ នេះបើយោងតាមការចេញផ្សាយរបស់សារព័ត៌មាន​ CGTN នៅថ្ងៃទី០៥ខែធ្នូនេះ។

អ្នកនាំពាក្យក្រសួងការបរទេសចិន លោក Lin Jian បាននិយាយថា ប្រទេសចិនកំពុងតាមដានយ៉ាងដិតដល់នូវ​វឌ្ឍនៈ​ភាព​នៅភាគខាងជើងនៃប្រទេសមីយ៉ាន់ម៉ា ហើយបាននិងកំពុងជំរុញឱ្យភាគីពាក់ព័ន្ធ​ក្នុង​ជម្លោះ​នៃប្រទេសនេះចូលរួមក្នុងកិច្ចសន្ទនា និងការពិគ្រោះយោបល់ បញ្ឈប់ការប្រយុទ្ធគ្នាឱ្យបានឆាប់តាមដែលអាចធ្វើ​បាន ដើម្បីកុំឲ្យមានដោះស្រាយការខ្វែងគំនិតគ្នាតាមរយៈមធ្យោបាយសន្តិវិធី និងជៀសវាងការកើនឡើង។

គួររម្លឹកថា មុននឹងឈានដល់ការអំពាវនាវនេះ កាលពីយប់ថ្ងៃអង្គារ កងទ័ពសម្ព័ន្ធមិត្តប្រជាធិបតេយ្យជាតិមីយ៉ាន់ម៉ា (MNDAA) បានប្រកាសបទឈប់បាញ់ដោយបញ្ជាក់ថា ខ្លួនមានឆន្ទៈក្នុងការចរចាសន្តិភាពជាមួយកងទ័ពមីយ៉ាន់ម៉ាក្រោមការសម្របសម្រួលរបស់ចិន។

ជាការឆ្លើយតប លោក Lin បានសរសើរ​និង​កត់សម្គាល់វិជ្ជមាននាពេលថ្មីៗនេះ​ពី​ខាង​ភាគី​ MNDAA ដោយបញ្ជាក់ពីតម្រូវការសម្រាប់ភាគីទាំងអស់ដើម្បីផ្តល់អាទិភាពដល់ស្ថិរភាព។ លោកបាននិយាយថា ជាពិសេស ពួកគេមិនគួរបង្កគ្រោះ​ថ្នាក់ដល់សន្តិសុខ និងសុវត្ថិភាពនៃតំបន់ព្រំដែនរបស់ប្រទេសចិន ប្រជាជនចិនដែលរស់នៅក្នុងតំបន់ព្រំដែន និងគម្រោងរបស់ចិន ក្រុមហ៊ុន និងបុគ្គលិកនៅក្នុងប្រទេសមីយ៉ាន់ម៉ា”។

លោក Lin ក៏បានរំលឹកឡើងវិញនូវការប្តេជ្ញាចិត្តរបស់ប្រទេសចិនក្នុងការគាំទ្រដំណើរការសន្តិភាពនៅភាគខាងជើងនៃប្រទេសមីយ៉ាន់ម៉ា ហើយបានសន្យាថានឹងបន្តកិច្ចខិតខំប្រឹងប្រែងដើម្បីជួយសម្រួលដល់ការសន្ទនា៕

អត្ថបទ៖ ប៊ុន សុភាព