ព័ត៌មានអន្ដរជាតិ

អាមេរិក និងអង់គ្លេស បង្ក្រាបបានបណ្ដាញលាងលុយកខ្វក់របស់រុស្ស៊ី

បានផុស

៤ ខែ មុន

នៅ

ថ្ងៃព្រហស្បតិ៍ ៥ ធ្នូ ២០២៤

ដោយ

Chheang

សហរដ្ឋអាមេរិក និងចក្រភពអង់គ្លេស បានប្រកាសកាលពីថ្ងៃទី៤ខែធ្នូឆ្នាំ២០២៤ថា ពួកគេបានបង្ក្រាបក្រុមលាងលុយកខ្វក់ជាសកល ដែលមានក្រុមអ្នកមានជាជនជាតិរុស្សីនៅពីក្រោយខ្នង ដើម្បីគេចពីការដាក់ទណ្ឌកម្ម ព្រមទាំងប្រើសម្រាប់ការជួញដូរគ្រឿងញៀន ឧក្រិដ្ឋកម្ម និងចារកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារឧក្រិដ្ឋកម្មជាតិរបស់អង់គ្លេស ហៅកាត់ថា NCA បានឲ្យដឹងថា ប្រតិបត្តិការអនុវត្តច្បាប់ដែលមានការសម្របសម្រួលពីអន្តរជាតិនេះ មានឈ្មោះថា «Operation Destabilise» ហើយក្រុមដែលត្រូវបានបង្ក្រាបមានប្រព័ន្ធបណ្ដាញក្នុងប្រទេសចំនួន៣០។

NCA និយាយថា ប្រតិបត្តិការនេះក៏មានការចូលរួមពីអាជ្ញាធរក្នុងប្រទេសបារាំង អៀរឡង់ និងអារ៉ាប់រួមផងដែរ។ រហូតមកដល់ពេលនេះ មានការចាប់ខ្លួនមនុស្សចំនួន ៨៤នាក់ និងការរឹបអូសប្រាក់បានជាង ២៥លានដុល្លារ មានទាំងលុយសុទ្ធ និងលុយគ្រីបតូ។

NCA បានបន្ថែមថា បណ្តាញក្រុមជនល្មើស បានធ្វើប្រតិបត្តិការរបស់ខ្លួននៅចក្រភពអង់គ្លេស និងអឺរ៉ុប ទៅកាន់តំបន់មជ្ឈិមបូព៌ា និងអាមេរិកខាងត្បូង ដើម្បីគាំទ្រដល់អំពើឧក្រិដ្ឋកម្មនៅជុំវិញពិភពលោក។

ក្រសួងរតនាគារសហរដ្ឋអាមេរិក បានប្រកាសថា កន្លងមក អាមេរិកធ្លាប់បានដាក់ទណ្ឌកម្មលើសមាជិកនៃក្រុមនេះរួចមកហើយ មុនពេលពួកគេប្រើប្រាស់លុយគ្រីបតូ ដើម្បីគេចពីទណ្ឌកម្មដែលបានដាក់ទៅលើពួកគេ បន្ទាប់ពីរុស្ស៊ីឈ្លានពានអ៊ុយក្រែននៅខែកុម្ភៈឆ្នាំ២០២២៕

ដោយ៖ ឈាង