ព័ត៌មានអន្ដរជាតិ

អតីតរដ្ឋមន្ត្រីការពារជាតិកូរ៉េខាងត្បូង ត្រូវចោទពីបទក្បត់ជាតិ និងហាមមិនឲ្យចាកចេញពីប្រទេស

បានផុស

៣ ខែ មុន

នៅ

ថ្ងៃព្រហស្បតិ៍ ៥ ធ្នូ ២០២៤

ដោយ

Chheang

លោក Kim Yong-hyun អតីតរដ្ឋមន្ត្រីការពារជាតិកូរ៉េខាងត្បូង ត្រូវបានហាមប្រាមមិនឲ្យចាកចេញពីប្រទេសឡើយ និងត្រូវរងការស៊ើបអង្កេត ពាក់ព័ន្ធនឹងការចោទប្រកាន់ពីបទក្បត់ជាតិ។ នេះបើយោងតាមការប្រកាសរបស់ការិយាល័យរដ្ឋអាជ្ញាក្រុងសេអ៊ូល នៅថ្ងៃទី៥ខែធ្នូឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បម្រាមនេះ ធ្វើឡើងបន្ទាប់ពីមានសេចក្ដីរាយការណ៍ថា លោក Kim គឺជាអ្នកដែលបានស្នើទៅលោកប្រធានាធិបតី Yoon Suk-yeol ឲ្យប្រកាសច្បាប់អាជ្ញាសឹកជាបន្ទាន់ ដែលធ្វើឲ្យប្រទេសកូរ៉េខាងត្បូងកើតមានចលាចល។

លោក Yoon បានធ្វើសេចក្តីប្រកាសច្បាប់អាជ្ញាសឹកកាលពីយប់ថ្ងៃអង្គារ មុនពេលលុបចោលវិញនៅព្រឹកថ្ងៃពុធ ក្រោយរដ្ឋសភាបានបោះឆ្នោតប្រឆាំង។

គណបក្សប្រឆាំងតូចៗចំនួនបី បានចោទប្រកាន់លោក Yoon និងលោក Kim ពីបទក្បត់ជាតិកាលពីថ្ងៃពុធ។

ក្រុមស៊ីវិលចំនួនពីរ ក៏បានដាក់ពាក្យបណ្តឹងទៅកាន់ការិយាល័យរដ្ឋអាជ្ញាកំពូល និងការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ ដោយចោទប្រកាន់លោក Kim ពីបទក្បត់ជាតិ និងការចោទប្រកាន់មួយចំនួនទៀត។

សូមបញ្ជាក់ថា នៅពេលនេះ ប៉ូលិសបានបើកការស៊ើបអង្កេតលើប្រធានាធិបតីកូរ៉េខាងត្បូង ជុំវិញការចោទប្រកាន់ពីបទ បំបះបំបោរឬអាចថាជាការក្បត់ជាតិ ហើយប្រសិនបើរកឃើញថា លោកពិតជាប្រព្រឹត្តខុសមែន លោកអាចទទួលទោសប្រហារជីវិត ព្រោះថា តាមច្បាប់កូរ៉េខាងត្បូង ការបះបោរគឺជាឧក្រិដ្ឋកម្មដែលហួសពីអភ័យឯកសិទ្ធិប្រធានាធិបតី៕

ដោយ៖ ឈាង

ចុចអាន៖ ប្រធានាធិបតីកូរ៉េខាងត្បូង ប្រឈមទោសប្រហារជីវិត