នាវាចម្បាំងរុស្ស៊ី បាញ់ព្រមានឧទ្ធម្ភាគចក្រយោធាអាល្លឺម៉ង់ បញ្ឆេះភាពតានតឹង

ក្នុងសេចក្តីរាយការណ៍របស់ DPA កាលពីថ្ងៃទី៤ខែធ្នូឆ្នាំ២០២៤, នាវាចម្បាំងរុស្ស៊ី បានបាញ់ព្រមានដាក់ឧទ្ធម្ភាគចក្រយោធាអាល្លឺម៉ង់ ដែលកំពុងធ្វើបេសកកម្មហោះឈ្លបយកការណ៍នៅលើសមុទ្របាល់ទិក ដែលករណីនេះ ធ្វើឲ្យគេបារម្ភថា ស្ថានការណ៍កាន់តែក្តៅ អាចឈានដល់ផ្ទុះជម្លោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ត្បិតតែនេះមិនមែនជាគ្រាប់វាយប្រហារក៏ដោយ ប៉ុន្តែគេខ្លាចថា វាអាចជាសញ្ញាមិនល្អ ដែលនឹងទាញរុស្ស៊ីឲ្យខិតកាន់តែជិតទៅនឹងជម្លោះជាមួយអង្គការណាតូ។

ដោយសារតែនេះគឺជាបញ្ហារសើប រដ្ឋមន្ត្រីការបរទេសអាល្លឺម៉ង់ អ្នកស្រី Annalena Baerbock ​សុំមិននិយាយលម្អិតឡើយ ហើយភាគីរុស្ស៊ីឯណោះ ក៏មិនទាន់ធ្វើអត្ថាធិប្បាយអ្វីដែរ។

បច្ចុប្បន្ន អង្គការណាតូ កំពុងបង្កើនការល្បាតនៅសមុទ្របាល់ទិក ដើម្បីទប់ស្កាត់ការវាយប្រហារលើបំពង់បង្ហូរប្រេង និងខ្សែកាប ដោយចោទថា ជាស្នាដៃរុស្ស៊ីនិងអ្នកគាំទ្ររបស់ខ្លួន។

រឿងនេះកើតឡើង ស្របពេលស្ថានការណ៍សង្គ្រាមរុស្ស៊ី-អ៊ុយក្រែន ក៏កំពុងក្តៅគគុក ដោយរយៈពេលជាង២សប្តាហ៍កន្លងមកនេះ ទាំងអង់គ្លេសនិងអាមេរិក សុទ្ធតែបើកភ្លើងខៀវឲ្យទីក្រុងកៀវ ប្រើមីស៊ីលរយៈចម្ងាយឆ្ងាយរបស់ខ្លួន បាញ់ចូលដីរុស្ស៊ី។

ជុំវិញរឿងនេះ អតីតប្រធានាធិបតីរុស្ស៊ីលោក Dmitry Medvedev បានប្រកាសកាលពីចុងខែមុនថា ណាតូនិងអាមេរិក កំពុងបញ្ឆេះសង្គ្រាមដោយផ្ទាល់ជាមួយរុស្ស៊ីហើយ៕

អត្ថបទ៖ សុខ សុវណ្ណ

ចុចអាន៖ ណាតូ ធ្វើសមយុទ្ធទ័ពជើងទឹកជាមួយប្រទេសត្រៀមចូលជាសមាជិកនៅ សមុទ្របាល់ទិក