ព័ត៌មានអន្ដរជាតិ

មេបក្សកាន់អំណាចកូរ៉េខាងត្បូង៖ ពលរដ្ឋនឹងជួបគ្រោះធំ បើលោក Yoon បន្តកាន់តំណែង

បានផុស

២ ខែ មុន

នៅ

ថ្ងៃសុក្រ ៦ ធ្នូ ២០២៤

ដោយ

Chheang

លោកប្រធានាធិបតី Yoon Suk Yeol ត្រូវបានប្រធានគណបក្សកាន់អំណាចរបស់ប្រទេសកូរ៉េខាងត្បូង អំពាវនាវឲ្យផ្អាកភារកិច្ចរបស់ខ្លួនក្នុងពេលឆាប់ៗខាងមុខ ដោយអះអាងថា ពលរដ្ឋអាចស្ថិតក្នុង «គ្រោះថ្នាក់ធំ» បើគាត់នៅតែកាន់អំណាច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Han Doong-hoon មេដឹកនាំគណបក្សអំណាចប្រជាជន បាននិយាយនៅកិច្ចប្រជុំបន្ទាន់មួយនៅថ្ងៃទី៦ធ្នូនេះថា គណបក្សបានទទួលភស្តុតាងគួរឲ្យទុកចិត្តមួយ ដែលថាលោក Yoon បញ្ជាឲ្យចាប់ខ្លួនអ្នកនយោបាយសំខាន់ៗលើ «ការចោទប្រកាន់ប្រឆាំងនឹងរដ្ឋ» ហើយមានផែនការដាក់គុកពួកគេនៅក្នុងមន្ទីរឃុំឃាំងទីក្រុង Gwacheon ស្ថិតនៅភាគខាងត្បូងក្រុងសេអ៊ូល។

លោក Han បានសម្តែងការព្រួយបារម្ភថា «សកម្មភាពជ្រុលនិយម» ដូចជាការប្រកាសច្បាប់អាជ្ញាសឹកកាលពីថ្ងៃទី៣ខែធ្នូកន្លងទៅ អាចនឹងកើតឡើងម្តងទៀត បើលោក Yoon បន្តកាន់តំណែង ហើយ «នឹងធ្វើឲ្យសាធារណរដ្ឋកូរ៉េ និងប្រជាជនរបស់ខ្លួនមានហានិភ័យយ៉ាងខ្លាំង»។

សូមជម្រាបជាថ្មី កាលពីរាត្រីថ្ងៃអង្គារ លោក Yoon បានបង្កការភ្ញាក់ផ្អើល ដោយប្រកាសច្បាប់អាជ្ញាសឹកយ៉ាងបន្ទាន់ជាទីបំផុត ដោយអះអាងថា នេះជារឿងចាំបាច់ក្នុងការការពារប្រទេសពីក្រុមបក្សពួកកូរ៉េខាងជើងនិងកម្លាំងប្រឆាំងរដ្ឋ។ ការធ្វើបែបនេះ គឺដើម្បីដកកងកម្លាំងគាំទ្រកូរ៉េខាងជើងចេញពីប្រទេស និងដើម្បីការពារសណ្តាប់ធ្នាប់រដ្ឋធម្មនុញ្ញសេរី។ លោកគ្មានជម្រើសអ្វីក្រៅពីងាកទៅរកច្បាប់អាជ្ញាសឹកឡើយ។ ប៉ុន្តែច្បាប់នោះមានដាក់បានត្រឹម២ម៉ោងប៉ុណ្ណោះ រួចក៏ដកចេញវិញ។

អ្នកជំនាញអះអាងថា មូលហេតុដែលលោកប្រកាសច្បាប់នេះ ព្រោះមើលឃើញស្ថានការណ៍ថា ខ្លួនកំពុងចាញ់ប្រៀបគណបក្សប្រឆាំងក្នុងរឿងនយោបាយរបស់ប្រទេស ហើយច្បាប់នោះទៀតសោត ត្រូវគេបរិហាថា ជាការប្រាសចាករដ្ឋធម្មនុញ្ញ៕

ដោយ៖ ឈាង

ចុចអាន៖ តើនរណា ស័ក្តិសមដឹកនាំកូរ៉េខាងត្បូង បើលោក Yoon ត្រូវដកតំណែងមែន?