ព័ត៌មានអន្ដរជាតិ

មេបក្សកាន់អំណាចបើកផ្លូវឲ្យដកហូតអំណាចលោក Yoon Suk Yeol ដែលទំនងចចេសមិនលាលែង

បានផុស

៣ ខែ មុន

នៅ

ថ្ងៃសុក្រ ៦ ធ្នូ ២០២៤

ដោយ

ប្រធានគណបក្សកាន់អំណាចរបស់កូរ៉េខាងត្បូង បាននិយាយនៅថ្ងៃសុក្រនេះថា ប្រធានាធិបតីកូរ៉េខាងត្បូង Yoon Suk Yeol ត្រូវការព្យួរអំណាចឲ្យបានឆាប់បំផុត ដែលទំនងលោកបើកផ្លូវនិងគាំទ្ររដ្ឋសភាដែលគ្រប់គ្រងដោយសំឡេងភាគច្រើនរបស់គណបក្សប្រជាធិបតេយ្យដែលជាបក្សជំទាស់ និងត្រូវការសំឡេងបន្ថែមបង្គ្រប់កូរ៉ុម។ គណបក្សប្រជាធិបតេយ្យបានដាក់ពាក្យស្នើឲ្យរដ្ឋសភាបោះឆ្នោតដកហូតអំណាចដែលគ្រោងធ្វើឡើងនៅថ្ងៃសុក្រឬថ្ងៃសៅរ៍សប្តាហ៍នេះ។

ប្រធានគណបក្សអំណាចប្រជាជន (People Power Party (PPP)) លោក Han Dong-hoon។ Newsis

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានកូរ៉េខាងត្បូង Yonhap បានផ្សាយនៅព្រឹកថ្ងៃសុក្រនេះ បានឲ្យដឹងថា ប្រធានគណបក្សអំណាចប្រជាជន (People Power Party (PPP)) លោក Han Dong-hoon បាននិយាយថា មានលទ្ធភាពដែលប្រធានាធិបតីអាចនឹងចាត់វិធានការប៉ះពាល់ ម្តងទៀត ដូចការប្រកាសច្បាប់អាជ្ញាសឹក ប្រសិនបើ លោក Yoon កាន់អំណាចប្រធានាធិបតី។

ក្នុងកិច្ចប្រជុំបន្ទាន់នៃមេដឹកនាំគណបក្សនៅឯរដ្ឋសភា ប្រធានគណបក្សរូបនេះ បាននិយាយថា «ដោយផ្អែកតាមព្រឹត្តិការណ៍ដែលបានឃើញថ្មីៗនេះ ខ្ញុំជឿងថា វាចាំបាច់ដើម្បីផ្អាកប្រធានាធិបតី Yoon Suk Yeol ជាបន្ទាន់ ពីតូនាទីរបស់គាត់ដើម្បីការពារសាធារណៈរដ្ឋកូរ៉េ និងប្រជាជនកូរ៉េ»។

រហូតមកដល់ថ្ងៃនេះមានរយៈពេល៣ថ្ងៃដែល លោក Yoon Suk Yeol ប្រឈមការទាមទារឲ្យចុះចេញពីអំណាច ពីគ្រប់មជ្ឈដ្ឋានរាប់ចាប់តាំងពីប្រជាពលរដ្ឋ សហជីពការងារ រហូតដល់អ្នកនយោបាយទាំងក្នុងបក្សជំទាស់និងក្នុងបក្សកាន់អំណាចរបស់លោកផងក្នុងប្រទេសកូរ៉េខាងត្បូង បន្ទាប់ពីការប្រកាសដាក់ច្បាប់អាជ្ញាសឹករបស់ប្រធានាធិបតីកូរ៉េខាងត្បូងដែលមានរយៈពេល៦ម៉ោង ក្រោយសភាបោះឆ្នោតជំទាស់ការប្រកាសនោះ។

ប្រធានាធិបតីកូរ៉េខាងត្បូងបានរក្សភាពស្ងប់ស្ងាត់រហូតដល់ពេលនេះ ដោយមិនចេញមុខសុំទោសឬក៏មានវិធានការថ្មីនោះទេ ដែលអ្នកវិភាគខ្លះយល់ថា លោក Yoon Suk Yeol ដែលមានប្រវត្តិជាអ្នកបម្រើឲ្យវិស័យច្បាប់រយៈពេល២៧ឆ្នាំក្នុងនាមជាអគ្គរដ្ឋអាជ្ញា មុនក្លាយជាអ្នកនយោបាយ ទំនងមិនប្រកាសលាលែងពីអំណាចឡើយ។

ក្នុងខណៈពេលដែលសមាជិកសភានៃគណបក្សប្រជាធិបតេយ្យមួយចំនួនបានដាក់ពាក្យបណ្តឹងទៅរដ្ឋសភាដើម្បីប្រជុំបោះឆ្នោតដកហូតអំណាចរបស់ប្រធានាធិបតី Yoon Suk Yeol មានសេចក្តីរាយការណ៍ជាច្រើនបានអះអាងថា ប្រធានគណបក្សកាន់អំណាចមិនបានឯកភាពចំពោះវិធានការសភាដើម្បីចោទប្រធានាធិបតី និងបោះឆ្នោតទម្លាក់នោះទេ ប៉ុន្តែលោក ចង់ឲ្យប្រធានាធិបតី សុំទោស និងលាលែងពីអំណាចដោយចិត្តឯង។

បច្ចុប្បន្ននេះ សម្ព័ន្ធគណបក្សប្រជាធិបតេយ្យដែលគ្រប់គ្រងរដ្ឋសភាដោយសំឡេងភាគច្រើនមានសមាជិកសភា១៩២រូបក្នុងចំណោមសមាជិកសភាសរុប៣០០សំឡេង។ ការបោះឆ្នោតដកហូតដំណែងប្រធានាធិបតីត្រូវការសំឡេងគាំទ្រ២ភាគ៣ ដែលមានន័យថា គណបក្សប្រជាធិតេយ្យត្រូវការ៨សំឡេងបន្ថែមទៀតពីបក្សកាន់អំណាចដើម្បីគ្រប់កូរ៉ុម។

ក្រោយការបោះឆ្នោតដកហូតអំណាចប្រធានាធិបតីរបស់រដ្ឋសភា ដំណើរការច្បាប់ក៏ធ្លាក់ទៅលើតុលាការធម្មនុញ្ញដែលមានសមាជិក៩រូប ហើយការបោះឆ្នោតសម្រេចរបស់តុលាការធម្មនុញ្ញក៏ត្រូវការសំឡេង២ភាគ៣ ដែលតម្រូវឲ្យសមាជិកក្រុមប្រឹក្សា៦រូប បោះឆ្នោតដកតំណែងនោះ៕

ដោយ រ៉ាន់ រើយ