ព័ត៌មានអន្ដរជាតិ

លោក Lai៖ ទំនាក់ទំនងតៃវ៉ាន់ជាមួយលោក ត្រាំ នឹងកាន់តែជ្រាលជ្រៅ

បានផុស

៣ ខែ មុន

នៅ

ថ្ងៃសុក្រ ៦ ធ្នូ ២០២៤

ដោយ

Chheang

មេដឹកនាំកោះតៃវ៉ាន់ បានប្រកាសនៅថ្ងៃទី៦ខែធ្នូឆ្នាំ២០២៤ថា លោកមានទំនុកចិត្តលើកិច្ចសហប្រតិបត្តិការកាន់តែស៊ីជម្រៅជាមួយរដ្ឋបាលលោក ដូណាល់ ត្រាំ ដែលទើបឈ្នះការបោះឆ្នោតនៅសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Lai Ching-te បានលើកឡើងថា៖ «តៃវ៉ាន់មានទំនុកចិត្តថា ខ្លួននឹងបន្តកិច្ចសហប្រតិបត្តិការស៊ីជម្រៅជាមួយរដ្ឋាភិបាលថ្មី ដើម្បីទប់ទល់នឹងការពង្រីកអំណាចផ្តាច់ការ និងបង្កើតភាពរុងរឿង និងការអភិវឌ្ឍសម្រាប់ប្រទេសទាំងពីរ ខណៈកំពុងរួមចំណែកបន្ថែមទៀតដល់ស្ថិរភាព និងសន្តិភាពក្នុងតំបន់»។

ការលើកឡើងរបស់លោក Lai ធ្វើឡើងមួយថ្ងៃបន្ទាប់ពីការជជែកតាមទូរសព្ទជាមួយប្រធានសភាសាធារណរដ្ឋអាមេរិក លោក Mike Johnson ដែលបានធ្វើឲ្យចិនក្ដៅស្លឹកត្រចៀកជាខ្លាំង។

កន្លងមក ចិនទាមទារតៃវ៉ាន់ជាផ្នែកមួយនៃទឹកដីរបស់ខ្លួន និងប្រឆាំងនឹងការទទួលស្គាល់ជាអន្តរជាតិលើកោះនេះ ហើយបានជំទាស់នូវទំនាក់ទំនងផ្លូវការរវាងតៃវ៉ាន់ និងសហរដ្ឋអាមេរិក។

សហរដ្ឋអាមេរិក មិនមានទំនាក់ទំនងការទូតផ្លូវការជាមួយតៃវ៉ាន់ទេ ប៉ុន្តែអាមេរិកគឺជា អ្នកគាំទ្រ និងផ្តល់អាវុធដ៏ធំបំផុត របស់តៃវ៉ាន់ជាយូរមកហើយ។

ដូចរដ្ឋាភិបាលពិភពលោកដទៃទៀតដែរ តៃវ៉ាន់បានអបអរសាទរជាសាធារណៈចំពោះជ័យជម្នះរបស់លោក ត្រាំ ក្នុងការបោះឆ្នោតប្រធានាធិបតីកាលពីដើមខែវិច្ឆិកា ត្បិតអីអំឡុងពេលយុទ្ធនាការឃោសនាបោះឆ្នោត លោក ត្រាំ បានប្រកាសក្ដែងៗថា តៃវ៉ាន់គួរតែបង់ប្រាក់ឲ្យអាមេរិកសម្រាប់ថ្លៃការពាររបស់ខ្លួន និងចោទប្រកាន់កោះនេះថាបានលួចឧស្សាហកម្មបន្ទះឈីប (semiconductor) របស់អាមេរិក៕

ដោយ៖ ឈាង