ក្រុមឧទ្ទាម វាយចូលទីក្រុងធំទី៣របស់ស៊ីរី ដណ្តើមការគ្រប់គ្រងទាំងស្រុង

ក្រុមឧទ្ទាមស៊ីរី Hayat Tahrir al-Sham ហៅកាត់ HTS បានប្រកាសពីការវាយលុកចូលទីក្រុង Homs ដោយដណ្តើមការគ្រប់គ្រងទីក្រុងធំលំដាប់ទី៣របស់ប្រទេសស៊ីរីមួយនេះទាំងស្រុង នៅថ្ងៃអាទិត្យទី៨ខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេក្រុម HTS លោក Ahmed Hussein al-Shara បានប្រកាសពីជោគជ័យជាប្រវត្តិសាស្រ្តនេះ ក្រោយកងកម្លាំងរដ្ឋាភិបាលស៊ីរីដកខ្លួនចេញ ដូច្នេះឥឡូវ ក្រុមឧទ្ទាមស្ថិតនៅចម្ងាយត្រឹម១០គីឡូម៉ែត្រប៉ុណ្ណោះ ពីរដ្ឋធានីដាម៉ាស។

ក្រុម HTS បានបើកការវាយលុកកាលពីខែវិច្ឆិកា ដើម្បីប្រឆាំងរដ្ឋាភិបាលស៊ីរី ជាហេតុបង្កក្តីបារម្ភអំពីការផ្ទុះចលានាបះបោរថ្មីនៅក្នុងតំបន់។ ជុំវិញបញ្ហានេះ រដ្ឋាភិបាលស៊ីរីបានចេញមុខប្រកាសថា ខ្លួនមិនចុះចាញ់ឡើយ ហើយក៏បដិសេធដែរថា លោកប្រធានាធិបតី Bashar al-Assad មិនបានរត់ចេញពីប្រទេសនោះទេ។

ក្រុម HTS បានបញ្ជាក់ច្បាស់ៗថា គោលបំណងធំរបស់ខ្លួនក្នុងការបើកប្រតិបត្តិការនេះ គឺដើម្បីផ្តួលរំលំរដ្ឋាភិបាលរបស់លោក Assad និងបង្ខំឲ្យកងកម្លាំងបរទេស ចាកចេញពីស៊ីរី។

យ៉ាងណាក្តី ជុំវិញរឿងនេះ បណ្តាប្រទេសអារ៉ាប់កំពុងខ្វល់ចិត្ត ដោយខ្លាចតំបន់ធ្លាក់ចូលក្នុងអស្ថិរភាពសាជាថ្មី ខណៈរដ្ឋមន្ត្រីការបរទេសមកពីប្រទេសរុស្ស៊ី អ៊ីរ៉ង់ និងតួកគី បានជួបប្រជុំគ្នាក្នុងទីក្រុង ដូហា នៃប្រទេសកាតា ដើម្បីពិភាក្សាគ្នារកមធ្យោបាយដោះស្រាយជម្លោះ៕

អត្ថបទ៖ សុខ សុវណ្ណ

ចុចអាន៖ ពលរដ្ឋ​ស៊ីរី​រាប់​ម៉ឺន​នាក់ ចាប់​ផ្ដើម​ជម្លៀស​ខ្លួន ក្រោយ​ក្រុម​​ប្រឆាំង​ ដណ្ដើម​បាន​ទីក្រុង Homs