ព័ត៌មានអន្ដរជាតិ

អតីតរដ្ឋមន្ត្រីការពារជាតិកូរ៉េខាងត្បូង ត្រូវចាប់ខ្លួន

បានផុស

២ ខែ មុន

នៅ

ថ្ងៃអាទិត្យ ៨ ធ្នូ ២០២៤

ដោយ

ក្រោយជាប់បម្រាមធ្វើដំណើរចេញក្រៅប្រទេស ពេលនេះអតីតរដ្ឋមន្ត្រីការពារជាតិកូរ៉េខាងត្បូងលោក Kim Yong-hyun ត្រូវបានចាប់ខ្លួនតែម្តង ជុំវិញតួនាទីរបស់គាត់ក្នុងការប្រកាសច្បាប់អាជ្ញាសឹកពីសំណាក់លោកប្រធានាធិបតី Yoon Suk Yeol កាលពីរាត្រីថ្ងៃអង្គារទី៣ខែធ្នូ ដែលធ្វើឲ្យប្រទេសធ្លាក់ចូលក្នុងភាពចលាចល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Yonhap, ការចាប់ខ្លួននេះកើតឡើង បន្ទាប់ពីលោកស្ម័គ្រចិត្តចូលបង្ហាញខ្លួននៅការិយាល័យរដ្ឋអាជ្ញាកណ្តាលក្រុងសេអ៊ូលនាម៉ោង១០យប់ថ្ងៃសៅរ៍ ដើម្បីឲ្យក្រុមស៊ើបអង្កេតពិសេស សាកសួរ។

លើសពីនេះ ក្រុមប៉ូលិសក៏បានចូលឆែកឆេរការិយាល័យរបស់លោក Kim ផងដែរ ដើម្បីរកព័ស្តុតាងបន្ថែម ខណៈមានការចោទប្រកាន់ពីបទក្បត់ជាតិ ប្រឆាំងនឹងរូបលោកនិងមន្ត្រីកំពូលៗផ្សេងទៀត។

ការចាប់ខ្លួននេះទៀតសោត កើតឡើងស្របពេល សភាកូរ៉េខាងត្បូង បរាជ័យមិនអាចបង្កើតក្រុមប្រឹក្សាស៊ើបអង្កេតលើភរិយាប្រធានាធិបតី និងមិនអាចដកតំណែងលោក Yoon បាន។

ការបរាជ័យទាំងពីរករណីនេះ គឺដោយសារសមាជិកសភាគណបក្សកាន់អំណាចរបស់លោក Yoon ដែលមាន១០៨សំឡេង មិនបានបោះឆ្នោតគំាទ្រលើសេចក្តីស្នើច្បាប់របស់គណបក្សប្រជាធិបតេយ្យដែលមានសមាជិក១៩២សំឡេង និងត្រូវការតែ៨សំឡេងទៀតប៉ុណ្ណោះដើម្បីបង្រ្គប់កូរ៉ុម២ភាគ៣ ដើម្បីដកហូតអំណាចប្រធានាធិបតី។

ក្រោយបរាជ័យលើកនេះ រដ្ឋសភាកូរ៉េខាងត្បូងនឹងត្រូវប្រជុំបោះឆ្នោតលើច្បាប់ដកហូតអំណាចលោក Yoon សាជាថ្មីម្តងទៀតនៅថ្ងៃពុធសប្តាហ៍ក្រោយ។

សូមបញ្ជាក់ថា ពេលនេះសម្ព័ន្ធគណបក្សប្រជាធិបតេយ្យមានសមាជិក១៩២ ដោយត្រូវការតែ៨សំឡេងទៀតប៉ុណ្ណោះពីគណបក្សកាន់អំណាចដែលមាន១០៨សំឡេង។ គណបក្សកាន់អំណាច បានប្តូរជំហរមិនបោះឆ្នោតប្រឆាំងលោក Yoon វិញ ក្រោយប្រធានាធិបតីចេញមុខសុំទោសជាសាធារណៈនៅព្រឹកថ្ងៃសៅរ៍នេះ៕

អត្ថបទ៖ សុខ សុវណ្ណ

ចុចអាន៖ សភាកូរ៉េខាងត្បូងបរាជ័យដកហូតអំណាចលោក Yoon ក្នុងសម័យប្រជុំលើកទី១ ប៉ុន្តែបក្សប្រឆាំងថា នឹងបញ្ចប់ចុងឆ្នាំនេះ