លោក ត្រាំ លើកមេធាវីរបស់គាត់ Alina Habba ធ្វើជាទីប្រឹក្សាប្រធានាធិបតី

ប្រធានាធិបតីទើបជាប់ឆ្នោតលោក ដូណាល់ ត្រាំ បានប្រកាសថាលោកកំពុងតែងតាំងមេធាវីការពារក្តីរបស់លោកម្នាក់នៅក្នុងសំណុំរឿងលុយកាក់នៅទីក្រុងញូវយ៉កជាទីប្រឹក្សាប្រធានាធិបតី។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​APនៅថ្ងៃទី៩ខែធ្នូនេះ។

លោកស្រី Alina Habba អាយុ៤០ឆ្នាំដែលបានការពារក្ដីឲ្យលោក ត្រាំ នៅដើមឆ្នាំនេះដោយធ្វើជាអ្នកនាំពាក្យផ្នែកច្បាប់របស់គាត់ផងដែរ។ លោកស្រី Habba បានចំណាយពេលជាមួយប្រធានាធិបតីជាប់ឆ្នោតចាប់តាំងពីការបោះឆ្នោតនៅឯក្លឹប Mar-a-Lago រដ្ឋផ្លរីដាមកម្លេះ និងបានអមដំណើរលោក ត្រាំ ជាញឹកញាប់នៅលើយុទ្ធនាការ និងជាវាគ្មិនម្នាក់នៅឯការជួបជុំចុងខែតុលានៅក្នុង Madison Square Garden ទីក្រុងញូវយ៉ក។

លោក ត្រាំ បានបង្ហោះនៅលើបណ្តាញទំនាក់ទំនងសង្គម Truth Social ថា «នាងមិនងាករេក្នុងភាពស្មោះត្រង់ និងមិនអាចប្រៀបផ្ទឹមបានក្នុងការតាំងចិត្តរបស់នាង ឈរជាមួយខ្ញុំតាមរយៈ “ការប្រជែង” ការប្រយុទ្ធជាច្រើន និងរាប់មិនអស់នៅក្នុងតុលាការ ខណៈមានមនុស្សតិចណាស់ដែលយល់ពីប្រព័ន្ធ អយុត្តិធម៌។

នៅពេលនោះលោកត្រាំ បានក្លាយជាអតីតប្រធានាធិបតីអាមេរិកដំបូងគេដែលត្រូវបានកាត់ទោសពីបទឧក្រិដ្ឋកម្ម នៅពេលដែលគណៈវិនិច្ឆ័យនៅទីក្រុងញូវយ៉កក្នុងខែឧសភាបានរកឃើញថាគាត់មានពិរុទ្ធពីបទចោទប្រកាន់ទាំង ៣៤ នៅក្នុងគម្រោងដើម្បីជះឥទ្ធិពលដោយខុសច្បាប់ក្នុងការបោះឆ្នោតឆ្នាំ ២០១៦តាមរយៈការបង់ប្រាក់ក្រាស់ក្រែលដល់តារាសម្តែងអាសអាភាស ដែលបាននិយាយថាអ្នកទាំងពីរមានទំនាក់ទំនងផ្លូវភេទ។

នៅក្នុងអាណត្តិដំបូងរបស់លោក ត្រាំ តំណែងជាទីប្រឹក្សាត្រូវបានកាន់កាប់ដោយអ្នកយុទ្ធសាស្រ្តមកពីគណបក្សសាធារណរដ្ឋលោកស្រី Kellyanne Conway ខណៈលោកស្រី Habba មានពូជពង្សជនជាតិអ៊ីរ៉ាក់ និងជាជនជាតិ Chaldean ដែលជានិកាយគ្រិស្តសាសនាដ៏ធំបំផុតរបស់ប្រទេសអ៊ីរ៉ាក់ និងជាសាសនាមួយក្នុងចំណោមសាសនាកាតូលិកភាគខាងកើត។

គួរបញ្ជាក់ផងដែរថាកាល​ពី​ថ្ងៃ​អាទិត្យ លោក ត្រាំ ក៏​បាន​ប្រកាស​ថា លោក​នឹង​នាំ​អតីត​បុគ្គលិក​លោក Michael Anton ត្រឡប់​មក​កាន់​តំណែង​ជា​ប្រធាន​ផែនការ​គោល​នយោបាយ​នៅ​ក្រសួងការបរទេស។ លោក Anton បានបម្រើការជាអ្នកនាំពាក្យក្រុមប្រឹក្សាសន្តិសុខជាតិពីឆ្នាំ ២០១៧ ដល់ឆ្នាំ ២០១៨ ។ លោក Trump បាននិយាយថាលោកក៏នឹងតែងតាំងលោក Michael Needham ដែលជាអតីតប្រធានបុគ្គលិកសម្រាប់ព្រឹទ្ធសភា Marco Rubio ជាទីប្រឹក្សានៃក្រសួងការបរទេសផងដែរ៕

អត្ថបទ៖ ប៊ុន សុភាព