ព័ត៌មានអន្ដរជាតិ

ផ្ទុះភ្នំភ្លើងនៅហ្វីលីពីន បង្ខំឲ្យអ្នកភូមិរាប់ពាន់នាក់ភៀសខ្លួនចេញ

បានផុស

២ ខែ មុន

នៅ

ថ្ងៃអង្គារ ១០ ធ្នូ ២០២៤

ដោយ

ភ្នំភ្លើងមួយនៅប្រទេសហ្វីលីពីនបានផ្ទុះបញ្ចេញផេះដ៏ក្តៅគគុក និងឧស្ម័នដែលមានកម្ពស់រហូតដល់៣គីឡូម៉ែត្រ បានបង្ខំឱ្យអ្នកស្រុកភៀសខ្លួនចេញពីតំបន់យ៉ាងប្រញាប់ប្រញាល់ដើម្បីស្វែងរកទីជម្រកសុវត្ថិភាព។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១០ខែធ្នូនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនមានរបាយការណ៍ភ្លាមៗអំពីអ្នកស្លាប់ និងរបួសនៅក្នុងការផ្ទុះចុងក្រោយនៃភ្នំ Kanlaon នៅលើកោះ Negros នោះទេ ប៉ុន្តែអាជ្ញាធរបានបិទសាលារៀន និងដាក់បម្រាមគោចរចាប់តាំងពីយប់ បន្ទាប់ពីផេះបានធ្លាក់ចុះនៅក្នុងភូមិជាច្រើនបង្កឱ្យមានការព្រួយបារម្ភអំពីសុខភាព។

អភិបាលក្រុង លោក Jose Chubasco Cardenas នៃទីក្រុង Canlaon ដែលស្ថិតនៅភាគអាគ្នេយ៍នៃភ្នំភ្លើងបានប្រាប់សារព័ត៌មាន Associated Press តាមទូរស័ព្ទថា «វាស្តាប់ទៅដូចជាស្នូរកាំភ្លើងធំផ្ទុះអីចឹង គឺជាការផ្ទុះយ៉ាងខ្លាំង» ។

មន្ត្រីឆ្លើយតបគ្រោះមហន្តរាយបានបង្កើនកម្រិតគ្រោះថ្នាក់នៅជុំវិញភ្នំ Kanlaon ដោយសារតែ «ហានិភ័យកាន់តែខ្លាំងនៃសកម្មភាពភ្នំភ្លើងដ៏គ្រោះថ្នាក់» និងបានបញ្ជាឱ្យអ្នកភូមិក្នុងរង្វង់៦គីឡូម៉ែត្រនៃរណ្ដៅភ្នំភ្លើងត្រូវជម្លៀសចេញ។

មនុស្សប្រហែល១០០នាក់បានភៀសខ្លួនទៅកាន់ទីជម្រកសង្គ្រោះបន្ទាន់ក្នុងទីក្រុង Canlaon ទាំងយប់កាលពីកាលថ្ងៃចន្ទ បន្ទាប់ពីមានការផ្ទុះភ្នំភ្លើងនៅពេលរសៀល ហើយចំនួនអ្នកផ្លាស់ទីលំនៅអាចកើនដល់ជាង ២ពាន់នាក់ ដោយសារការរំពឹងទុកខ្លាំងនៃការផ្ទុះភ្នំភ្លើងបន្ថែមទៀត។

វិទ្យាស្ថាន Volcanology and Seismology របស់ប្រទេសហ្វីលីពីនបាននិយាយថា ការផ្ទុះនេះបានបណ្តាលឱ្យមានចរន្តដង់ស៊ីតេ pyroclastic ដែលជាស្ទឹងដ៏ក្តៅនៃផេះ កំទេចកំទី និងថ្មដែលអាចដុតបំផ្លាញអ្វីៗទាំងអស់នៅពេលដែលវាហូរចេញ។ កម្រិតប្រកាសអាសន្ននៅជុំវិញភ្នំភ្លើង Kanlaon ស្ថិតក្នុងកម្រិតខ្ពស់បំផុតទីបីនៃប្រព័ន្ធព្រមានប្រាំជំហាន ដែលបង្ហាញថា ការផ្ទុះភ្នំភ្លើងបានចាប់ផ្តើមដែលអាចឈានទៅរកការផ្ទុះបន្ថែមទៀត ។

ភ្នំភ្លើងដែលមានកម្ពស់ ២៤៣៥ ម៉ែត្រនេះ គឺជាភ្នំភ្លើងមួយក្នុងចំណោមភ្នំភ្លើងសកម្មបំផុតចំនួន ២៤ របស់ប្រទេសនេះបានផ្ទុះចុងក្រោយនៅក្នុងខែមិថុនាបានបង្ខំអ្នកភូមិរាប់រយនាក់ទៅកាន់ទីជម្រកសង្គ្រោះបន្ទាន់។

គួរបញ្ជាក់ថាស្ថិតនៅក្នុងតំបន់ប៉ាស៊ីហ្វិកដែលហៅថា «Ring of Fire» ដែលជាតំបន់ងាយនឹងកើតមានការរញ្ជួយដី និងការផ្ទុះភ្នំភ្លើង ហ្វីលីពីនក៏ត្រូវបានវាយប្រហារដោយព្យុះទីហ្វុង និងព្យុះប្រហែល ២០ ក្នុងមួយឆ្នាំ ហើយស្ថិតក្នុងចំណោមប្រទេសដែលងាយរងគ្រោះបំផុតចំពោះគ្រោះមហន្តរាយធម្មជាតិ៕