ព័ត៌មានអន្ដរជាតិ

លោក Netanyahu ត្រៀមចូលខ្លួនបំភ្លឺក្នុងរឿងក្ដីពុករលួយ ជាលើកដំបូង

បានផុស

៣ ខែ មុន

នៅ

ថ្ងៃអង្គារ ១០ ធ្នូ ២០២៤

ដោយ

Chheang

នាយករដ្ឋមន្ត្រីអ៊ីស្រាអែល លោក Benjamin Netanyahu គ្រោងនឹងបង្ហាញខ្លួនជាលើកដំបូងនៅថ្ងៃទី១០ខែធ្នូនេះ ពាក់ព័ន្ធនឹងរឿងក្តីពុករលួយដែលអូសបន្លាយជាយូរណាស់មកហើយរបស់លោក ក្រោមការបង្គាប់របស់តុលាការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីស្រាអែល បាននិងកំពុងធ្វើសង្រ្គាមប្រឆាំងនឹងក្រុមសកម្មប្រយុទ្ធប៉ាឡេស្ទីន ហាម៉ាស នៅតំបន់ហ្គាហ្សាអស់រយៈពេលជាងមួយឆ្នាំ ដែលក្នុងអំឡុងពេលនេះ លោក Netanyahu ត្រូវបានផ្តល់ការពន្យារពេល សម្រាប់ការបង្ហាញខ្លួននៅតុលាការ។ ប៉ុន្តែនៅថ្ងៃព្រហស្បតិ៍ ចៅក្រមបានសម្រេចថា លោកត្រូវចាប់ផ្តើមផ្តល់សក្ខីកម្ម។

តុលាការ បាននិយាយថា លោក Netanyahu នឹងផ្តល់សក្ខីកម្មចំនួន ៣ដងក្នុងមួយសប្តាហ៍ ពាក់ព័ន្ធនឹងការចោទប្រកាន់ពីបទស៊ីសំណូក ការក្លែងបន្លំ និងការរំលោភលើទំនុកចិត្ត ទោះបីជាអ៊ីស្រាអែលកំពុងមានសង្រ្គាមនៅហ្គាហ្សា និងការគំរាមកំហែងថ្មី ដែលអាចបង្កឡើងដោយភាពចលាចលកាន់តែធំនៅតំបន់មជ្ឈិមបូព៌ា រួមទាំងនៅក្នុងប្រទេសស៊ីរី ក៏ដោយ។

នាយករដ្ឋមន្ត្រីវ័យ៧៥ឆ្នាំរូបនេះ ត្រូវបានចោទប្រកាន់ចំនួន៣ករណីក្នុងឆ្នាំ២០១៩ ទាក់ទិននឹងការទទួលអំណោយពីមិត្តដែលជាមហាសេដ្ឋី និងការដាក់ចេញច្បាប់អនុគ្រោះសម្រាប់ម្ចាស់ប្រព័ន្ធផ្សព្វផ្សាយ ជាថ្នូរនឹងការជួយផ្សាយព័ត៌មានលើកជើង។ យ៉ាងណា មេដឹកនាំអ៊ីស្រាអែលបានបដិសេធរាល់ការចោទប្រកាន់ទាំងនោះ។

លោក Netanyhau គឺជាមេដឹកនាំដែលកាន់អំណាចយូរបំផុតរបស់អ៊ីស្រាអែល និងជានាយករដ្ឋមន្ត្រីកំពុងកាន់អំណាចដំបូងគេ ដែលត្រូវរងការចោទប្រកាន់ពីបទឧក្រិដ្ឋកម្ម។

សូមបញ្ជាក់ថា ក្រៅតែពីបញ្ហាផ្លូវច្បាប់ក្នុងស្រុក លោក Netanyahu កាលពីខែវិច្ឆិកា ក៏ត្រូវបានតុលាការឧក្រិដ្ឋកម្មអន្តរជាតិ (ICC) ចេញដីកាចាប់ខ្លួន ពីបទឧក្រិដ្ឋកម្មសង្រ្គាមនៅក្នុងតំបន់ហ្គាហ្សាផងដែរ៕

ដោយ៖ ឈាង