ព័ត៌មានអន្ដរជាតិ

ស្ត្រីវៀតណាម ដែលសម្រាលកូន២នាក់ មុនអាយុ៣៥ឆ្នាំ ទទួលបានប្រាក់ឧបត្ថម្ភ១២០ដុល្លារ

បានផុស

២ ខែ មុន

នៅ

ថ្ងៃអង្គារ ១០ ធ្នូ ២០២៤

ដោយ

Chheang

គោលនយោបាយថ្មីរបស់ទីក្រុងហូជីមិញ នឹងមានការផ្តល់ជូនប្រាក់ឧបត្ថម្ភចំនួន ៣លានដុង ស្មើនឹងជាង ១១៨ដុល្លារ ដល់ស្ត្រីដែលមានកូន២នាក់មុនអាយុ៣៥ឆ្នាំ ក្នុងគោលបំណងដោះស្រាយបញ្ហាអត្រាកំណើតទាបរបស់ទីក្រុង និងបញ្ហាកំណើនប្រជាជនយឺត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់សារព័ត៌មាន VN Express ក្រុងហូជីមិញ ក៏នឹងផ្តល់ប្រាក់ចំនួន ២លានដុងសម្រាប់ស្ត្រីមានផ្ទៃពោះ និងទារកទើបកើត ដែលមកពីគ្រួសារក្រីក្រ អ្នកទទួលការគាំពារសង្គម ឬអ្នកដែលរស់នៅលើកោះ។

គោលនយោបាយនេះ ធ្វើឡើងនៅពេលដែលទីក្រុងហូជីមិញកំពុងប្រឈមនឹងបញ្ហាអត្រាមានកូនរបស់ស្ត្រីធ្លាក់ចុះទាប ដោយក្នុងស្ត្រីម្នាក់ អាត្រាមានកូនមានត្រឹមតែ ១,៣២នាក់ប៉ុណ្ណោះក្នុងឆ្នាំ២០២៣ ដែលទាបជាងអត្រាជំនួស ២,១នាក់ក្នុងស្ត្រីម្នាក់។

ហូជីមិញ គឺជាតំបន់មួយក្នុងចំណោមតំបន់ចំនួន២១នៃប្រទេសវៀតណាម ដែលមានអត្រាកំណើតទាប ជាមួយនឹងកំណើនប្រជាជនតាមបែបធម្មជាតិត្រឹមតែ ០,៧៣% ក្នុងឆ្នាំ២០២៣។ អាជ្ញាធរទីក្រុង ព្រមានថា អត្រាមានកូនទាបដែលអូសបន្លាយយូរ អាចនាំឲ្យកើតមានបញ្ហាជាច្រើនដូចជា ការកើនឡើងយ៉ាងឆាប់រហ័សនៃមនុស្សវ័យជរា កង្វះខាតកម្លាំងពលកម្ម និងបញ្ហាប្រឈមផ្នែកសុខុមាលភាពសង្គម។

ខេត្តភាគខាងត្បូងផ្សេងទៀតរបស់វៀតណាម ដូចជា Hau Giang, Kien Giang និង Bac Lieu បានអនុវត្តគោលនយោបាយផ្តល់រង្វាន់ស្រដៀងគ្នានេះដែរ ជាមួយនឹងការគាំទ្រចន្លោះពី ១លាន ទៅ ១,៥លានដុងសម្រាប់ស្ត្រីម្នាក់។

ទីក្រុងហូជីមិញ ក៏មានគម្រោងលុបចោលគោលនយោបាយហួសសម័យមួយចំនួនផងដែរ ដូចជា ការលើកទឹកចិត្តសម្រាប់សហគមន៍ដែលគ្មានកូនទីបី និងនីតិវិធីក្រៀវ ជាដើម៕

ដោយ៖ ឈាង

Related Topics:ប្រទេសវៀតណាម