ព័ត៌មានអន្ដរជាតិ

កូរ៉េខាងជើង បញ្ចេញប្រតិកម្មជាលើកដំបូងចំពោះការប្រកាសច្បាប់អាជ្ញាសឹករបស់លោក Yoon

បានផុស

៣ ខែ មុន

នៅ

ថ្ងៃពុធ ១១ ធ្នូ ២០២៤

ដោយ

Chheang

ជាលើកដំបូង ប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃទី១១ខែធ្នូ បានរាយការណ៍ពីភាពចលាចលនយោបាយដែលកំពុងបន្តកើតមានរបស់កូរ៉េខាងត្បូង ចាប់តាំងពីការប្រកាសច្បាប់អាជ្ញាសឹកដ៏គួរឲ្យភ្ញាក់ផ្អើលរបស់លោកប្រធានាធិបតី Yoon Suk-yeol។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បទបញ្ជាច្បាប់អាជ្ញាសឹក កាលពីសប្តាហ៍មុន បានបង្កឲ្យមានក្ដីព្រួយបារម្ភអំពីភាពខ្វះចន្លោះនៃអំណាច និងការទាញឲ្យប្រទេសកូរ៉េខាងត្បូង ដែលជាមហាអំណាចសេដ្ឋកិច្ចធំបំផុតទី៤របស់អាស៊ី និងជាសម្ព័ន្ធមិត្តដ៏សំខាន់របស់សហរដ្ឋអាមេរិក ធ្លាក់ចូលទៅក្នុងវិបត្តិរដ្ឋធម្មនុញ្ញ ការទូត និងសេដ្ឋកិច្ច។

បន្ទាប់ពីស្ងប់ស្ងាត់អស់រយៈពេលមួយសប្តាហ៍ ទីភ្នាក់ងាររដ្ឋកូរ៉េខាងជើង KCNA បានចុះផ្សាយអត្ថបទមួយស្តីពីអ្វីដែលខ្លួនបានពិពណ៌នាថាជា «ភាពចលាចលសង្គម» ដែលកំពុងកើនឡើងនៅកូរ៉េខាងត្បូង ដោយសារវិបត្តិច្បាប់អាជ្ញាសឹក។

អត្ថបទនោះមិនបានផ្តល់ការអត្ថាធិប្បាយអ្វីច្រើនទេ ដោយផ្តោតលើការតវ៉ាជាបន្តបន្ទាប់ ដែលចូលរួមដោយមនុស្សជាងមួយលាននាក់ដែលអំពាវនាវឲ្យមានការចោទប្រកាន់លើលោក Yoon។

KCNA បានផ្សាយថា៖ «អាយ៉ង Yoon Suk-yeol ដែលបានប្រឈមមុខនឹងវិបត្តិធ្ងន់ធ្ងរនៃអភិបាលកិច្ច និងការចោទប្រកាន់រួចហើយនោះ បានប្រកាសច្បាប់អាជ្ញាសឹកដោយមិននឹកស្មានដល់ និងបានបញ្ចេញអាវុធនៃរបបផ្តាច់ការហ្វាស៊ីសមកលើប្រជាជន។ ទង្វើដ៏ឆ្កួតលីលារបស់គាត់ ដែលរំឮកដល់រដ្ឋប្រហារក្នុងរបបផ្តាច់ការយោធាជាច្រើនទសវត្សរ៍មុន បានទាក់ទាញការថ្កោលទោសយ៉ាងខ្លាំងពីគ្រប់មជ្ឈដ្ឋាន រួមទាំងគណបក្សប្រឆាំង និងបានជំរុញឲ្យសាធារណជនមានការខឹងសម្បារកាន់តែខ្លាំងសម្រាប់ការចោទប្រកាន់»៕

ដោយ៖ ឈាង

ចុចអាន៖ រដ្ឋមន្ត្រីការពារជាតិកូរ៉េខាងត្បូង ត្រូវចាប់ខ្លួនជាផ្លូវការ ស្របពេលសង្ស័យថា គាត់បំផ្លាញព័ស្តុតាង