គ្រូទាយល្បីឈ្មោះ២រូប សុទ្ធតែទាយរឿងដែលគ្មាននរណាចង់ឲ្យកើត នៅឆ្នាំក្រោយ

ត្បិតតែរលាយរូបកាយពីភពផែនដីនេះទៅហើយក្តី ប៉ុន្តែគ្រូទាយពីររូប បានបន្សល់ទុកទំនាយជាច្រើន នៅតាមឆ្នាំនីមួយៗ ដោយទំនាយខ្លះក៏ល្អ ចំណែកទំនាយខ្លះទៀតក៏ធ្វើឲ្យមនុស្សលើពិភពលោកមិនចង់ឲ្យកើតឡើងនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកយាយពិការភ្នែក Baba Vanga ជនជាតិប៊ុលហ្គារី ត្រូវមនុស្សភាគច្រើនស្គាល់ថាជាគ្រូទាយឆុតមួយរូប​ ពោលគឺថាគាត់ទាយត្រូវសឹងតែ៩០%ទៅហើយ អំពីរឿងរ៉ាវដែលនឹងកើតឡើងនាពេលអនាគត។ ជាពិសេស គាត់ទាយត្រូវអំពីការរំលាយសហភាពសូវៀត, អំពើភេរវកម្មថ្ងៃទី១១ខែកញ្ញាឆ្នាំ២០០១, ការសោយទិវង្គតរបស់ព្រះនាង Diana, គ្រោះមហន្តរាយ Chernobyl, រលកយក្សស៊ូណាមិ រញ្ជួយដី និងដំណោះស្រាយចំពោះជំងឺមហារីកជាដើម។

ចំណែកគ្រូទាយបារាំង Nostradamus ក៏បានទាយទុករឿងរ៉ាវជាច្រើននៅក្នុងសៀវភៅ Prophecies ហើយគាត់ក៏ទាយត្រូវអំពីហេតុការណ៍នានាដែរដូចជា ការងើបបះបោររបស់ Adolf Hitler, ការធ្វើឃាតអតីតប្រធានាធិបតីអាមេរិក John F. Kennedy និង ការវាយប្រហារភេរវកម្មនៅអាមេរិកជាដើម។

សម្រាប់ឆ្នាំ២០២៥ខាងមុខ គ្រូទាយទាំងពីរ សុទ្ធតែទស្សន៍ទាយអំពីរឿងហេតុដែលគ្មានអ្នកណាចង់ឲ្យកើតឡើងឡើយនោះគឺ សង្គ្រាមដ៏ឃោរឃៅពាក់ព័ន្ធជាមួយបណ្តោប្រទេសនៅទ្វីបអឺរ៉ុបនឹងផ្ទុះឡើង ហើយពិភពលោកនឹងកើតគ្រោះធម្មជាតិកាន់តែកាចសាហាវ នាំឲ្យមនុស្សពិបាករស់នៅជាទីបំផុត។

ក្នុងទំនាយ លោកយាយ Baba Vanga ទាយថា ជម្លោះនៅអឺរ៉ុបដីគោកនឹងកាន់តែខ្លាំងក្នុងឆ្នាំ២០២៥ ដែលនឹងនាំឲ្យមានផលវិបាកធ្ងន់ធ្ងរ ហើយព្រឹត្តិការណ៍​ទាំង​នេះ​អាច​ជំរុញឲ្យមាន​ការ​បំផ្លិចបំផ្លាញ​ពិភពលោកទាំងមូលតែម្តង។

ចំណែក Nostradamus វិញ គាត់បានព្រមានអំពីសង្រ្គាមដ៏ឃោរឃៅ ដែលជាប់ពាក់ព័ន្ធនឹង អ្នកមកពីទឹកដីនៃទ្វីបអឺរ៉ុប។ លោកបន្ថែមថា «គ្រោះកាចពីបុរាណនឹងអាក្រក់ជាងសត្រូវទៅទៀត»។ ក្នុងន័យនេះ ត្រូវបានគេជឿថា គាត់ចង់សំដៅទៅការគំរាមកំហែងធ្ងន់ធ្ងរ ទាក់​ទង​នឹង​ភាព​តាន​តឹង​ភូមិសាស្ត្រ​នយោបាយ​របស់​អឺរ៉ុប ដែល​អាច​រួម​បញ្ចូល​ទាំង​ជម្លោះ​រុស្ស៊ី និង​អ៊ុយក្រែន​ដែល​កំពុង​កើត​ឡើង ឬ​ភាព​ចលាចល​នៅ​អឺរ៉ុប​កាន់តែធំផងដែរ។

ទោះបីជាយ៉ាងណាក៏ដោយ ទាំងនេះគ្រាន់តែជាទំនាយប៉ុណ្ណោះ ហើយការជឿឬមិនជឿគឺអាស្រ័យលើអ្នក៕

អត្ថបទ៖ សុខ សុវណ្ណ

ប្រភព៖ BI

ចុចអាន៖ ទំនាយឆ្នាំ២០២៥ របស់លោកយាយ Baba Vanga ព្រឺព្រួចជាងទំនាយមុនៗ