អ៊ីរ៉ង់ព្រមានឆ្លងកូវីដរលកទី ៤ នៅថ្ងៃបុណ្យចូលឆ្នាំថ្មី

កាលពីថ្ងៃអាទិត្យប្រទេសអ៊ីរ៉ង់បានព្រមានអំពីការកើតឡើងជាថ្មីក៏ដូចជារលកទី ៤ នៃជំងឺកូវីដ ១៩ ក្នុងអំឡុងពេលពិធីបុណ្យចូលឆ្នាំថ្មី Nowruz ដែលចាប់ផ្តើមនៅថ្ងៃទី ២០ ខែមីនា ។

លោកស្រី Sima Sadat Lari អ្នកនាំពាក្យក្រសួងសុខាភិបាល និងអប់រំផ្នែកវេជ្ជសាស្ត្រអ៊ីរ៉ង់បាននិយាយថា ការប្រតិបត្តិពិធីសារសុខភាពនៅក្នុងប្រទេសអ៊ីរ៉ង់បានឈានដល់កម្រិតទាបបំផុតក្នុងរយៈពេល ៤ ខែកន្លងមកនេះ ។

លោកស្រីបាននិយាយថា “យើងសង្ឃឹមថា ប្រជាជនទាំងអស់គោរពគោលការណ៍អនាម័យ និងជៀសវាងការធ្វើដំណើរ និងការជួបជុំដែលមិនចាំបាច់ដើម្បីការពារកុំឲ្យមានរលកផ្សេងទៀតនៃជំងឺកូវីដ ១៩ នៅក្នុងប្រទេស” ។

លោកស្រី Lari បាននិយាយថា ប្រទេសអ៊ីរ៉ង់បានរាយការណ៍ពីករណីឆ្លងថ្មីនៃជំងឺកូវីដ ១៩ ចំនួន ៧,៥៩៣ ករណី និងស្លាប់ថ្មី ៨៨ នាក់ក្នុងរយៈពេល ២៤ ម៉ោងចុងក្រោយកាលពីថ្ងៃអាទិត្យ ។

គួរបញ្ជាក់ថា គិតត្រឹមពេលនេះប្រទេសអ៊ីរ៉ង់មានករណីឆ្លងជំងឺកូវីដ ១៩ សរុបចំនួន ១,៧៤៦,៩៥៣ ករណី និងមានអ្នកស្លាប់ចំនួន ៦១,២៣០ នាក់ ខណៈអ្នកជាសះស្បើយមាន ១,៤៩២,៤៨៨ នាក់ ចំណែកអ្នកកំពុងសម្រាកព្យាបាលមាន ១៩៣,២៣៥ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ អ៊ីរ៉ង់ឲ្យសហរដ្ឋអាមេរិកដកទណ្ឌកម្មទាំងអស់ មុនពេលចរចា

ចុចអាន ៖ អ៊ីរ៉ង់និងរុស្ស៊ី រួមគ្នាធ្វើសមយុទ្ធដែនសមុទ្របន្ទាប់ពីរងការស្តីបន្ទោស បាញ់​រ៉ុកកែតដាក់មូលដ្ឋានអាមេរិកនៅ អ៊ីរ៉ាក់