ព័ត៌មានអន្ដរជាតិ

ស្លាប់រដ្ឋមន្ត្រីតាលីបង់ម្នាក់ ក្នុងហេតុការណ៍បំផ្ទុះគ្រាប់បែកអត្តឃាតនៅអាហ្វហ្គានីស្ថាន

បានផុស

៣ ខែ មុន

នៅ

ថ្ងៃព្រហស្បតិ៍ ១២ ធ្នូ ២០២៤

ដោយ

Chheang

រដ្ឋមន្ត្រីជនភៀសខ្លួនតាលីបង់ ត្រូវបានសម្លាប់នៅក្នុងការបំផ្ទុះគ្រាប់បែកអត្តឃាតដែលធ្វើឡើងដោយក្រុម ISIS នៅរដ្ឋធានីកាប៊ុល ប្រទេសអាហ្វហ្គានីស្ថាន កាលពីថ្ងៃពុធទី១១ខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Khalil Haqqani ដែលបានបាត់បង់ជីវិត ត្រូវជាពូរបស់លោក Sirajuddin Haqqani រដ្ឋមន្ត្រីក្រសួងមហាផ្ទៃតាលីបង់បច្ចុប្បន្ន ហើយក៏ជាមេក្រុមដឹកនាំបណ្តាញក្រុមអ៊ីស្លាម Haqqani ដ៏មានឥទ្ធិពល និងជាផ្នែកនៃចលនាតាលីបង់ ដែលត្រូវសហរដ្ឋអាមេរិកចាត់ទុកជាភេរវករលំដាប់ពិភពលោក។

បើយោងតាមការចុះផ្សាយរបស់ CNN នៅថ្ងៃទី១២ធ្នូ ជនបង្កហេតុ បានក្លែងខ្លួនជាអ្នកមកទស្សនាបរិវេណក្រសួងជនភៀសខ្លួន ហើយបានបំផ្ទុះគ្រាប់បែកអត្តឃាត ខណៈដែលលោក Haqqani កំពុងចុះហត្ថលេខាលើឯកសារ។ មនុស្ស ៦នាក់ផ្សេងទៀតក៏ត្រូវបានសម្លាប់នៅក្នុងហេតុការណ៍នេះដែរ។

ក្រុមតាលីបង់បានស្តីបន្ទោសក្រុមឧទ្ទាម ISIS សម្រាប់ហេតុការណ៍បំផ្ទុះគ្រាប់បែកអត្តឃាត ហើយបានហៅការវាយប្រហារនេះថាជា «ការវាយប្រហារកំសាកញី»។ យ៉ាងណាមិញ មកទល់នឹងពេលឥឡូវ ក្រុម ISIS មិនទាន់អះអាងថាខ្លួនពិតជានៅពីការវាយប្រហារនេះនៅឡើយទេ។

សូមបញ្ជាក់ថា ចាប់តាំងពីក្រុមតាលីបង់បានវិលត្រឡប់មកកាន់អំណាចនៅអាហ្វហ្គានីស្ថានកាលពីបីឆ្នាំមុន លោក Haqqani គឺជាជនរងគ្រោះចុងក្រោយបង្អស់ ដែលមានតួនាទីជាមន្ត្រីជាន់ខ្ពស់ និងជាបុគ្គលដ៏ល្បីបំផុតមួយនៅក្នុងក្រុមតាលីបង់។

ក្នុងឆ្នាំ២០១១ សហរដ្ឋអាមេរិកបានចាត់ថ្នាក់លោក Khalil Haqqani ថាជាភេរវករសកល ដោយប្រកាសផ្តល់ប្រាក់រង្វាន់រហូតដល់ ៥លានដុល្លារ សម្រាប់ព័ត៌មានដែលទាក់ទងនឹងគាត់។ លោក Haqqani ក៏ស្ថិតក្នុងបញ្ជីទណ្ឌកម្មឆ្នាំ១៩៨៨ របស់ក្រុមប្រឹក្សាសន្តិសុខអង្គការសហប្រជាជាតិផងដែរ៕

ដោយ៖ ឈាង