ព័ត៌មានអន្ដរជាតិ

មេទ័ពកូរ៉េខាងត្បូងម្នាក់ ត្រូវព្យួរពីការងារ ព្រោះមានឈ្មោះលើក្រឹត្យមួយអំឡុងច្បាប់អាជ្ញាសឹក

បានផុស

៣ ខែ មុន

នៅ

ថ្ងៃព្រហស្បតិ៍ ១២ ធ្នូ ២០២៤

ដោយ

Chheang

ឧត្តមសេនីយ៍ទោ Park An-su អគ្គសេនាធិការកងទ័ពជើងគោក ដែលបានបម្រើការជាអគ្គមេបញ្ជាការច្បាប់អាជ្ញាសឹក អំឡុងពេលលោកប្រធានាធិបតី Yoon Suk Yeol បានដាក់បទបញ្ជារយៈពេលខ្លីកាលពីសប្តាហ៍មុន ត្រូវបានក្រសួងការពារជាតិព្យួរពីតួនាទីនៅថ្ងៃព្រហស្បតិ៍ទី១២ខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Park គឺជាមេទ័ពចុងក្រោយគេ ដែលត្រូវបានព្យួរពីតួនាទី ក្រោយការស៊ើបអង្កេតទ្រង់ទ្រាយធំ ជុំវិញការជាប់ពាក់ព័ន្ធរបស់ពួកគេនៅក្នុងការដាក់ច្បាប់អាជ្ញាសឹករបស់លោក Yoon កាលពីរាត្រីថ្ងៃទី៣ធ្នូ។

ភ្លាមៗបន្ទាប់ពីការប្រកាសច្បាប់អាជ្ញាសឹក ក្រឹត្យយោធាដែលរារាំងរាល់សកម្មភាពនយោបាយ ត្រូវបានដាក់ចេញនៅក្រោមឈ្មោះរបស់លោក Park។

យ៉ាងណា លោក Park បានប្រកែកក្នុងសម័យប្រជុំសភាថា លោកបានដឹងពីការដាក់ច្បាប់អាជ្ញាសឹកតាមរយៈសុន្ទរកថាតាមទូរទស្សន៍របស់លោក Yoon តែប៉ុណ្ណោះ ដោយអះអាងថា លោកមិនជាប់ពាក់ព័ន្ធនឹងសេចក្ដីព្រាងឯកសារអ្វីឡើយ។

លោកបានស្នើសុំលាលែងពីតំណែងទៅកាន់អតីតរដ្ឋមន្ត្រីការពារជាតិ លោក Kim Yong-hyun នៅថ្ងៃដែលច្បាប់អាជ្ញាសឹកត្រូវបានគេដកចេញ ប៉ុន្តែបានបន្តកាន់តំណែងនេះទៀត បន្ទាប់ពីលោក Yoon បានបដិសេធសំណើរបស់លោក។

សូមបញ្ជាក់ថា ក្រសួងការពារជាតិកូរ៉េខាងត្បូង បានព្យួរការងារយោធាជាន់ខ្ពស់ចំនួន៦នាក់រួចមកហើយ រួមមាន មេបញ្ជាការនៃបញ្ជាការដ្ឋានការពាររដ្ឋធានី បញ្ជាការសឹករងពិសេសកងទ័ព បញ្ជាការប្រឆាំងចារកម្ម និងបញ្ជាការចារកម្មការពារជាតិ៕

ដោយ៖ ឈាង