មុន​ចប់​អាណត្តិ លោក បៃដិន ​សម្រាល​​ទោស​ដល់​អ្នក​ជាប់​ឃុំច្រើន​បំផុត​ត្រឹម​តែមួយថ្ងៃ

លោកប្រធានាធិបតី ចូ បៃដិន ​បាន​សម្រាល​​ការ​ដាក់​ទោស​​ដល់​មនុស្សប្រហែល១៥០០​នាក់ ដោយ​ការ​ដោះលែងពីពន្ធនាគារ និងដាក់ឱ្យនៅក្រៅ​​​ឃុំ​ ក្នុង​កំហុស​ដែល​ប្រព្រឹត្ត​ក្នុង​អំឡុងពេលមានការរាតត្បាត​កូវីដ​​១៩ និងបានលើកលែងទោសជនជាតិអាមេរិកចំនួន៣៩នាក់ដែលត្រូវបានកាត់ទោសពីបទឧក្រិដ្ឋកម្ម​ដោយ​អំពើ​អហិង្សា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​APនៅថ្ងៃទី១៣ខែធ្នូនេះ។

ការផ្លាស់ប្តូរដែលបានប្រកាស​នៅ​ថ្ងៃព្រហស្បតិ៍គឺសម្រាប់មនុស្សដែលបានអនុវត្តការកាត់ទោស​ជាប់​ឃុំ​នៅផ្ទះ​យ៉ាងហោចណាស់មួយឆ្នាំ​ បន្ទាប់ពីពួកគេត្រូវបានដោះលែង។ ដោយសារពេលនោះពន្ធនាគារមានលក្ខណៈមិនល្អសម្រាប់ការរីករាលដាលមេរោគ​កូវីដ​​១៩​ ហើយអ្នកទោសមួយចំនួនត្រូវបានដោះលែងជាផ្នែកមួយដើម្បីបញ្ឈប់ការរីករាល​ដាល​កូវីដ១៩។

លោក បៃដិន បាននិយាយថា លោកនឹងចាត់វិធានការបន្ថែមទៀត នៅប៉ុន្មានសប្តាហ៍ខាងមុខ ហើយនឹងបន្តពិនិត្យឡើងវិញនូវញត្តិស្តីពីការលើកលែងទោស។ ទង្វើនៃការលើកលែងទោសដ៏ធំបំផុតទីពីរ បន្ទាប់ពី​អតីត​ប្រធានាធិបតី​ Barack Obama ដែល​ដោះលែង​​​អ្នក​ជាប់​ឃុំ​​៣៣០​នាក់​ភ្លាមៗមុនពេលចាកចេញពីតំណែងក្នុងឆ្នាំ​២០១៧។

លោក បៃដិន បាននិយាយនៅក្នុងសេចក្តីថ្លែងការណ៍មួយថា៖​«អាមេរិកត្រូវបានបង្កើតឡើងនៅលើការសន្យានៃលទ្ធភាព និងឱកាសទីពីរ។ ក្នុងនាមជាប្រធានាធិបតី ខ្ញុំមានឯកសិទ្ធិដ៏អស្ចារ្យក្នុងការពង្រីកសេចក្តីមេត្តាករុណាដល់មនុស្សដែលបានបង្ហាញពីវិប្បដិសារី និងការស្តារនីតិសម្បទាឡើងវិញ ផ្តល់ឱកាសសម្រាប់ជនជាតិអាមេរិកក្នុងការចូលរួមក្នុងជីវិតប្រចាំថ្ងៃ និងរួមចំណែកដល់សហគមន៍របស់ពួកគេ និងចាត់វិធានការដើម្បីលុបបំបាត់ភាពខុសគ្នានៃការកាត់ទោសចំពោះជនល្មើសអហិង្សា ជាពិសេសជន​ត្រូវ​ចោទ​ពី​បទ​ល្មើស​គ្រឿង​ញៀន»។

គួរបញ្ជាក់ថា ការ​លើក​លែង​ទោស​នេះ​ធ្វើ​ឡើង​បន្ទាប់​ពី​ការ​លើក​លែង​ទោស​យ៉ាង​ទូលំទូលាយចំពោះ​កូន​ប្រុស​របស់​គាត់ Hunter ដែល​ត្រូវ​បាន​កាត់​ទោស​ពី​បទ​ឧក្រិដ្ឋកម្ម​កាំភ្លើង និង​ពន្ធ។ គាត់ក៏កំពុងថ្លឹងថ្លែងថាតើត្រូវចេញការលើកលែងទោសជាមុនដល់អ្នកដែលបានស៊ើបអង្កេតកិច្ចខិតខំប្រឹងប្រែងរបស់លោក ត្រាំ ក្នុងការលុបចោលលទ្ធផលនៃការបោះឆ្នោតប្រធានាធិបតីឆ្នាំ ២០២០ហើយកំពុងប្រឈមមុខនឹងការសងសឹកដែលអាចកើតមាននៅពេលគាត់ចូលកាន់តំណែង៕

អត្ថបទ៖ ប៊ុន សុភាព