ព័ត៌មានអន្ដរជាតិ

បរិយាយពីសង្គ្រាមរុស្ស៊ី-អ៊ុយក្រែនឆ្ពោះទៅខួបសង្គ្រាម៣ឆ្នាំ

បានផុស

២១ វិនាទី មុន

នៅ

ថ្ងៃសុក្រ ១៣ ធ្នូ ២០២៤

ដោយ

ធ្មេបបើកៗ នៅខ្វះតែ២ខែនិង១០ថ្ងៃទៀតប៉ុណ្ណោះ សង្គ្រាមរវាងអ៊ុយក្រែននិងរុស្ស៊ីដែលជាប្រទេសធំផុតលេខ និងជាមហាអំណាចនុយក្លេអ៊ែររ នឹងត្រូវគេប្រារព្ធខួប៣ឆ្នាំ ដោយភាគីសង្គ្រាមនិមួយៗទំនងបង្ហាញដល់ប្រជាជនខ្លួនឯងនិងពិភពលោកនូវរូបភាពនៃការបំផ្លិចបំផ្លាញកើតចេញពីសង្គ្រាម ក៏ដូចជាភាពអង់អាចក្លាហានរបស់យោធាពួកគេរៀងៗខ្លួន ព្រមទាំង យុទ្ធោបករណ៍ដែលពួកគេរឹបអួសបានពីភាគីបច្ចាមិត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វាច្បាស់ណាស់ថា អ៊ុយក្រែននឹងតាំងបង្ហាញនូវពិព័រណ៍រូបភាពសោកសៅនៃការស្លាប់ ការរងរបួស ទុក្ខវេទនានៃការប្រាសព្រាត់ ការបំផ្លិចបំផ្លាញអគារ ហេដ្ឋារចនាសម្ព័ន្ធផ្លូវថ្នល់ វិហារសាសនាប្រណីតៗ រោងចក្រអគ្គិសនីជាដើម ខណៈភាគីរុស្សីអាចបង្ហាញនូវមោទនភាពរបស់ខ្លួនក្នុងការចាប់រឹបអូសបាននូវអាវុធយុទ្ធភ័ណ្ឌដែលឧបត្ថម្ភពីបស្ចឹមលោក។

ក្នុងសង្គ្រាម៣២ខែកន្លងមកនេះ ភាគីអ៊ុយក្រែនដែលដឹកនាំដោយអតីតតារាសម្តែង វ៉ុលឌីមៀ ហ្សេលេនស្គី ដែលបានជាប់ឆ្នោតឡើងកាន់អំណាចកាលឆ្នាំ២០១៩ ហាក់បង្ហាញភាពខ្លាំងផង ភាពទន់ខ្សោយផង ភាពអស់សង្ឃឹមផង។ ភាពទន់ខ្សោយ និងអស់សង្ឃឹម ដោយសារតែអ៊ុយក្រែនពឹងលើដង្ហើមបរទេសសម្រាប់ដកក្នុងការប្រយុទ្ធតតាំងជាមួយរុស្ស៊ី។

បើក្រឡេកមើលទៅអ៊ុយក្រែនហាក់ដូចជាតួអង្គរងគ្រោះដែលត្រូវរុស្ស៊ីកំពុងធ្វើបាបយ៉ាងខ្លាំងក្នុងនាមជាប្រទេសតូចតាចនៅក្បែរមហាអំណាចធំ ដោយសារតែខ្លួនចង់ធ្វើអ្វីក៏មិន ចង់ឯករាជ្យក៏មិនកើត ចង់ចូលសមាគមផ្សេងក៏បាក ចង់ស្និទ្ធនឹងអ្នកក្រៅក៏មានហានិភ័យ។

ក្នុងសង្គ្រាមដ៏ធំសម្បើមប្រចាំដើមសតវត្សរ៍ទី២១នេះ ផ្ទុយពីការអស់សង្ឃឹម អ៊ុយក្រែនមិននៅម្នាក់ឯងនោះទេ។ ផ្ទុយទៅវិញអ៊ុយក្រែនជាអ្នកប្រយុទ្ធដើម្បីសេរីភាព ឬតំណាងឲ្យប្លុកសេរីបស្ចឹមប្រទេស មានសហរដ្ឋអាមេរិក សមាជិកអឺរ៉ុបភាគច្រើនជាពិសេសអឺរ៉ុបខាងលិច មានបារាំង អង់់គ្លេស អាល្លឺម៉ង់ អ៊ីតាលី អេស្ប៉ាញជាដើម ដែលសុទ្ធសឹងជាប្រទេសមហាអំណាចសេដ្ឋកិច្ចនិងយោធា។

ក្នុងសង្គ្រាមអូសបន្លាយដែលមិនទាន់ឃើញពន្លឺនៃថ្ងៃបញ្ចប់នេះ ពេលខ្លះអ៊ុយក្រែនត្រូវបានគេស្តីបន្ទោសថា មានមេដឹកនាំវ័យក្មេង មិនចេះសង្គ្រាម មិនចេះយុទ្ធសាស្ត្រនយោបាយ និងមានប្រវត្តិត្រឹមជាតួលេងកំប្លែង ប៉ុន្តែសម្រាប់ពេលខ្លះវិញ អ៊ុយក្រែនទទួលបានការកោតសរសើរថា ជាប្រទេសដ៏ក្លាហានហ៊ានក្រោកឈរប្រយុទ្ធជាមួយមហាអំណាចនុយក្លេអ៊ែររុស្ស៊ី ដែលប៉ុនប៉ងវាទីមិនត្រឹមតែអ៊ុយក្រែននោះទេ ប៉ុន្តេអាចនៅអឺរ៉ុបខាងកើតទាំងមូលដើម្បីបង្រួបបង្រួមដូចអតីតសហភាពសូវៀតឡើងវិញដើម្បីមានភាពស្មើមុខស្មើមាត់ជាមួយប្លុកសេរី ដោយយកលេសថា អង្គការប្រដាប់អាវុធណាតូគំរាមកំហែងដល់សន្តិសុខរបស់ខ្លួន ដោយពង្រីកខ្លួនទៅកាន់រុស្ស៊ីជាដរាប។

រូបភាពផ្គុំគ្នារវាងលោក ពូទីន និង លោក ហ្សេលេនស្គី។ NBC

ជាការពិតណាស់ បើក្រឡេកមើលទៅចំណុចចាប់ផ្តើមនៃសង្គ្រាមនៅតំបន់អឺរ៉ុបខាងកើតមួយនេះ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានសន្យាថា ខ្លួននឹងប្រើពេលតែ៤៨ឬក៏៧២ម៉ោងដើម្បីផ្លាស់ប្តូរក្បាលម៉ាស៊ីនដឹកនាំរដ្ឋាភិបាលអ៊ុយក្រែន ប៉ុន្តែក្តីរំពឹងរបស់ភាគីរុស្ស៊ីបានក្លាយជាអំបិលត្រូវទឹក ក្រោយការបញ្ជូនកងទ័ពចូលទៅយ៉ាងច្រើនសន្ទឹកសន្ទាប់ និងគ្មានការប្រុងប្រយ័ត្នតាមរបៀបសង្គ្រាម ក៏ត្រូវយោធាអ៊ុយក្រែនវាយផ្តាច់ជាកង់ៗ ធ្វើឲ្យខូចខាតសម្ភារៈយោធា រថយន្ត និងស្លាប់យោធាយ៉ាងច្រើន។

ចាប់តាំងពីពេលបាក់ទ័ពលើកដំបូង រុស្ស៊ីហាក់ខ្លាចរអាខ្លាំងមិនហ៊ានបញ្ចេញទ័ពថ្មើជើងនោះទេ គឺប្រើតែទ័ពអាកាស និងការបាញ់ផ្លោងពីចម្ងាយប៉ិណ្ណោះ ដើម្បីធ្វើឲ្យហេដ្ឋារចនាសម្ព័ន្ធយោធា ក៏ដូចជាហេដ្ឋារចនាសម្ព័ន្ធស៊ីវិលរបស់អ៊ុយក្រែនខ្ទេចខ្ទាំងអស់។ ការប្រយុទ្ធរបៀបទ័ពអាកាសនិងការបាញ់ផ្លោងពីចម្ងាយ ក៏ដូចជាការប្រើប្រាស់យន្តហោះគ្មានមនុស្សបើក គឺប្រើប្រាស់ពេលច្រើនខែ ទំរាំរុស្ស៊ីអាចប្រមូលផ្តុំកងទ័ពឡើងវិញ។

ក្នុងអំឡុងខែកញ្ញាឆ្នាំ២០២២ ពោលគឺ៧ខែក្រោយការឈ្លានពានចូលទឹកដីអ៊ុយក្រែន ប្រធានាធិបតីរុស្ស៊ី លោក ពូទីន បានសម្រេចធ្វើរឿងធំៗជាច្រើនជុំវិញសង្គ្រាមនេះ ដូចជា ការកេណ្ឌទ័ពលោកដំបូងរហូតដល់២០ម៉ឺននាក់ដើម្បីបញ្ជូនទៅសមរភូមិមុខ និងរឿងសំខាន់មួយទៀត គឺការចេញក្រឹត្យកំណត់កាត់ដី៤ខេត្តឬតំបន់របស់អ៊ុយក្រែនភ្ជាប់ជាមួយទឹកដីរុស្ស៊ី។ ខេត្តទាំង៤នោះ រួមមាន Donetsk, Kherson, Luhansk និង Zaporizhzhia ដែលស្ថិតនៅភាគខាងត្បូងនិងភាគអាគ្នេយ៍នៃប្រទេសអ៊ុយក្រែន។