ព័ត៌មានអន្ដរជាតិ

លោក ស៊ី ជីនពីង ទំនងជាមិនចូលរួមពិធីឡើងកាន់តំណែងលោក ត្រាំ នោះទេ

បានផុស

៣ ខែ មុន

នៅ

ថ្ងៃសៅរ៍ ១៤ ធ្នូ ២០២៤

ដោយ

Chheang

ប្រធានាធិបតីចិន លោក ស៊ី ជីនពីង ទំនងជាមិនទៅចូលរួមពិធីឡើងកាន់តំណែងប្រធានាធិបតីអាមេរិកនាខែមករាខាងមុខទេ បើទោះបីជាមានការអញ្ជើញពីលោក ដូណាល់ ត្រាំ ក៏ដោយ។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃទី១៣ខែធ្នូឆ្នាំ២០២៤។

លោក ស៊ី ជីនពីង និងលោក ដូណាល់ ត្រាំ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមប្រភពរបស់ BBC ឯកអគ្គរដ្ឋទូតចិនប្រចាំនៅសហរដ្ឋអាមេរិក ត្រូវបានគេរំពឹងថានឹងចូលរួម ហើយមន្ត្រីផ្សេងទៀតមកពីទីក្រុងប៉េកាំង ក៏អាចចូលរួមផងដែរ លើកលែងតែវត្តមានរបស់លោក ស៊ី។

សារព័ត៌មានអាមេរិក បានចុះផ្សាយព្រោងព្រាតថា ប្រធានាធិបតីជាប់ឆ្នោតអាមេរិកលោក ដូណាល់ ត្រាំ បានអញ្ជើញមេដឹកនាំចិន លោក ស៊ី ជីនពីង ឲ្យទៅចូលរួមក្នុងពិធីស្បថចូលកាន់តំណែងរបស់លោកនៅរដ្ឋធានីវ៉ាស៊ីនតោន។

លោកស្រី Karoline Leavitt ដែលជាអ្នកនាំពាក្យរបស់លោក ត្រាំ បានប្រាប់សារព័ត៌មាន Fox News ថា៖ «នេះគឺជាឧទាហរណ៍មួយរបស់ប្រធានាធិបតី ត្រាំ ក្នុងការបង្កើតការសន្ទនាបើកចំហជាមួយមេដឹកនាំនៃប្រទេសនានា ដែលមិនមែនគ្រាន់តែជាសម្ព័ន្ធមិត្តប៉ុណ្ណោះទេ ប៉ុន្តែជាសត្រូវរបស់យើង និងដៃគូប្រកួតប្រជែងរបស់យើងផងដែរ»។

លោក ត្រាំ ធ្លាប់បានសរសើរលោក ស៊ី ប៉ុន្មានដងរួចមកហើយ ប៉ុន្តែលោកក៏ធ្លាប់បានរិះគន់ចិនយ៉ាងខ្លាំងផងដែរ។ លោកបានប្រកាសដំឡើងពន្ធយ៉ាងច្រើនលើទំនិញនាំចូលពីចិន នៅពេលលោកចូលកាន់តំណែងនៅខែមករាឆ្នាំ២០២៥។

លោក ត្រាំ បានតែងតាំងលោក Marco Rubio ជារដ្ឋលេខាធិការ និងលោក Mike Waltz ជាទីប្រឹក្សាសន្តិសុខជាតិ ខណៈបុគ្គលទាំងពីររូបនេះគឺជាអ្នករិះគន់យ៉ាងខ្លាំងចំពោះរដ្ឋាភិបាលចិន។

រដ្ឋាភិបាលចិន បានដាក់ទណ្ឌកម្មលើលោក Rubio ហើយនៅឆ្នាំ២០២០ បានហាមប្រាមគាត់មិនឲ្យចូលប្រទេសឡើយ។

លោក Waltz បានជំរុញឲ្យសហរដ្ឋអាមេរិកបញ្ចប់ជម្លោះនៅអ៊ុយក្រែន និងមជ្ឈិមបូព៌ាជាបន្ទាន់ ដើម្បី «ប្រឆាំងនឹងការគំរាមកំហែងកាន់តែខ្លាំងពីបក្សកុម្មុយនិស្តចិន»។

ថ្មីៗនេះ ទីភ្នាក់ងារចារកម្មអាមេរិក បាននិយាយថា ចិនគឺជាអ្នកនៅពីក្រោយការលួចចូលក្រុមហ៊ុនទូរគមនាគមន៍ធំៗចំនួន៨របស់អាមេរិក។ យោងតាមសេតវិមាន ពួក Hacker ប្រហែលជាបានចូលប្រើទិន្នន័យលើជនជាតិអាមេរិករាប់លាននាក់ឯណោះ៕

ដោយ៖ ឈាង

ចុចអាន៖ លោក ត្រាំ អញ្ជើញលោកស៊ី ឲ្យចូលរួមពិធីស្បថចូលកាន់តំណែង នៅវ៉ាស៊ីនតោន