ចិន៖ ហ្វីលីពីន បង្ក​បញ្ហា​នៅ​សមុទ្រ​ចិន​ខាង​ត្បូង ព្រោះ​អាង​មាន​អាមេរិក​ជា​ខ្នង​បង្អែក

នៅ​ថ្ងៃ​ទី​១៣​ខែ​ធ្នូ​ឆ្នាំ​២០២៤ រដ្ឋាភិបាល​ក្រុង​ប៉េកាំង បានចោទប្រកាន់ហ្វីលីពីន​ ថាបានបង្កបញ្ហានៅក្នុងសមុទ្រចិនខាងត្បូង ព្រោះ​មាន​​សហរដ្ឋ​​អាមេរិក​​ខ្នង​បង្អែក។ ការ​​ចោទ​ប្រកាន់​​នេះ ធ្វើ​ឡើង​​មួយសប្តាហ៍បន្ទាប់ពី​ចិន និងហ្វីលីពីន បាន​​ចង្អុល​មុខ​​​គ្នា​ទៅ​វិញ​ទៅ​មក ជុំវិញការ​ប៉ះ​ទង្គិច​ថ្មីមួយនៅក្នុងដែនទឹក​ជម្លោះ។

លោក Wu Qian អ្នកនាំពាក្យក្រសួងការពារជាតិចិន បាននិយាយនៅលើគណនី WeChat ផ្លូវការរបស់ខ្លួនថា៖ «ភាគីហ្វីលីពីន ដោយមានការគាំទ្រ និងការ​ល្បួង​ពីសហរដ្ឋអាមេរិក បាននិងកំពុងបង្កបញ្ហានៅកន្លែងជាច្រើននៅក្នុងសមុទ្រចិនខាងត្បូង។ ហ្វីលីពីន ដឹងច្បាស់ថា វិសាលភាពនៃទឹកដីរបស់ខ្លួនត្រូវបានកំណត់ដោយសន្ធិសញ្ញាអន្តរជាតិជាបន្តបន្ទាប់ ហើយមិនដែលបានរាប់បញ្ចូល​ប្រជុំ​កោះ Spratly និង Scarborough Shoal របស់ចិនឡើយ»។

ទីក្រុងប៉េកាំង និងទីក្រុងម៉ានីល នៅ​ឆ្នាំ​២០២៤​នេះ​បាន​ប្រឈមមុខដាក់គ្នាជាបន្តបន្ទាប់នៅឯ​តំបន់​ថ្មប៉ប្រះទឹក និងតំបន់​មួយ​ចំនួន​នៅសមុទ្រចិនខាងត្បូង។

ចិន​ បាន​ទាមទារ​ស្ទើរ​តែ​ទាំង​ស្រុង​នូវ​អធិបតេយ្យ​​ក្នុង​សមុទ្រ​ចិន​ខាង​ត្បូង ខណៈហ្វីលីពីន ព្រុយណេ ម៉ាឡេស៊ី តៃវ៉ាន់ និងវៀតណាម ក៏ទាមទារផ្នែកខ្លះ​ផងដែរ។ ពួកគេមានការព្រួយបារម្ភចំពោះការទាមទារដ៏ធំធេងរបស់​ចិន ដែល​បានរំលោភចូលទៅក្នុងតំបន់សេដ្ឋកិច្ចផ្តាច់មុខរបស់ពួកគេ (EEZs) ដែលលាតសន្ធឹងចម្ងាយ ៣៧០​គីឡូម៉ែត្រពីឆ្នេរសមុទ្រនៃទឹកដីរបស់ប្រទេស​នីមួយៗ។

ក្រុមប្រឹក្សាដែនសមុទ្រជាតិ និងក្រុមប្រឹក្សាសន្តិសុខជាតិរបស់ហ្វីលីពីន មិនបានឆ្លើយតបភ្លាមៗចំពោះសំណើសុំការអត្ថាធិប្បាយលើការចោទ​ប្រកាន់​ចុងក្រោយពីទីក្រុងប៉េកាំងនោះទេ។ ចំណែក​​ឯ​កងនាវាចរ​ណ៍​លេខ​៧ របស់កងទ័ពជើងទឹកអាមេរិក ក៏មិនបានឆ្លើយតបភ្លាមៗចំពោះសំណើសុំការអត្ថាធិប្បាយដែរ។

យ៉ាង​ណា កាល​ពី​សប្ដាហ៍​មុន មន្ត្រីហ្វីលីពីន បាននិយាយថា កប៉ាល់ឆ្មាំំសមុទ្រចិនបានបាញ់កាំភ្លើង​ទឹក​បណ្ដេញ​ទូកការិយាល័យជលផលក្រុងម៉ានីល ដែលកំពុងធ្វើដំណើរដើម្បីចែកចាយ​របស់របរ​ដល់​ក្រុម​អ្នកនេសាទហ្វីលីពីននៅជុំវិញតំបន់ Scarborough Shoal។

ប៉ុន្តែ​​ឆ្មាំ​សមុទ្រ​ចិន បាន​តប​ត​ថា កប៉ាល់ហ្វីលីពីនចំនួន​៤​គ្រឿង​បានព្យាយាមចូលទៅក្នុងដែនទឹកដែលខ្លួនពិពណ៌នាថាជារបស់ខ្លួននៅជុំវិញ​តំបន់ Scarborough Shoal ដែលទីក្រុងប៉េកាំងហៅថាកោះ Huangyan៕

ដោយ៖ ឈាង