ព័ត៌មានអន្ដរជាតិ

ស្លូវ៉ាគី ប្រាប់ឲ្យអ៊ុយក្រែន ព្រមកាត់ដីឲ្យរុស្ស៊ី ដើម្បីដូរយកសន្តិភាព

បានផុស

៣ ខែ មុន

នៅ

ថ្ងៃចន្ទ ១៦ ធ្នូ ២០២៤

ដោយ

ថ្លែងប្រាប់ទូរទស្សន៍ STVR កាលពីថ្ងៃអាទិត្យទី១៥ខែធ្នូឆ្នាំ២០២៤ នាយករដ្ឋមន្ត្រីស្លូវ៉ាគី លោក Peter Pellegrini បានអះអាងថា សង្គ្រាមអ៊ុយក្រែននឹងចប់ នៅពេលទីក្រុងកៀវ យល់ព្រមកាត់ទឹកដីដែលបាត់បង់ហើយនោះ ទៅឲ្យរុស្ស៊ី។

នាយករដ្ឋមន្ត្រីស្លូវ៉ាគី លោក Peter Pellegrini (រូបថត៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចសម្ភាសដែលផ្សាយបន្តដោយសារព័ត៌មានរុស្ស៊ី RT, លោក Pellegrini និយាយថា «អ៊ុយក្រែនគ្មានថ្ងៃដណ្តើមយកទឹកដី Donetsk, Lugansk, Kherson, Zaporozhye និង Crimea មកវិញតាមរយៈការប្រើកម្លាំងនោះទេ។ នៅពេលនិយាយអំពីសន្តិភាព ខ្ញុំជឿថា យើងត្រូវទទួលស្គាល់ការពិត អ៊ុយក្រែននឹងមិនទទួលបានសន្តិភាពឡើយ បើមិនព្រមខាតទឹកដីខ្លះ»។

ស្របពេលជាមួយគ្នានោះ លោកក៏បានអំពាវនាវឲ្យភាគីទាំងពីរ ចូលមកកាន់តុចរចា ដើម្បីពិភាក្សាគ្នាអំពីបទឈប់បាញ់ឲ្យបានឆាប់តាមដែលអាចធ្វើទៅបានផងដែរ។

ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី (រូបថត៖ AP)

ទោះបីជាយ៉ាងណាក៏ដោយ លោក Andriy Yermak ប្រធានការិយាល័យប្រធានាធិបតីអ៊ុយក្រែន បានបញ្ជាក់ថា រដ្ឋាភិបាលក្រុងកៀវ មិនទាន់ត្រៀមខ្លួនរួចរាល់ ដើម្បីចាប់ផ្តើមកិច្ចចរចាជាមួយរុស្ស៊ីនៅឡើយទេ ដោយសារអ៊ុយក្រែនខ្វះខាតសព្វាវុធ ការធានាសន្តិសុខ និងឋានៈអន្តរជាតិដែលខ្លួនចង់បាន។

ថ្លែងប្រាប់ទូរទស្សន៍ Suspilne ដែលចាក់ផ្សាយកាលពីល្ងាចថ្ងៃព្រហស្បតិ៍ទី១២ខែធ្នូឆ្នាំ២០២៤លោក Yermak និយាយថា «យើងមិនមានអាវុធទេ យើងមិនមានស្ថានភាពដូចដែលយើងកំពុងនិយាយនោះឡើយ។ មានន័យថាជាការអញ្ជើញចូលអង្គការណាតូ និងការយល់ដឹងអំពីការធានាច្បាស់លាស់ដែលនឹងផ្តល់ឲ្យយើង ដូច្នេះយើងអាចប្រាកដថា ប្រធានាធិបតីរុស្ស៊ី វ្ល៉ាឌីមៀរ ពូទីន នឹងមិនត្រឡប់មកវិញឡើយ ក្នុងរយៈពេល ២ទៅ៣ឆ្នាំខាងមុខ»។

យ៉ាងណាមិញ ម្តងហើយម្តងទៀត រុស្ស៊ី តែងតែច្រានចោលនូវគំនិតរបស់អ៊ុយក្រែនដែលចង់ចូលណាតូ ហើយលោក ពូទីន ក៏និយាយដែរថា អ៊ុយក្រែនត្រូវទទួលស្គាល់ការកាត់យកទឹកដីផ្នែកខ្លះនៅតំបន់ចំនួន៤ ដែលរុស្ស៊ីដណ្ដើមបាន៕

អត្ថបទ៖ សុខ សុវណ្ណ

ចុចអាន៖ មន្ត្រីជាន់ខ្ពស់អ៊ុយក្រែន ថា ក្រុងកៀវមិនទាន់ត្រៀមខ្លួនចរចាជាមួយរុស្ស៊ីទេ