មនុស្ស​ស្លាប់​៣​នាក់ និង​​ផ្ទះ​ជន់លិចជាង​៤ម៉ឺន​ខ្នង ព្រោះ​ទឹកជំនន់​នៅ​ថៃ

យ៉ាងហោចណាស់មនុស្ស ៣​នាក់បានស្លាប់នៅក្នុង​គ្រោះ​ទឹកជំនន់ថ្មី ដែលបានវាយ​ប្រហារ​ខេត្តចំនួន​​៤ នៅភាគខាងត្បូង​ប្រទេស​ថៃ កាលពី​ថ្ងៃអាទិត្យ​ទី​១៥​ខែ​ធ្នូ​ឆ្នាំ​២០២៤។

យោ​ង​តាម​​ការ​ចុះ​ផ្សាយ​របស់ Bangkok Post នៅ​ថ្ងៃ​ចន្ទ​នេះ លោក Phatsakorn Bunyalak អគ្គនាយកនៃនាយកដ្ឋានបង្ការ និងកាត់បន្ថយគ្រោះមហន្តរាយ (DDPM) បាននិយាយថា ទឹកជំនន់នៅភាគខាងត្បូង​ បានជន់លិចផ្ទះយ៉ាងហោចណាស់ ៤៣ ៥៩៥​ខ្នងក្នុងស្រុកចំនួន​២៧ នៅ​​ខេត្ត Chumphon, Ranong, Surat Thani និង Nakhon Si Thammarat។

ខណៈពេលដែលទឹកជំនន់បានចាប់ផ្តើមស្រកក្នុងតំបន់ជាច្រើន អាជ្ញាធរក្នុងខេត្ត Surat Thani នៅតែស្ថិតក្នុងការប្រុងប្រយ័ត្នខ្ពស់ ព្រោះ​កម្រិតទឹកទន្លេ Tapee បន្តកើនឡើង។ នេះបើយោងតាមរបាយការណ៍របស់ DDPM។

លោក Phatsakorn បាន​ឲ្យ​ដឹង​ថា ទឹកជំនន់​ថ្មី​នេះ បានឆក់យកជីវិតមនុស្ស ៣​នាក់នៅក្នុងខេត្ត Nakhon Si Thammarat ដែលជាខេត្តរងគ្រោះខ្លាំងជាងគេ ដែលមានផ្ទះចំនួន ៣២ ៦០៨​ខ្នង​នៅ​ស្រុក​ចំនួន​១១ រងផលប៉ះពាល់។

សូម​​​ជម្រាប​ថា ចាប់តាំងពីថ្ងៃទី២២​ខែវិច្ឆិកា​មក​ ខេត្តចំនួន១១​ បានរាយការណ៍ពី​គ្រោះ​ទឹកជំនន់ ដែលប៉ះពាល់ដល់ផ្ទះចំនួន ៦៧៥ ១៦០​ខ្នង​ក្នុងស្រុកចំនួន​៩៨ នៅទូទាំងប្រទេស​ថៃ។ ទឹកជំនន់ បានឆក់យកជីវិតមនុស្សយ៉ាងហោចណាស់ ៣២នាក់៕

ដោយ៖ ឈាង