រថក្រោះ Abrams ដ៏ទំនើបរបស់អាមេរិក ៣៨គ្រឿង ទៅដល់ដៃតៃវ៉ាន់ ហើយ

នៅថ្ងៃចន្ទទី១៦ខែធ្នូឆ្នាំ២០២៤ ក្រសួងការពារជាតិកោះតៃវ៉ាន់ បានប្រកាសទទួលបានរថក្រោះ Abrams ដ៏ទំនើបចំនួន៣៨គ្រឿង ពីសហរដ្ឋអាមេរិក ដើម្បីយកមកពង្រឹងសមត្ថភាពយោធារបស់ខ្លួន ប្រឆាំងនឹងការគំរាមកំហែងរបស់ចិន ហើយនេះគឺជារថក្រោះថ្មីលើកដំបូងដែលអាមេរិក លក់ឲ្យតៃវ៉ាន់ ក្នុងរយៈពេល៣០ឆ្នាំចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីប្រកាសរបស់ក្រសួង រថក្រោះបានមកដល់កោះតៃវ៉ាន់ កាលពីរាត្រីថ្ងៃអាទិត្យ រួចក៏បញ្ជូនទៅកាន់មូលដ្ឋានហ្វឹកហ្វឺនទ័ពនៅតំបន់ Hsinchu ភាគខាងត្បូងទីក្រុងតៃប៉ិ។

តាមពិតទៅ តៃវ៉ាន់បានកុម្ម៉ង់ទិញរថក្រោះធុន M1A2 នេះចំនួន១០៨គ្រឿង តាំងតែពីឆ្នាំ២០២៤មកម្ល៉េះ ប៉ុន្តែទើបតែឆ្នាំ២០២៤ប៉ុណ្ណោះ ដែលអាមេរិកដឹកមក៣៨គ្រឿងសិន ខណៈរថក្រោះនៅសេសសល់ទៀត ប្រហែលជាត្រូវបញ្ជូនមកនៅឆ្នាំ២០២៥និង២០២៦ខាងមុខ។

បច្ចុប្បន្ន នៅក្នុងកងរថក្រោះរបស់រដ្ឋាភិបាលទីក្រុងតៃប៉ិ គឺមានរថក្រោះ CM 11 Brave Tiger ផលិតនៅតៃវ៉ាន់ និងរថក្រោះ M60A3 ផលិតនៅសហរដ្ឋអាមេរិក សរុបចូលគ្នាប្រហែល ១ ០០០ គ្រឿងហើយការទទួលបានរថក្រោះថ្មីនេះទៀត វានឹងជួយកម្លាំងយោធាតៃវ៉ាន់ ឲ្យរឹតតែខ្លាំង។

តាំងពីដើមមក សហរដ្ឋអាមេរិក គឺ​ជា​សម្ព័ន្ធមិត្ត​ដ៏​សំខាន់និង​ជា​អ្នក​ផ្គត់ផ្គង់​សព្វាវុធ​ធំ​បំផុត​របស់តៃវ៉ាន់ ដែលទង្វើនេះ ធ្វើឲ្យទីក្រុងប៉េកាំងតែងក្តៅស្លឹកត្រចៀកជានិច្ច។

ទោះបីជាយ៉ាងណាក៏ដោយ ជុំវិញការបញ្ជូនរថក្រោះពីសំណាក់អាមេរិក ទៅឲ្យទីក្រុងតៃប៉ិនាពេលនេះ គេមិនទាន់ឃើញមានប្រតិកម្មណាមួយពីសំណាក់ប្រទេសចិននោះទេ។

ដោយសារតែចិនតែងគំរាមនិងដាក់សម្ពាធលើខ្លួនជានិច្ចនោះ ឆ្នាំ២០២៥ តៃវ៉ាន់ នឹងអនុម័តកញ្ចប់ការពារក្នុងចំនួនទឹកប្រាក់ខ្ពស់បំផុត ២០.២៤ពាន់លានដុល្លារអាមេរិក ហើយគេជឿថា នៅឆ្នាំក្រោយៗទៀត តួលេខនឹងបន្តកើនឡើងជាលំដាប់៕

អត្ថបទ៖ សុខ សុវណ្ណ

ចុចអាន៖ ចិន៖ ការ​លក់​អាវុធ​អាមេរិក​ឲ្យ​តៃវ៉ាន់ ធ្វើ​ឲ្យ​ខូច​ទំនាក់ទំនង​ក្រុង​វ៉ាស៊ីនតោន-ប៉េកាំង