ព័ត៌មានអន្ដរជាតិ

អ៊ីស្រាអែល នឹងបង្កើនចំនួនពលរដ្ឋខ្លួនទ្វេដងឲ្យទៅរស់នៅតំបន់ Golan ដែលដណ្ដើមបានពីស៊ីរី

បានផុស

៣ ខែ មុន

នៅ

ថ្ងៃចន្ទ ១៦ ធ្នូ ២០២៤

ដោយ

Chheang

កាលពីថ្ងៃអាទិត្យទី១៥ខែធ្នូឆ្នាំ២០២៤ រដ្ឋាភិបាលអ៊ីស្រាអែល បានអនុម័តជាឯកច្ឆ័ន្ទលើផែនការតម្លៃជាង ១១លានដុល្លារ ដើម្បីលើកទឹកចិត្តដល់កំណើនប្រជាសាស្រ្តឲ្យបានទ្វេដងនៅក្នុងតំបន់ Golan Heights ដោយនិយាយថា ការគំរាមកំហែងពីប្រទេសស៊ីរីនៅតែមាន បើទោះបីជាមេដឹកនាំក្រុមឧទ្ទាមដែលផ្ដួលរំលំប្រធានាធិបតី Bashar al-Assad កាលពីមួយសប្តាហ៍មុន បានបង្ហាញពីកាយវិការទន់ភ្លន់ដាក់អ៊ីស្រាអែលក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនាយករដ្ឋមន្ត្រី បេនចាមីន ណេតាន់យ៉ាហ៊ូ បាននិយាយនៅក្នុងសេចក្តីថ្លែងការណ៍មួយថា៖ «ការពង្រឹងតំបន់ Golan គឺជាការពង្រឹងរដ្ឋអ៊ីស្រាអែល ហើយវាមានសារៈសំខាន់ជាពិសេសនៅពេលនេះ។ យើងនឹងបន្តកាន់កាប់វា ធ្វើវាឲ្យលូតលាស់ ហើយនិងតាំងទីលំនៅ»។

អ៊ីស្រាអែល បានដណ្តើមយកតំបន់ Golan Heights ពីប្រទេសស៊ីរី ក្នុងសម័យសង្រ្គាម៦ថ្ងៃឆ្នាំ១៩៦៧ ហើយដាក់ចូលជាឧបសម្ព័ន្ធរបស់ខ្លួនក្នុងឆ្នាំ១៩៨១។

កាលពីឆ្នាំ២០១៩ ប្រធានាធិបតីអាមេរិក លោក ដូណាល់ ត្រាំ បានប្រកាសគាំទ្រចំពោះអធិបតេយ្យភាពរបស់អ៊ីស្រាអែលលើតំបន់ Golan។ យ៉ាងណា ប្រទេសភាគច្រើនមិនបានទទួលស្គាល់នោះទេ។ ស៊ីរី ទាមទារឲ្យអ៊ីស្រាអែលដកខ្លួនចេញ ប៉ុន្តែអ៊ីស្រាអែលបដិសេធ ដោយលើកឡើងពីកង្វល់សន្តិសុខ។ ចំណែកឯកិច្ចខិតខំប្រឹងប្រែងសន្តិភាពផ្សេងៗជុំវិញបញ្ហាតំបន់ Golan ក៏បានបរាជ័យផងដែរ។

អារ៉ាប៊ីសាអូឌីត កាតា និងសហព័ន្ធអារ៉ាប់រួម បាននាំគ្នាថ្កោលទោសការសម្រេចចិត្តរបស់អ៊ីស្រាអែល ដោយពណ៌នាថា វាជា «ការប៉ុនប៉ងដោយចេតនា ដើម្បីពង្រីកការកាន់កាប់»។

លោក Avraham Levine អ្នកវិភាគនៃមជ្ឈមណ្ឌលស្រាវជ្រាវ និងអប់រំ Alma ដែលមានឯកទេសខាងបញ្ហាប្រឈមផ្នែកសន្តិសុខនៅភាគខាងជើងព្រំដែនអ៊ីស្រាអែល បាននិយាយថា ជនជាតិអ៊ីស្រាអែលប្រហែល ៣១ ០០០នាក់ បានតាំងទីលំនៅក្នុងតំបន់ Golan។ ប្រជាជននៅទីនោះ មានការងារភាគច្រើនក្នុងវិស័យកសិកម្ម និងទេសចរណ៍។ ក្រៅតែពីជនជាតិអ៊ីស្រាអែល តំបន់ Golan មានជនជាតិភាគតិចអារ៉ាប់ Druze រស់នៅចំនួន ២៤ ០០០នាក់៕

ដោយ៖ ឈាង