ពិភព​​លោក​​បង្កើន​​ការ​​អំពាវ​​នាវ​ តែ​យោធា​មីយ៉ាន់ម៉ា​​អត់​​ខ្វល់​ ​បន្ត​​បង្ក្រាប​​ដោយ​ហិង្សា

សហគមន៍​អន្តរជាតិនៅ​ថ្ងៃ​ចន្ទ ទី​១៥ ខែ​មីនា បាន​ទទួច​ឲ្យ​​មាន​ការ​អត់​ធ្មត់ បន្ទាប់​ពី​​ហោច​ណាស់​អ្នក​តវ៉ា​១១​នាក់​ត្រូវ​បាន​សម្លាប់​បន្ថែម​ទៀត​ ខណៈ​បាតុករ​កាន់​តែ​ច្រើន​​បាន​នាំ​គ្នាចេញ​តវ៉ា​តាម​ដង​ផ្លូវ​ដើម្បី​ទាមទារ​ឲ្យ​ស្តារ​ឡើង​វិញ​នូវ​លទ្ធិ​ប្រជា​ធិបតេយ្យ បើ​​​ទោះ​ជា​មាន​ការ​បង្ក្រាប​​ពោរ​ពេញ​ដោយ​​ថ្លុក​ឈាម​ពី​រដ្ឋាភិបាល​យោធា​ក៏​ដោយ។

អង្គការ​សហ​ប្រជា​ជាតិ សហ​រដ្ឋ​អាមេរិក ប្រទេសចិន និង​ចក្រ​ភព​អង់គ្លេស​បាន​ថ្កោល​ទោស​​ចំពោះ​ហិង្សា ខណៈ​អង្គការ​សហ​ប្រជា​ជាតិ​បាន​និយាយ​ថា យ៉ាង​ហោច​ណាស់​អ្នក​តវ៉ា​ដោយ​សន្តិ​វិធី​​១៣៨​នាក់​ហើយ​ត្រូវ​បាន​សម្លាប់ ក្នុង​នោះ​មាន​ទាំង​ស្ត្រី កុមារ និង​ព្រះ​សង្ឃ ចាប់​តាំង​ពី​ឧត្តម​សេនីយ៍​បាន​បណ្តេញមេដឹក​នាំ​ស៊ីវិល​លោកស្រី អ៊ុងសាន ស៊ូជី កាល​ពី​ថ្ងៃ​ទី​១ កុម្ភៈ។

ទោះ​បី​ជា​យ៉ាង​ណា រហូត​ដល់​ពេល​​នេះ​ ឧត្តម​សេនីយ៍​មីយ៉ាន់ម៉ា​គ្មាន​សញ្ញា​ណា​មួយ​ដែល​បង្ហាញ​ពី​ការ​អត់​ធ្មត់​ឡើយ។

កាល​ពី​ថ្ងៃ​អាទិត្យ ដែល​ជា​ថ្ងៃ​ថ្លុក​ឈាម​បំផុតដែល​មនុស្ស​ជិត​៤០​នាក់​ត្រូវ​បាន​សម្លាប់​ដោយ​កម្លាំង​សន្តិសុខ​។

ប៉ុន្តែ​ការ​សម្លាប់​នោះ​មិន​បាន​បញ្ឈប់​បាតុករ​​ឡើយ ពួក​គេ​នៅ​ថ្ងៃ​ចន្ទ​ម្សិល​មិញ​នៅ​តែ​បន្ត​ចេញ​មក​តវ៉ា​​ទៀត​។ នេះ​បើ​តាម​សាក្សី​បាន​និយាយ​ ហើយ​មាន​អ្នក​ស្លាប់​​១១​នាក់​ថែម​ទៀត។ អ្នក​ស្លាប់​នៅ​ថ្ងៃ​ចន្ទ​ត្រូវ​បាន​បាញ់​សម្លាប់​នៅ​ទី​កន្លែង​ផ្សេង​ៗ​គ្នា​នៅ​ទូទាំង​ប្រទេស។

អ្នក​នាំ​ពាក្យ​ក្រសួង​ការបរទេស​អាមេរិក​លោក​ស្រី Jalina Porter បាន​ប្រាប់​អ្នក​កាសែត​នៅ​ថ្ងៃ​ចន្ទ​ថា ៖«យោធា​មីយ៉ាន់ម៉ា​បាន​ឆ្លើយ​តប​ចំពោះ​ការ​អំពាវ​នាវ​ឲ្យ​ស្តារលទ្ធិ​ប្រជា​ធិបតេយ្យ​នៅ​ភូមា​ដោយ​គ្រាប់​កាំភ្លើង»។

លោក​ស្រី​ថា ៖«សហ​រដ្ឋ​អាមេរិក​បន្ត​អំពាវ​នាវ​ឲ្យ​គ្រប់​ប្រទេស​ទាំង​អស់​ចាត់​វិធាន​ការ​ម៉ឺងម៉ាត់​​​ដើម្បី​ប្រឆាំង​នឹង​រដ្ឋ​ប្រហារ»។

នៅ​ថ្ងៃ​ចន្ទលោក​ Stephane Dujarric អ្នក​នាំ​ពាក្យ​ ​អគ្គលេខាធិការ​អង្គការ​សហ​ប្រជា​ជាតិ​លោក Antonio Guterres ក៏​បាន​អំពាវ​នាវ​ឲ្យ​សហគមន៍​អន្តរជាតិ​រាប់​ទាំង​អ្នក​ដើរ​តួ​នៅ​ក្នុង​តំបន់​​ចេញ​មក​សាមគ្គី​​ជា​មួយ​ប្រជា​ជន​មីយ៉ាន់ម៉ា និង​សេចក្តី​ប្រាថ្នា​លទ្ធិប្រជា​ធិបតេយ្យ​របស់​ពួក​គេ។

ប្រេសិតត​អង្គការ​សហ​ប្រជា​ជាតិ​ប្រចាំ​នៅ​មីយ៉ាន់ម៉ា​ Christine Schraner Burgener ក៏​បាន​ថ្កោល​ទោស​ចំពោះ​ថ្ងៃ​ថ្លុក​ឈាម​កាល​​ពី​ថ្ងៃ​អាទិត្យ ខណៈ​ប្រទេស​ដែល​ជាអតីត​អាណា​និគម​របស់​ចក្រ​ភព​អង់គ្លេស​បាន​ធ្វើ​ឲ្យ​មាន​ការ​ភ្ញាក់​ផ្អើល​នៅ​ពេល​ប្រើ​កកម្លាំង​ប្រឆាំង​នឹង​ប្រជា​ជន​ស្លូត​ត្រង់។

នៅ​ថ្ងៃ​ចន្ទ រដ្ឋាភិបាល​ទី​ក្រុង​ប៉េកាំង​ក៏​បាន​ជំរុញ​ឲ្យ​របប​យោធា​មីយ៉ាន់ម៉ា​ជៀស​វាង​នូវ​​ការ​​កើត​ឡើង​វិញ​នូវ​ឧប្បត្តិ​ហេតុ​បែប​នេះ។

អ្នក​នាំ​ពាក្យ​ក្រសួង​ការ​បរទេស​ចិន​លោក Zhao Lijian បាន​អធិប្បាយហិង្សា​ថា​«គួរ​ឲ្យ​ស្អប់​ខ្ពើម»។

លោក​បាន​ប្រាប់​អ្នក​កាសែត​នៅ​ទី​ក្រុង​ប៉េកាំង​ថា ចិន​មាន​ការ​ព្រួយ​បារម្ភ​យ៉ាង​ខ្លាំង​ពី​សុវត្ថិភាព​ស្ថាប័ន និង​ប្រជា​ជន​ចិន។ លោក​បន្ថែម​ថា កម្លាំង​សន្តិសុខ​មីយ៉ាន់ម៉ា​បាន​ពង្រឹងនៅ​តំបន់​រោង​ចក្រ។

ជា​មួយ​គ្នា​នេះ កោះ​តៃវ៉ាន់ ក៏​បានណែនាំ​ទៅ​ក្រុម​ហ៊ុន​របស់​ខ្លួន​នៅ​ប្រទេស​មីយ៉ាន់ម៉ា​ឲ្យ​​ដោត​ទង់​ជាតិ​របស់​តៃវ៉ាន់​ដើម្បី​ជៀស​វាង​ពី​គោល​ដៅ។

ការ​វិវត្ត​ចុង​ក្រោយ​មួយ​ទៀត ហិង្សា​បាន​កើត​ឡើង​នៅ​រសៀល​ ថ្ងៃ​ចន្ទ​បណ្តាល​មក​ពី​ការ​បិទ​​បណ្តាញ​ទិន្ន័យ​ទូរសព្ទ​ទូទាំង​ប្រទេស​មីយ៉ាន់ម៉ា​ ហើយ​ក៏គម្រោង​​​បើក​សវនាការ ​លោក​ស្រី​ អ៊ុងសាន ស៊ូជី​ ​ត្រូវ​បាន​ពន្យារ​ពេល។

មេធាវី​របស់​លោក​ស្រី​ស៊ូជី លោក Khin Maung Zaw បាន​ប្រាប់​ AFP ថា សវនាការ​​លោក​ស្រី​ម្ចាស់​ពាន​ណូបែល​​ដែល​ធ្លាប់​ត្រូវ​បាន​ឃុំ​ខ្លួន​ក្នុង​ផ្ទះ​ជាង​១៥​ឆ្នាំ​កំឡុង​ពេល​របប​យោធា​គ្រប់​គ្រប់​គ្រង​គ្រោង​ធ្វើ​វេលា​ម៉ោង​១០​ព្រឹក ថ្ងៃស​ចន្ទ ​នៅ​ទី​ក្រុង Naypyidaw ប្រទេស​មីយ៉ាន់ម៉ា ប៉ុន្តែ​ត្រូវ​បាន​ពន្យារ​ពេល​ទៅ​ថ្ងៃ​ទី​២៤ ខែ​មីនា។

លោក​និយាយ​ថា ៖«មិន​មាន​ការ​ធ្វើ​សវនាការ​ទេ​ ពី​ព្រោះ​គ្មាន​អ៊ីនធើណេត ហើយ​​សវនាការ​គ្រោង​ធ្វើ​តាម​រយៈ​វីដេអូខល។ យើង​មិន​អាច​ខល​វីដេអូ​បាន​ទេ»៕

ប្រែ​សម្រួល៖ វីរបុត្រ
ប្រភព៖ CNA