ព័ត៌មានអន្ដរជាតិ

មេដឹកនាំម៉ាឡេស៊ី តែងតាំងអតីតនាយករដ្ឋមន្ត្រីថៃ ធ្វើជាទីប្រឹក្សាលើកិច្ចការអាស៊ាន

បានផុស

២ ខែ មុន

នៅ

ថ្ងៃចន្ទ ១៦ ធ្នូ ២០២៤

ដោយ

Chheang

អ្នកនយោបាយជើងចាស់ និងជាអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ត្រូវបានលោក អាន់វ៉ា អ៊ីប្រាហ៊ីម ជ្រើសតាំងធ្វើជាទីប្រឹក្សាផ្ទាល់ សម្រាប់កិច្ចប្រជុំអាស៊ានឆ្នាំ២០២៥ នៅពេលដែលម៉ាឡេស៊ីធ្វើជាម្ចាស់ផ្ទះ។

លោក អាន់វ៉ា អ៊ីប្រាហ៊ីម និងលោក ថាក់ស៊ីន ស៊ីណាវ៉ាត្រា (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អាន់វ៉ា បានប្រាប់នៅថ្ងៃចន្ទទី១៦ខែធ្នូឆ្នាំ២០២៤ថា តួនាទីរបស់លោក ថាក់ស៊ីន ក្នុងពេលម៉ាឡេស៊ីជាម្ចាស់ផ្ទះកិច្ចប្រជុំសមាគមប្រជាជាតិអាស៊ីអាគ្នេយ៍ នឹងក្លាយជាសមត្ថភាពក្រៅផ្លូវការមួយ អមជាមួយទីប្រឹក្សាមកពីប្រទេសមួយចំនួនក្នុងចំណោមរដ្ឋសមាជិកទាំង១០របស់អាស៊ាន។

សេចក្តីប្រកាសរបស់នាយករដ្ឋមន្ត្រីម៉ាឡេស៊ី ធ្វើឡើងក្នុងអំឡុងដំណើរទស្សនកិច្ចរបស់នាយករដ្ឋមន្ត្រីថៃ លោកស្រី Paetongtarn Shinawatra ដែលជាកូនស្រីពៅរបស់លោក ថាក់ស៊ីន នៅក្នុងទឹកដីម៉ាឡេស៊ី។

លោក អាន់វ៉ា បាននិយាយអំពីលោក ថាក់ស៊ីន ក្នុងសន្និសីទកាសែតរួមជាមួយលោកស្រី Paetongtarn ថា៖ «សូមអរគុណចំពោះការយល់ព្រមចំពោះរឿងនេះ ព្រោះយើងត្រូវការអត្ថប្រយោជន៍នៃបទពិសោធន៍របស់រដ្ឋបុរសបែបនេះ»។

លោក ថាក់ស៊ីន អាយុ៧៥ឆ្នាំ គឺជាឥស្សរជនដ៏ប៉ិនប្រសប់លើនយោបាយថៃក្នុងរយៈពេល ២ទសវត្សរ៍ចុងក្រោយ។ លោកត្រូវបានគេហាមឃាត់មិនឲ្យកាន់តំណែង បន្ទាប់ពីរកឃើញថាមានពិរុទ្ធពីបទរំលោភអំណាច និងទំនាស់ផលប្រយោជន៍ ហើយបាននិរទេសខ្លួននៅបរទេសអស់រយៈពេល ១៥ឆ្នាំ។

លោក ថាក់ស៊ីន បានវិលត្រឡប់ទៅប្រទេសថៃវិញនៅខែសីហាឆ្នាំ២០២៣ ហើយត្រូវបានកាត់ទោសឲ្យជាប់ពន្ធនាគាររយៈពេល ៨ឆ្នាំ ប៉ុន្តែត្រូវព្រះមហាក្សត្រថៃបន្ថយទោសមកត្រឹម ១ឆ្នាំវិញ។ លោក ថាក់ស៊ីន បានចំណាយពេលតែប៉ុន្មានម៉ោងនៅក្នុងពន្ធនាគារប៉ុណ្ណោះ មុនពេលត្រូវបានបញ្ជូនទៅមន្ទីរពេទ្យក្រោមហេតុផលសុខភាព។ លោកបានសម្រាកព្យាបាលនៅមន្ទីរពេទ្យអស់រយៈពេល៦ខែ មុនពេលត្រូវដោះលែងនៅក្នុងខែកុម្ភៈ។

យោងតាមប្រព័ន្ធផ្សព្វផ្សាយថៃ លោក ថាក់ស៊ីន បានបង្ហាញពីបំណងដើរតួនាទីជាអ្នកសម្រុះសម្រួល ក្នុងជម្លោះនៅប្រទេសមីយ៉ាន់ម៉ា ដែលកំពុងគ្រប់គ្រងដោយរបបសឹក ដែលជាបញ្ហាប្រឈមដ៏ធំបំផុតរបស់លោក អាន់វ៉ា សម្រាប់តួនាទីធ្វើជាម្ចាស់ផ្ទះអាស៊ានឆ្នាំក្រោយ៕

ដោយ៖ ឈាង