លោក Assad ប្រាប់​ថា លោក​ចង់​បន្ត​ប្រយុទ្ធ​ ណាស់តែ​រុស្ស៊ី​ជម្លៀស​ខ្លួន​រូប​លោកចេញ​ទេ

អតីត​មេដឹកនាំស៊ីរីដែលត្រូវបាន​ផ្ដួល​រំលំ លោក Bashar al-Assad បាននិយាយកាលពីថ្ងៃចន្ទ​ទី​១៦​ខែ​ធ្នូ​ឆ្នាំ​២០២៤​ថា លោកចង់ស្នាក់នៅក្នុងប្រទេស​​​បន្ត​ទៀត បន្ទាប់ពី​ក្រុម​ឧទ្ទាម​​ដណ្តើមយករដ្ឋធានី ប៉ុន្តែយោធារុស្ស៊ី​បានជម្លៀស​ខ្លួន​​រូប​លោកចេញពីមូលដ្ឋានរបស់ពួកគេនៅភាគខាងលិចប្រទេសស៊ីរី។

នេះ​គឺជាការអត្ថាធិប្បាយជាសាធារណៈលើកដំបូងរបស់លោក Assad ចាប់តាំងពីត្រូវបានផ្ដួលរំលំដោយក្រុមបះបោរកាលពីជាងមួយសប្តាហ៍មុន បន្ទាប់ពីការវាយលុកដ៏ឆាប់រហ័សនឹក​ស្មាន​មិន​ដល់ ដែល​ជា​ការ​បើក​ទំព័រ​ប្រវត្តិសាស្ត្រ​ថ្មី​​ ក្រោយ​ភាព​ជាប់គាំង​ក្នុង​សង្គ្រាមស៊ីវិលជាយូរមកហើយ។

លោក Assad បាន​​ប្រាប់​​នៅ​លើ​​បណ្ដាញ​សង្គម​ហ្វេសប៊ុក​​ថា លោកចាកចេញពីរដ្ឋធានី​ដាម៉ាស កាល​ពី​ព្រឹកថ្ងៃទី​៨​ធ្នូ បន្ទាប់ពីក្រុមបះបោរបានវាយលុកចូល។ លោក បន្ត​ថា លោក​ចាកចេញ​ដោយ​មាន​ការសម្របសម្រួល​ពី​សម្ព័ន្ធមិត្តរុស្ស៊ីទៅកាន់មូលដ្ឋានទ័ពអាកាស Hmeimim នៅក្នុងខេត្ត Latakia ដែល​​ជាកន្លែង​លោក​​មានគម្រោងបន្តការប្រយុទ្ធទៀត។

ប៉ុន្តែ​បន្ទាប់ពី​មូលដ្ឋាន​​ទ័ព​រុស្ស៊ី​មួយ​នេះ​រង​ការវាយប្រហារ​ដោយ​ដ្រូន ​រុស្ស៊ី​បាន​សម្រេចចិត្ត​ជម្លៀស​ខ្លួន​លោក Assad ​ទាំង​​យប់​​​​ទៅកាន់​ប្រទេស​​រុស្ស៊ី​។

លោក Assad បានរៀបរាប់​ថា៖ «គ្មាន​ពេល​ណាមួយក្នុងអំឡុងពេលព្រឹត្តិការណ៍ទាំងនេះ ខ្ញុំបានពិចារណាពីការចុះចេញពីតំណែង ឬស្វែងរកការជ្រកកោន​ទេ ហើយក៏មិនមាន​ជាសំណើបែបនេះដែលធ្វើឡើងដោយបុគ្គល ឬភាគីណាមួយឡើយ។ ​សកម្មភាព​តែមួយគត់​គឺ​បន្ត​ប្រយុទ្ធ​ប្រឆាំង​នឹង​ការវាយលុក​របស់​ភេរវករ»​។

ពាក់ព័ន្ធ​នឹង​ការ​លើក​ឡើង​នេះ ពលរដ្ឋ​​នៅ​ក្នុង​រដ្ឋធានី​ដាម៉ាស បានច្រានចោលការអត្ថាធិប្បាយរបស់លោក Assad ហើយអ្នកខ្លះបាននិយាយថា លោក Assad បានបោះបង់ចោលប្រជាជនស៊ីរីជាយូរ​ណាស់​មកហើយ។

លោក Obeida Arnaout អ្នកនាំពាក្យនៃនាយកដ្ឋាននយោបាយរបស់រដ្ឋាភិបាលអន្តរកាល​ស៊ីរី បាននិយាយនៅក្នុងបទសម្ភាសន៍មួយកាលពីថ្ងៃចន្ទថា៖ «របបលោក Assad ត្រូវបានបញ្ចប់ដោយគ្មានការវិលត្រឡប់មកវិញ» ហើយរុស្ស៊ី «គួរតែពិចារណាឡើងវិញ អំពីវត្តមានរបស់ខ្លួននៅលើទឹកដីស៊ីរី ក៏ដូចជាផលប្រយោជន៍របស់ខ្លួន»។

លោក Arnaout បានប្រាប់ថា ស៊ីរីបានឈានចូលដំណាក់កាលថ្មីមួយ ដែលនឹងបើកចំហសម្រាប់ពិភពលោក ហើយរដ្ឋាភិបាលថ្មីកំពុងសម្លឹងមើលការកសាងទំនាក់ទំនងល្អជាមួយប្រទេសជិតខាង៕

ដោយ៖ ឈាង