អ៊ុយក្រែន អះអាងថា ខ្លួនជាអ្នកសម្លាប់ប្រធាន កងកម្លាំងនុយក្លេអ៊ែររុស្ស៊ី

តាមការចុះផ្សាយរបស់សារព័ត៌មាន Kyiv Independent នៅថ្ងៃអង្គារទី១៧ខែធ្នូឆ្នាំ២០២៤, សេវាសន្តិសុខអ៊ុយក្រែនហៅកាត់ SBU បានចេញមុខអះអាងទទួលខុសត្រូវថា ខ្លួនជាអ្នកនៅពីក្រោយប្រតិបត្តិការបំផ្ទុះគ្រាប់បែកសម្លាប់ប្រធាន កងកម្លាំងនុយក្លេអ៊ែររុស្ស៊ី នៅទីក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីប្រកាសដែលក៏ត្រូវបានផ្សាយបន្តដោយ Reuters ផងដែរនោះ បានឲ្យដឹងថា «លោក Igor Kirillov ដែលជាប្រធានកងកម្លាំងការពារនុយក្លេអ៊ែរ ជីវសាស្ត្រ គីមី គឺជាឧក្រិដ្ឋជនសង្គ្រាមនិងជាគោលដៅស្របច្បាប់របស់អ៊ុយក្រែន​ ព្រោះគាត់ជាអ្នកចេញបញ្ជាឲ្យប្រើប្រាស់អាវុធគីមីដែលគេហាមឃាត់ ដើម្បីប្រឆាំងនឹងយោធាទីក្រុងកៀវ។ ដូច្នេះ ការសងសឹកចំពោះឧក្រិដ្ឋកម្មសង្រ្គាមនេះ គឺចៀសមិនរួចឡើយ»។

សូមបញ្ជាក់ជាថ្មី លោក Kirillov បានបាត់បង់ជីវិត នៅពេលគ្រាប់បែកបង្កៃក្នុងកង់ស្គីអេឡិចត្រូនិចដែលទុកចោល ត្រូវគេបញ្ជាពីចម្ងាយឲ្យផ្ទុះ ខណៈគាត់ដើរចេញពីផ្ទះក្នុងទីក្រុងមូស្គូ។

លោក Kirillov កើតនៅថ្ងៃទី១៣ខែកក្កដាឆ្នាំ១៩៧០ ក្នុងទីក្រុង Kostroma ភាគខាងលិចប្រទេសរុស្ស៊ី។ គាត់បានចូលរៀននៅសាលា Kostroma Higher Military Command of Chemical Defence ដោយបានបញ្ចប់ការសិក្សាក្នុងឆ្នាំ២០០៧។

ចន្លោះឆ្នាំ១៩៩១ដល់១៩៩៥ គាត់បានបម្រើការជាមេបញ្ជាការកងអនុសេនាតូចនៅក្នុងក្រុមកងកម្លាំងប៉ែកខាងលិចនៃប្រទេសអាល្លឺម៉ង់ និងយុទ្ធភូមិទីក្រុងមូស្គូ។

ក្រោយបញ្ចប់ការសិក្សា លោកបានកាន់កាប់មុខតំណែងជាច្រើននៅក្នុងកងកម្លាំងការពារនុយក្លេអ៊ែរ ជីវសាស្ត្រ និងគីមីរបស់ប្រទេសរុស្ស៊ី ហើយទីបំផុតបានក្លាយជាប្រធាននៅទីនោះក្នុងឆ្នាំ២០១៧។

ពេញមួយអាជីពជាយោធា គាត់បានជួយអភិវឌ្ឍប្រព័ន្ធសព្វាវុធធុនធ្ងន់ TOS-2 Tosochka។ យ៉ាងណា គាត់​ត្រូវ​បាន​គេ​ចោទ​ប្រកាន់​ពី​បទ​ប្រើ​ប្រាស់​អាវុធ​គីមី ​ដែលគេ​ហាម​ឃាត់​ក្នុង​អំឡុង​ពេល​សង្គ្រាម​នៅ​អ៊ុយក្រែន​ព្រម​ទាំង​សារធាតុ​ពុល Chloropicrin ផងដែរ៕

អត្ថបទ៖ សុខ សុវណ្ណ

ចុចអាន៖ ផ្ទុះគ្រាប់បែកនៅមូស្គូ សម្លាប់មេទ័ពរុស្ស៊ី ដែលជាប្រធាន កងកម្លាំងនុយក្លេអ៊ែរ